O le vaiaso na te’a nei na tumutumu ai le atunuu aemaise o le taulaga o Apia ile ofu lanu meamata, o le toniga a tama tuai a Malisi e pei ona faagasolo ai polokalame ile vaiaso atoa e faamanatu ai le 130 tausaga talu ona faavae ai le aoga a Tama Malisi i Mulivai. O se aoga na faamauina e toatele nisi o faauluuluga o Matagaluega a le Malo, pisinisi ma kamupani aemaise foi o taitai o Samoa na faavae mai ai le ola a’oa’oina. Na malaga mamao mai nisi o tama tuai a Malisi mai Niu Sila, Ausetalia, Amerika Samoa, ma le Malo tele o Meleke faapea ai isi atunuu e patipatia ai sauniga o lenei 130 tausaga.
O se tasi o pine faamau o lea 130 tausaga o Malisi, o le toe faatuina ai lea ma faaolaola le gutu paipa ile lotoa o tama Malisi i Mulivai. O se tasi lenei o faaupuga e masani o fai ma tala ula a le tupulaga ile tele o taimi, o le su’e lea o le au o le paipa. Na faalogoina ile vaiaso o Malisi lea faaupuga ina ua manatu ai le vasega a tama tuai a Sagato Iosefo ile 1988, e toe faaleleia ma faasima lelei le gutu paipa lenei lea e latalata atu ile $20,000.00 le tau atoa na faatupe ai. O sui lava o le vasega a Sagato Iosefo 1988 e aofia ai le alii kamuta ia Mulipola Anton Ah Ben ma le Inisinia ia Su’emalo Peter Ott na faatinoina lenei galuega, ma o tupe lava mai taga a le vasega lenei na faatupe atoa ai le galuega o le gutu paipa.
Saunoa le Peresetene o tama tuai a Malisi Aumua Ming Leung Wai, o le gutu paipa lenei sa iai i lona tulaga e latalata ile auala o le Beach Road i Apia ile vaega tonu o iai nei le Oifsa o le Komesina o Ausetalia, o le gutu paipa na feinu ai tama aoga a Malisi, faatasi ai ma le toatele o i latou na ui ane i lea auala, sa feinu uma ai ile paipa lenei ona e fai si malulu i lena vaitau e leai tele ni faguvai na iai.
O le tausaga na tea nei na toe su’e ai e tama tuai a Malisi lea gutu paipa ma toe maua ai, lea na amata ai loa le galuega ile tolu masina talu ai e toe faaolaola ai le gutu paipa lenei ile vaega tonu o iai le aoga laiti a Malisi i Mulivai. Taua e Aumua, o le gutu paipa lenei na faaigoa ai ia Brother Hilary Francis, o se tasi o alii talavou 24 tausaga mai Ausetalia na malaga mai i Samoa nei e amata ai le aoga a Malisi, 25 tausaga na iai i Samoa nei ma Amerika Samoa peitai na maliu ai ile tausaga e 1924. O nisi o i latou na a’otauina i lalo o Francis, na o latou faatu ai lea gutu paipa ma faaigoa ai ia Brother Hilary Francis e manatua ai le soifua o lea alii Felela na ia a’otauina ai le tele o fanau aoga a Malisi i Samoa. O le toe fausia ai e le vasega o le 1988 o lenei gutu paipa ile lotoa o Malisi i Mulivai ina ia manatua ai pea galuega lelei na faia e Felela mo Malisi, aemaise ia feinu ai fanau a Samoa o utuvai ai ile poto ma le atamai ile aoga lenei a Malisi i Mulivai. Fai mai Aumua, o le pine faamau lenei o le faamanatu ai o le 130 tausaga o le aoga a Malisi e pei ona patipatia ai e tama tuai na a’otauina o latou soifua i Malisi i Mulivai.
