E toalua ni alii pagota ua suesueina nei e le Matagaluega o Leoleo i ni ata ua faalauiloa solo i luga o le polokalame o telefoni e ta‘ua o le Bluetooth ua faaali ai le tele o faaseā a le mamalu o le atunuu.
O le fesili tele ua faapea ona tulai mai, pe faafefea ona maua e pagota telefoni a o nofo taofia ai.
E matautia ata na faaali o nei pagota, ua faaali itu tinosā (se‘i tulou le aufaitau) i luga o le telefoni ae pue. Ua fesiligia foi poo se pagota poo se leoleo na pueina nei ata ae faasalalau solo. E lē o faalauiloa faalauaitele e Leoleo suafa o nei alii, ae o loo sau lava i luga o le ata matagā ma le lē mafaufau igoa o nei alii o loo ta‘u mai lava le igoa o le tagata latou ma e aofia ai le alii na ia faasiilima le aufaigaluega a le kamupani o tupe faamomoli a le Inkpatch i lona lala i le motu tele i Salafai.
Sa fesiligia le sui sooupu o le Matagaluega o Leoleo, le afioga i le Komesina Lagolago le afioga Leaupepe Fatu Pula i lenei mataupu, ae faapea mai e lei oo atu ia te ia se lipoti faapea, ae o le vaiaso lenei ua faapea mai o lea ua suesue e le vaega o suesuega (CID) a le matagaluega le mataupu ma faia ai loa ni moliaga.
Faaalia foi e le sui sooupu e matuā faasāina lava le umia e ni pagota o ni telefoni feaveai. O le a tālia se iuga o suesuega i lenei vaiaso a le Matagaluega o Leoleo.
