Ua matuā masae le laufai a Julian Savea ma le pulega o le ‘au a Toulon o loo taalo ai. I le faaiuga o le taaloga o le vaiaso ua tea’ na faia’ina ai Toulon ia Agen 10-19 na pa ai ma le to’atamai a Mourad Boudjellal i le alii lakapi o Julian Savea ona o le faaletonu o lana taalo. Ua faate’a ai ma Savea e Boudjella mai le ‘au ma le kalapu a Toulon – ona o le leaga o lana taalo.

I le taaloga ma Agen, na vaaia le telegese o le tamo’e a Savea i le uigi. E iai le sikoa a le uigi a Agen, le alii o Benito Masilevu. Na fiu Savea a tuli le uigi ae e lei maua ma sikoa ai Masilevu.

I le mae’a ai o le taaloga lea na faalele ai e Boudjellal lana faamatalaga ua faate’a Julian Savea.

E lē o popole foi o ia pe  toe tasi le tausaga o totoe o le feagaiga a Savea ma le kalapu ae ua le mafai e ia ona toe onosa’ia faaletonu o le taalo a Savea.

I le talanoaga ma le leitio o le RMC i le mae’a ai o le taaloga na faapea ai Boudjella, e tatau ona su’e mai le Julian Savea moni. Aua e lē o le Savea lea na ia sainia mai le Hurricanes. E ese le tagata lea.  “E foliga mai o Savea ae e lē o Savea. Atonu e iai le masaga a le Savea moni ae o lea ua taalo mo Toulon le Savea sese.”

  “Ua mae’a ai ma le taimi o Savea i Toulon. Ua tatala o ia i tua e toe foi i lona atunuu. E lē o toe mana’o foi iai Toulon.” “E tatau ona su’e le DNA poo le Savea moni lea. Aua e matua ese lava le tagata lea o loo taalo mo Toulon mai le uigi saoasaoa lea na matou sainia mai Niu Sila.”

O le mau a le alii pule, ai na fesuiai le Savea moni ma le tagata lea na taalo. Ai na fesuiai i luga o le vaalele ae e lei tu eleele i Farani.  “E tatau ia Savea ona faatoese i le kalapu a Toulon i lana mea ua fai aua e matua le tutusa lava ma le Savea na matou sainia.”

O le sefulu ai lea o faia’ina sosoo a Toulon i taamilosaga a kalapu i Falani, ma nofo ai le kalapu i lalo o le apefai o tuufaatasiga o ‘ai o le taamilosaga.  Ae e lē o mautinoa pe o le ā faataunuu le to’atamai o le alii pule i le tuliesea o Savea ma le kalapu.

E tele isi faaletonu na feagai ma le alii lakapi talu ona taunuu i Toulon. E iai le lavea o lana taavale ina ua tautulimoe i luga o le auala. O le isi, e lei fiafia Toulon i le alu o Julian i Fiti i le faaipoipoga a lona uso o Ardie, na misi ai e Julian isi taaloga a le ‘au.

Ae e le na’o Savea na pa iai le to’atamai o le alii pule. Na lau foi e Boudjellal le leaga o le 1st five a le ‘au, le alii o Anthony Belleau.

Na ta’ua e Boudjellal ua maua Belleau i le faamai o loo mama’i ai le ‘au faavaomalo a Farani. Ua leiloa ai e Belleau ona taalo lakapi. O le mafuaaga foi lea ua le amanaia ai e Farani Belleau mo le ‘au faavaomalo.

O le taimi nei o loo i le tulaga #11 le ‘au a Toulon. Ae e lei mamao tausaga na iai le ‘au i luga o ‘au fili i totonu o Farani.

Tali Fatima Savea i Faitioga

E le na’o le alii pule ua togi maa ia Savea, a’o tagata lagolago foi e lagolagoina le ‘au ua faapea foi ona faitio ia Savea ma ona faaletonu. E lei nofo filemu ai le faletua o le alii taalo ae ua faaupu lona le fiafia i tagata ma le ‘au foi a Toulon.

Na ta’ua e Fatima, e lē o se leaga o Julian ua faaletonu ai le ‘au, ae ona o le leaga lava o le ‘au atoa ua faapea ai ona pa’u i lalo.  Na lapata’ia foi e Fatima le lafo upu a tagata aua e aafia ai mafaufauga o tagata o loo nofo ma faitioga, e pei o Julian.

“O le lakapi, e gata le lelei o le tagata taalo i le lelei o le ‘au. E lē o se taaloga fai ta’ito’atasi, ae o le taaloga a le au atoa. A leaga le ‘au e leaga ai foi ma lau taalo.”

“Ae e lē tatau ai ona lafo upu a tagata lautele i tama taalo aua e aafia ai o latou talitonuga ma mafaufauga.”  Na ta’ua foi e Fatima, o loo ia malamalamala lelei i feagai o feagai ma Julian ma tama taalo uma o le lakapi.

E lē o se mea mama ia latou le faaletonu o le ‘au e taalo ai.