O loo faagasolo pea suesuega a leoleo i tuua’iga o faiga faaalatua faasaga i le Pule Sili o le Matagaluega o Galuega tetele ma fela’uaiga a le Malo ma e oo mai i le taimi nei e lei faia ni moliaga a leoleo.
O le suesuega a le Komisi e pulea tagata faigaluega a le Malo o loo faapena foi ona faagasolo e ui o lea ua faailoa e le komisi ise faasalalauga o avanoa faigaluega o Pule Sili a le Malo, le faasalalau o le avanoa o le Pule Sili o le Matagaluega o Galuega tetele ma fela’uaiga o loo umia e le Pule Sili o loo faamalolo lē tumau le afioga Afamasaga Pou Onesemo. O loo aofia i le faasalalauga ma avanoa e fitu o isi Pule Sili ua mae’a le tai tolu tausaga o a latou konekarate.
E lē o manino i le toe faasalalauina o le avanoa o le Pule Sili o le Matagaluega o galuega a le Malo pe ua mae’a le tolu tausaga o le konekarate a Afamasaga Pou Onesemo pe ua mafua ona faasalalau le avanoa ona o le taunuuga o suesuega a le komisi i tuua’iga o faiga faaalatua faasaga i le Pule Sili. O le tusi a le Komisi na logo ai le Minisita i le faagasologa o a latou suesuega na mamulu ai se finagalo o le minisita le susuga Papalii Niko Lee Hang, ma ia faailoa ise tusitala ua faamuta le taimi galuega o Afamasaga. Peitai na toe faasa’o e Papalii i sona finagalo e lei faia se faaiuga faapea a le komisi ma ua vave sona finagalo ona o lona manatu o le autu lea o le tusi mai le komisi na tuuina atu.
O se tasi o Pule Sili lagolago o lea lava matagaluega le afioga Fepuleai Faleniu Alesana ua faamuta lona taimi galue ona o tuua’iga lava o le aafia i faiga faaalatua, ma sa fesiligia leoleo faatatau i a latou suesuega agai i lea tamalii. O le tali mai a se leoleo sinia o loo faia suesuega e lei faia ni moliaga faasolitulafono.
O lipoti a le suetusi sili a le Malo ua folasia i luma o le Palemene o loo talatala pipi ai nisi o faaletonu i le faatinoga o tiute ma galuega a nisi o faauluuluga o matagaluega ma faalapotopotoga a le Malo aemaise o nisi o tagata faigaluega.
Ua faaalia e se ofisa sinia o le Malo o mea ua masani ona tutupu ma e lē alofia lava faaletonu. Ua saunoa pea le Palemia i le tele o taimi ma afea faataoto a le Alii i faaletonu e aafia ai le auaunaga a tagata faigaluega a le Malo i le tutupu faatasi pea o le saito ma le titania.
