O Fepuari na tea nei na toe fono ai foi i Ausetalia taitai o le pulega a le Ekalesia Aso Fitu i le Pasefika ma faifeau Samoa mai Samoa faapea sui faifeau mai Ekalesia Samoa i Niu Sila ma Ausetalia, mo le toe lauliliuina o le mataupu i Samoa ua ōia ai nei se tasi o mataupu silisili a le Ekalesia, lea ua lua ai nei o latou aso tapuai i Samoa, o nisi i le Aso Toonai ma le toatele i le Aso Sa.
O le iuga o lea fonotaga o le a tuuina atu ai le mataupu mo le suesueina e le komiti faapitoa o mataupu silisili a le Ekalesia i le pulega a le Pasefika, le BRComm.
Peitai ua aliae mai nei se isi tulaga faaletonu i Samoa lea ua taulima ai e sui o le Ekalesia Aso Fitu o le Toe Afio Mai o loo tapuai pea i le Aso Toonai i Leauvaa-uta le tusi mai le ofisa loia o loo tu mo le ofisa ulu o le Ekalesia i Samoa, faapea le tusi mai le Matagaluega o Faamasinoga ma le Faafoeina o Tulaga Tau Faamasinoga.
I le tusi mai le loia na tusia i le aso 6 Fepuari o loo faapea mai ai, “Ua poloaia e le Peresetene (Ekalesia Aso Fitu) ina ia aua le toe faaaogāina le Malumalu ma meatotino a le Ekalesia, ae taliga se faaiuga mai le Faamasinoga Fanua ma Suafa e tusa ai ma le talosaga ua taatia nei. A le utagia mai lenei poloaiga i totonu o le 7 aso mai le aso e taulimaina ai lenei tusi, o le a tuuina atu loa le mataupu i le Faamasinoga Maualuga mo se poloaiga i le pulea, talaia ma le aveesea e le Ekalesia o meatotino ia pei ona taua.”
O loo faaalia foi i lenei tusi e faapea, “E le tuufesiliina pe aia foi le Ekalesia i le pule o le fanua e patino i lau afioga Sala.
A o le talitonuga o le Ekalesia, o le Malumalu ma meatotino o loo i totonu ma fafo aua le faafoeina o galuega a le Ekalesia o meatotino ua uma ona faamatuu i le pule a le Ekalesia e tusa ma faiga faavae ma masani pe a faatu ma amata se Ekalesia i totonu o se nuu ma alalafaga.”
I le tusi mai le resitala o Faamasinoga Fanua ma Suafa o loo faapea mai, “O loo manino le pule a le suafa Sala i le fanua o Laumasa e pei ona tulai mai ai Sala Fonoti Peteli na talosaga mai, e pei foi ona tau fai lagolagoina e o tou finagalo faaalia. Peitai, o le tulaga i le vaeluaina o meatotino a le Ekalesia, o lea e fautuaina ai ma le ava tele le agai e sailia se fesoasoani faaletulafono mai se loia e sailia ai le sa‘o o lenei mataupu, e pei ona feteenai ai o tou finagalo.”
E pei ona silafia, o le Ekalesia Aso Fitu o lo latou Sapati e faitau lea i le aso e fitu i ai aso o le vaiaso ma e paū lea i le Aso Toonai i soo se vaega o le lalolagi. Ae mo le tele o ekalesia Kerisiano i Samoa o loo faaigoaina foi le Aso Sa o le Aso Sapati e faamanatu ai le toetu o Iesu i le aso muamua o le vaiaso.
Peitai i le polokalame o le Tagata Pasefika a le Televise a Niu Sila i le Tausaga na tea nei na saunoa ai le Peresetene o le Ekalesia i Samoa, Pastor Uili Solofa, ua avea nei le Aso Sa i Samoa ma ‘aso fitu’ o le vaiaso.
O lea mau sa faapea foi ona lomia i le Samoa Observer i le aso 1 Iulai o loo faapea ai, “O le tulaga ua iai nei i le tausia o le Sapati ua suia ai le Aso Toonai ae ua avea le Aso Sa ma aso e fitu i ai aso o le vaiaso.”
I se pepa na tusia e Pastor Uili Solofa i le aso 29 Tesema 2011 o loo faapea mai, “O le toatele o taitai o Ekalesia, tagata lotu ma nuu e lē o talanoa ma faapea ane ua fiafia o le a o atu le Ekalesia Asofitu e tausi le Aso Sa, ae o le latou gagana o loo gagana ai – O le a tatou o e tausi le Sapati a le Lotu Asofitu. Viia le Atua!”
O se mau e feteenai tele lea ma le talitonuga o isi Ekalesia Kerisiano o loo tapuai i le Aso Sa, poo le aso muamua o le vaiaso, e faamanatu ai le toe tu manumalo o Iesu.
