O le aso 26 o Setema o le tausaga e 2014 na lau ai le faaiuga a le faamasinoga o fanua ma suafa i le faiga suega i le sailia pule o le fanua o Vaialasa i Puipaa. O le faaiuga lea na faamaonia ai e le faamasinoga o le eleele poo le fanua e faasino tonu i le suafa ‘Ulu i suli o Tapaleao lea o loo seei ai le tofa ‘Ulu Kini ma ‘Ulu Bismark Crawley.
O le aso na sosoo ai le aso 27 o Setema 2014 na oo atu ai le tofa ‘Ulu Kini ma nisi o lona aiga ma faia loa le galuega o le faamamā o le fanua na faaaogā ai se masini e sua ese ai meatoto e pei o fa‘i ma ‘ulu. Na sua ese ai foi ma le pa uaea sa siomia ai le fanua.
O le mafuaaga lea o le faatoai e le afioga Taupa‘u Maotaoalii Kaioneta Kitiona se tagi i leoleo ona o ia e ana meatoto ma le pa uaea na aveesea i le galuega. O Taupa‘u ua leva tausaga o nonofo i luga o se vaega o le fanua ma sa auai foi i le faamasinoga lea na sailia ai poo ai tonu e pulea le eleele. E leai se piitaga faaleaiga o Taupa‘u ma lona aiga i le suafa ‘Ulu ae o lona nofoia o le fanua, o le mafuaaga lea na auai ai i le sailiga o le pule o le fanua.
I le faaulu ai o lana tagi i leoleo na faia ai loa moliaga o le faaleagaina o ni meatotino ma le faamoemoe e faatino ai se soligatulafono poo le intentional damage, faasaga i le tofa ‘Ulu Kini, o lona atalii ma isi matai e toatolu o lona aiga.
O le Aso Lulu ma le Aso Tofi o le vaiaso ua mavae na valaau ai molimau a leoleo e lagolago ai le moliaga. Na tulai ai le afioga Taupa‘u ma faia lana molimau lea na ia faamatala ai le mea na tupu.
Na ia faailoa i le faamasinoga le faaleagaina o ana meatoto e pei o fa‘i e silia i le limaselau i le masini na faaaogā e teu ai le fanua. O lana pa uaea foi na faatau e sio ai le fanua na faaleagaina ona sa sua ese e le masini.
O le molimau a Taupa‘u e lē o se gaioiga na faia e iloa ai sa logo muamua atu o ia e aveese muamua meatoto ma le pa uaea ona faia ai lea o le galuega, ae na ona taunuu lava o le masini faatino loa.
Sa fesiligia Taupa‘u e le alii loia o George Latu o loo tulai mo ‘Ulu Kini ma isi matai e toafā pe aisea na lē usitaia ai e lē ua tagi le poloaiga a le faamasinoga e aua ne‘i toe faia se galuega i luga o le fanua. Na faailoa e le loia sa faaauau lava ona toto fa‘i o lē ua tagi e faapea foi i le fausia o se fale Samoa.
Na tali Taupa‘u o le totoina o fa‘i ma faamamā le vaega o le fanua o loo nonofo ai o se tulaga e tatau lava ona faatino ona o nai fa‘i e aai ai. O le fausia foi o lona fale Samoa, sa tuuina atu ai se malelega i le susuga i le Malietoa a o soifua e faaauau pea lona fausiaina.
Na faailoa foi e Taupa‘u i lana molimau o le teuina o le fanua o Vaialasa e ‘Ulu Kini ma nisi o lona aiga, e lei malie i ai le isi toafā i le Igoa matua le tofa ‘Ulu Bismarck.
O le faaiuga ua taoto ai nei le sailiga o le pule o le fanua ua toe fesiligia e ala i ni talosaga apili ua faaulu i le faamasinoga o fanua ma suafa.
Peitai o le aafia o meafoto ma le pa uaea a lē ua tagi o le mataupu lea o loo i luma nei o le faamasinoga maualuga. O le aso 6 o le masina fou o Iuni 2016 o le a tuuina atu ai finauga faaiu a loia ona aumai ai lea o se faaiuga i le faamaonia ma le lē faamaonia o le moliaga faasaga i le tofa i le Igoamatua ‘Ulu Kini ma matai e toafā o lona aiga e aofia ai ma se tasi o ona atalii.
E 14 tausaga i le falepuipui le faasalaga maualuga o le moliaga ua molia ai lea tamalii ma nisi o lona aiga, pe afai e faamaonia.
