Ua matauina le tele o taleni o loo i alo ma fanau a Samoa i lenei vaitau, ua le gata i le lakapi, fusuaga ma isi taaloga ua masani ai le faafofoga i sao o tamafanau a Samoa o loo auai, ae o lea foi ua faasolosolo mai luma se tasi lenei o faagatama ua mataulia le naunau foi o nisi o alo o le atunuu e faatinoina, le taaloga o le taekwondo poo le marshall art e pei ona sa taua ai muamua.
O le Aso Toonai la, 3 o Oketopa na faia ai se suega siamupini o lea taaloga i le nofoaga o le Sleeman Sports Complex i Chandler Brisbane. Sa muamua ave mea i Matautu Sā e ala i se sauniga lotu sa taitaia e le susuga i le faafeagaiga ia Rev Perelini Perelini o le ekalesia EFKS.
Na amataina le taaloga i le manuia ma na molimauina le toatele o le mamalu o le atunuu sa lagolago ma faatumulia ai lea nofoaga ona o le fia maimoaina foi o faagatama sa malaga mamao mai ai alo ma fanau mai Samoa.
O suafa nei o nisi o le ‘au na malaga mai Samoa sa faamanuiaina i pine auro. E toalima i latou, e aofia ai:
Pine Auro
Zoee Thomsen Fuataga Tasimani Lautusi
– 16 tausaga (fusi samasama)
Moira Le‘alo Toleafoa Pili – 21 tausaga
(fusi samasama)
Jerry Lilomaiava Fou Taioalo – 19 tausaga
(fusi lanumoana)
Taeao Tia Tafili Siilata – 25 tausaga
(fusi samasama)
Fritz Thomsen Fuataga Tasimani Lautusi
– 16 tausaga (fusi lanumoana)
Pine Siliva
Oswald Tapelu – 10 tausaga
(fusi samasama)
Sam Lautusi – 10 tausaga
(fusi samasama)
Paletasala Eti Tuilaepa Faolotoi
– 18 tausaga (fusi samasama)
Shon Pua Lotolagi Soo -15 tausaga
(fusi laumoana)
Aloma Hansel Black – 12 tausaga
(fusi samasama)
Pine Apamemea
Emanuel Sooalo Kuresa – 14 tausaga
(fusi samasama)
O nisi o faletua sa taitaia mai le aumalaga e aofia ai Team Managers faletua ia Shan Thomsen Fuataga Tasimani Lautusi ma le faletua ia Lyvia Black.
O nisi o tamaiti sa malaga mai e aofia ai Junior Tanuvasa Livi Ianuari o Vaisigano, Leone, Taufusi ma Manono-Tai, ma Kaino Thomsen Fuataga Tasimani Lautusi mai Lalomanu, Tafitoala, Vaoala, Toamua, Salelavalu ma Leauvaa.
E 3 vaiaso sa toesea ai lea au taaalo ma si o tatou atunuu o Samoa, ma e ui lava ina mafatia nisi o tamaiti mai le alalafaga o Lalomanu ona o nisi o uo ma aiga ua maliliu i le Tsunami, peitai na iu manuia taumafaiga a nai alo ma fanau e ala i pine auro, pine siliva ma pine apa memea sa tauaaoina.
Sa momoli le agaga faafetai o le susuga ia Faalavelave Frank Frost i le aoaoina lelei o fanau sa malaga mai e tusa ma le latou mafutaga matagofie.
O le maota lava o le tofa ia Faalavelave Frank Frost sa tali ai le aumalaga ma sa vaaia foi le valevalealofa o aiga ma uo e ala i taumafa ma nisi o mea uma sa manaomia.
O le van a le afioga i le aloalii ia Galumalemana Harry Timoteo faatasi ma nisi o tamalii sa faaaogaina e feaveai ai le autaaalo.
Ua toe taliu atu nei i Samoa le autaaalo ma se tala fiafia ona ua o latou tauaaoina ni pine auro, pine siliva ma se pine apa memea.
