O le teineitiiti na aafia sa i lalo o le vaaiga a le auaunaga a le ekalesia e ta‘ua o le To‘ai-manu o loo i Moamoa, lea e i lalo o le pulega a le Fiaola Clinic, o se auaunaga a le Katoliko ua leva tausaga o faatino.
Ua molia e leoleo se alii ua 40 ma ona tupu tausaga ona o le solitulafono o le faamalosi o se teineititi 6 tausaga na faamautu i le nofoaga o le To‘ai-manu o loo faafoe e le Ekalesia Katoliko i Samoa.
O se nofoaga mo i latou ua aafia i ni sauaga tau feusuaiga, ae e lē o natia pe ‘alo le pulega o le Ekalesia Katoliko i Samoa i le vave faia o se gaioiga e sailiili ai le faaletonu. “O se fagufagu i le ekalesia lenei mataupu ma o le a aogā tele i le toe faasagatonu o ni tulaga ua faaletonu”, na saunoa ai se sui o le ekalesia.
O le teineitiiti na aafia ua mautinoa sa i lalo o le vaaiga a le auaunaga a le ekalesia e ta‘ua o le To‘ai-manu o loo i Moamoa, lea o loo i lalo o le pulega a le Fiaola Clinic o se auaunaga a le ekalesia ua leva tausaga o faatino.
O loo fesoasoani le Fiaola Clinic i le ave o fautuaga e tetee atu ai i le pule i le ola, ma faafitauli e fesootai ma le tagofia o le avamalosi faapea faafitauli i aafiaga o fanau teine laiti i maitaga lē manaomia poo le teenage pregnancy.
Faaalia e le afioga Patele Penitito Mauga o ia sa faatulaga na te taitaia le fono a se komiti faapitoa na tofia e le pulega o le ekalesia e silasila i le mataupu, ae peitai e lei avanoa i le fono ona o se tuatuagia tāua tele.
O le mafuaaga lea o le mafai ona maua mai se faamatalaga i le alii faifeau. O suesuega atili na maua ai ni faamatalaga faatuatuaina mai se sui o lea komiti faapitoa poo se task force.
E lē o finagalo le sui e faailoa lona suafa, ae ua ia faailoa mai e faapea o loo faia le latou suesuega ma o loo manaomia vave se lipoti e le pulega o le ekalesia ona faia ai lea o se isi faaiuga.
O se tasi o fesoasoani Katoliko o loo umia le tofiga Tiakono le susuga Ioane Iosefo e pei ona faaalia e lea sui, ua faamalolo lē tumau lona tofiga o le Faatonu o le Fiaola faatasi ai ma lona faletua sa la galulue i le faafoeina o le Fiaola Clinic, lea sa iai ma le vaaiga o le nofoaga o le To‘ai-manu.
O lea nofoaga e i se vaega o le lotoā a le ekalesia i Moamoa i le vaega sa iai le kolisi tuufaatasi ua tapunia, o loo nonofo ai nisi ua aafia i sauāga tau feusuaiga poo victims of sexual abuse.
O i latou ia o loo faasino i ai ni mataupu o loo suesueina e le matagaluega o leoleo. “O lea ou te iloa o le To‘ai-manu o se auaunaga a le ekalesia Katoliko e fai faatasi ma le matagaluega o leoleo”, na faaalia ai e se molimau.
E lē gata e vaaia ai i latou ua aafia i ia tulaga, ae o loo nonofo ai foi ma nisi ua lē o toe nonofo i o latou aiga, ae o loo vaaia le nonofo solo i le taulaga, po ua lē toe fia nonofo lava i o latou aiga.
Ua faaalia e se molimau e faapea o le teineiitiiti na aafia na faia i ai e se alii sa i nofo ai i le nofoaga le gaioiga faamalosi.
Ua faaalia e se molimau e iai ma nisi tamaitai sa vaaia i le nofoaga na aafia i ni fesootaiga faaulugalii ma nisi o alii sa nonofo ai i le nofoaga. Peitai e lē o mafai ona faamaonia lea molimau ona o loo faatali le taunuuga o suesuega o loo faia e le komiti faapitoa na filifilia.
O loo faatupe uma e le ekalesia Katoliko le vaaia o le nofoaga o le To‘ai-manu e ala i le saunia o fale o loo nonofo ai i latou ua aafia i ni sauāga solitulafono ma nisi ua lē maua ni aiga e nonofo ai.
O le faamalolo ai o le Faatonu ma lona faletua, ua ave ai le vaaiga o le nofoaga i se tasi o faifeau patele ma se ulugalii e faapea sa iai lava i le taimi o loo tauaveina e le Faatonu ma lona faletua le faagaioia ma le vaaia o le nofoaga.
“Pe afai e faamaonia nei tuuaiga, ou te lagona o se tala faanoanoa lea mo le ekalesia, aemaise o le a iai nisi e maua i le loto ita ma gausia ai le ola talitonu i le auaunaga o loo ofo e le ekalesia mo ia tagata”, na saunoa ai le sui o le komiti faapitoa.
O le Fiaola Clinic na amata i le tau amataga o le vaitau o le 1970 ona o le naunautaiga o le ekalesia e faia se galuega laveai mo soifua e fano i le pule i le ola. Na sosoo ai ma le ofoina o se isi auaunaga o le faia o fautuaga mo i latou e aafia i faafitauli e pei o le tagofia o le avamalosi, aemaise polokalame e faaitiitia ai maitaga lē manaomia o fanau teine laiti.
