Ua lua tausaga talu ona pasia i le tulafono a leoleo (Police Act) se aiaiga fou ua galulue faatasi ai le Matagaluega ma le Ofisa o le Komesina o Sulufaiga, le Ombudsman office, e ala i le tuuina atu o suesuega o faaseā ma faitioga mai le atunuu faasaga i leoleo, e tauave e le Komesina o Sulufaiga.
O suesuega ia sa tauave e le vaega o amioga taualoa a le Matagaluega o Leoleo, le Police Professional Standards unit.
O le toe faaauauina o galuega i le amataga o lenei tausaga fou 2012, ua faato‘ā sainia ai le maliega (memorandum of understanding) i le va o matagaluega e lua e faataunuu ai aiaiga ua mae‘a pasia e le Palemene.
O se itu tāua lea i le mātau a le toatele ona o le a mafai ona tutoatasi ai ni suesuega faasaga i ni amioga poo ni lape ua tuuaia ai le faatinoga o galuega a leoleo, pe a fua i le tele o masalosaloga pe o tutoatasi le vaega o amioga taualoa a le matagaluega i le faia o suesuega faasaga i ni leoleo e aafia i ni tuuaiga mai le lautele o le atunuu.
E iai suesuega sa faia faasaga i se leoleo sinia sa galue i le pulea o le falepuipui i Tafaigata, ma e oo mai i le taimi nei e lē o iloa poo fea ua iu i ai lea suesuega sa faia e le vaega o amioga taualoa a le matagaluega.
Ua na o nisi suesuega sa faia faasaga i nisi alii ma tamaitai leoleo ua mae‘a ona faia i ai faaiuga ma ua molia ai i latou ma tulai i le faamasinoga, lea ua mae‘a ona faia faasalaga e tusa ai ma le taunuuga o ia moliaga.
O le feagaiga ua osia nei ma le ofisa o le Komesina o Sulufaiga, na faaalia e le sui sooupu le afioga i le Komesina lagolago o Leaupepe Fatu Pula, o le a mafai ona toe faafoi ai le talitonuga o le atunuu i le faatinoga o tiute o alii ma tamaitai leoleo.
O le fesili, pe aisea na tuai ai ona faatino le aiaiga na pasia i le tausaga e 2009 faasino i le tuuina atu o mataupu e tuuaia ai leoleo i le ofisa o le Komesina o Sulufaiga?
O le atugaluga sa iai i le talitonuina o suesuega e faia e leoleo faasaga i isi leoleo, o le a mautinoa le mou ese atu, auā o lea ua iai le suiga.
O se suiga na faaalia e nisi o leoleo sinia, o le a aveese ai le loto masalosalo o tagata, ae ave le faatuatuaga atoa i le Komesina o sulufaiga ma lona ofisa e faia ai se suesuega ma tuuina atu se fautuaga i le Komesina i se faaiuga e taunuu i ai.
O tuuaiga sa faasaga i se tamalii sa seei i le tofiga Komesina o leoleo i nai tausaga ua mavae, ina ua lavea se taavale a le ofisa sa malaga ai sa faapea ona tauaveina e se tasi o Komesina lagolago i lea vaitaimi.
Na aumai le taunuuga o lea suesuega e toatele e lei talitonuina.
O se tasi o suesuega faasaga foi i se tasi o leoleo sinia i lea lava vaitaimi sa tuuina atu i le Loia Sili na te faatautaia, ma o le suesuega lea e faasino i ni laau malosi na aumai faananā i luga o le vaaleoleo o le Nafanua mai Amerika Samoa.
O le taunuuga o lea suesuega na faia ai se komisi suesue na tofia e le Malo e toe silasila i lea faaletonu, ma o le fautuaga na ave e le komisi i le kapeneta ina ua mae‘a a latou suesuega, ia faia ni moliaga faasolitulafono o le Komesina sa iai i lea vaitau, faapea ni moliaga o le kapeteni o le Nafanua.
Na liliu le kapeneta i lena vaitaimi ma faia se isi faaiuga ae lē o le fautuaga a le komisi suesue, na faapea ona faasalaina ai le kapetenei i le lē toe maua o lona tulaga sa iai poo lona rank ma aveese mai ma le toe galue i le vaaleoleo.
O le Komesina sa aafia i le aumaia faananā o laau malosi na ave i ai se aoaiga ma e lei toe iai foi se avanoa e toe talosaga ai i le tofiga ina ua uma lana konekarate.
