Suesue e fomai tamaiti ma faiaoga Kolisi i Rangitoto

O loo suesueina i le taimi nei le aumalaga e toa 25 o faiaoga ma tamaiti aoga mai le Kolisi o Rangitoto i Aukilani nei o i latou ia sa faimalaga atu i Mexico mo se tasi o faamoemoe o le Kolisi. Ua mafua ona suesueina i latou nei e fomai ona o le tulaga masalomia poo aafia i le gasegase o le swine flu lea o loo pepesi tele i lea vaega o le lalolagi i le taimi nei. Fai mai e toa 18 o le aumalaga lea e 25 o loo lipotia le aafia i gasegase e faapei o le swine flu lea la o loo tulituliloa nei i sailiga a alii ma tamaitai fomai i totonu o Aukilani poo le a tonu se tulaga o loo iai e fuafua i ai ni fautuaga poo ni lapataiga mo le atunuu atoa pe afai e faamaonia o loo aafia nisi i lea faamai. Faaalia e le fomai o Julia Peters mai le Auckland Regional Public Health Services poo le auaunaga mo tagata lautele i le faaitumalo o Aukilani. Faailoa mai e toatasi le tamaititi aoga na taofia i le falemai i le po anapo ae o loo malosi le faamatalaga a fomai e le o aafia i le influenza poo le faamai lea o le swine flu.
Ua fautuaina nei e le maota gasegase ma le pulega o le soifua maloloina le mamalu o le atunuu femalagaai aemaise lava i latou e fuafua e afea le aai o Mexico ina ia mataala ma ia mautinoa le malupuipuia o le soifua mai le mau gasegase i ia atunuu i fafo aemaise foi o le malu puipuia ai o le soifua o tagata o loo aumau i Niu Sila nei pe afai ae toe taliu ma aumau ai i le atunuu. E iai le talitonuga ua atoa le toa 80 o tagata ua maliliu i le gasegase lava lenei o le swine flu i totonu o Mexico ma ua valaauina ai foi e le faalapotopotoga o le soifua maloloina o le lalolagi le WHO ina ia lapataia ai atunuu uma o le lalolagi i aafiaga o lenei faamai. E toa sefulutasi ua faamaonia mai i Amerika ma le isi toa sefulu o loo suesueina i le taimi nei, peitai o isi vaega ua oo atu i ai e aofia ai Kalefonia, Texas, Kansas ma Niu Ioka ma ua oo atu foi i vaega o Lonetona. O auga o lea gasegase e aofia ai le fiva, tiga le tino, tale, poloka le isu ma e manava tata foi tulou i nisi o taimi atoa ai ma le faasuati.