“E malosi le mea moni mai le Atua”. O upu ia na saunoa mai ai le tuaa o le tamaitai o loo aoga o se tusitala i le Iunivesite Aoao a Samoa ina ua mae‘a ona lauina le faaiuga poo le verdict a le faamasinoga i moliaga e lima o le faatonu o le nusipepa a le Malo le afioga Tupuola Terry Tavita.
O le Aso Faraile 29 o Me 2015 na fofogaina ai lea taunuuga o suesuega a le faamasinoga i moliaga e lua o le faaoolima matagā, lua moliaga o le faaoolima, ma le moliaga e tasi o le lafo o upu palauvale sa tuua‘ia ai Tupuola.
Faaalia e le tuaa o le tamaitai na tagi i leoleo, o le tali lea o le amiotonu a le Atua ua faaalia i le finagalo o le tulafono ma le faamasinoga.
O Tesema o le tausaga ua mavae na tupu ai le gaioiga na molia ai le alii faatonu o le nusipepa o loo fa’amalolo lē tumau, ina ua agai ma le tamaitai e lipotia le tatalaina i Faleolo o le atinae o le eletise e maua mai le malosi o le la. Na toe tupu foi se isi gaioiga ina ua agai ma le tamaitai e lipotia le saofai a le alii fusu o Joseph Parker sa faia i A‘ufaga i Aleipata. Sa teena e Tupuola moliaga uma e lima a leoleo.
O moliaga muamua o le taumafai e faatino se faigaaiga fai faamalosi poo le attempted rape na toe faaui i tua e leoleo ona ua lē lava molimau e lagolago ai. O le mafuaaga lea na toe faaulu ai isi moliaga lea ua faamaonia. O le aso 26 o le masina nei o Iuni e aumai se faasalaga a le faamasinoga.
O se tasi o tamaitai aoga tusitala sa galulue uma i le nusipepa o le Savali ma le tamatai na aafia, sa molimau e lagolago le tetee a le alii faatonu. O loo faamalolo lē tumau le afioga i le faatonu peitai ua iai se molimau e lei faamaonia ua faailoa mai ai ua faamavae le afioga Tupuola.
“Na faamavae e lei aumai le faaiuga a le faamasinoga”. O le faamatalaga lea a le molimau o se tagata faigaluega i le Matagaluega a le Palemia ma le Kapeneta lea o loo iai ma le nusipepa o le Savali. O loo vaaia le nusipepa a le Malo e se tasi o tusitala sinia le susuga Ulafala Seupule.
O le ofisa o faamatalaga a le Malo le Press Seretariat o loo vaaia e se tasi o tamaitai tusitala sinia o Renate Rivers talu ona maliu lē sa faauluulu i ai le susuga Uale Taimalelagi. O tofiga o ia ofisa tau faamatalaga a le Malo, o le a toe sailia ae e oo mai i le taimi nei e lei faasalalauina ia avanoa.
