Star Steven Luatua o le Blues

A o foufou le amataina o le taamilosaga o le Super 15 o lenei tausaga aemaise ai foi le toe filifilia ai o le Faiaoga-ulu o le Blues, faatasi ai ma nai faafitauli sa feagai ai ma le Blues, peitai sa foliga faaluafesasi le tumau ai o nisi o paaga e mulimulitai i faagasologa o le taamilosaga o lenei tausaga.
E oo mai lava i lenei taimi o loo tuufesili pea nisi i le tulaga finau o loo iai le Blues e ui ina faamanuiaina i nisi o ana taaloga o le taamilosaga talu ona amata, e oo lava foi i le tulaga o loo tulai mai ai le alii Faiaoga-ulu.
O isi ia vaega faamaliegata o tagata i le tulaga o loo mulimulitaia ai lenei taaloga aemaise ai lava i tagata ma paaga i le tapuaiga a le Blues lava latou. Ae ui lava i lea tulaga, e tasi se vaega faafiafiaina ua foliga mai ua taa‘ina nei i ai le lagolagoina o le Blues, ona o le tulaga maualuga ua vaaia i le tulai mai o le alii taalo ia Steven Luatua, o se alii taalo ua atoatoa i ai le tomai i le tulaga o loo ia momo‘e ai i le taimi o le taaloga aemaise lava i le laina i luma.
E manatu le toatele o alii atamamai i lenei taaloga o loo tulimataia le Super 15, tasi lenei o tama taalo e vaaia pea i vaiaso uma le siitia o lana taalo e lē gata i taimi o osofaiga i le puipuimauina lea o le polo, ae o le taimi o lineouts e oo lava i taimi e puipui ai osofaiga o le isi ‘au.
O le taaloga na se‘i mavae atu ma le Hurricanes, tasi lea o alii taalo i le laina i luma ua matuā lē toe fesiligia le maua o sona avanoa i le All Blacks i le mae‘a ai o le Super 15. O le tulaga foi lea o loo momo‘e ai Steven Luatua, masalo o se tulaga sa faigata i le alii faiaoga ona tau sailia se tasi na te faatumuina le avanoa lea ina ua tuua e le alii ia Kaino.
Na matuā faafiafiaina le pulega a le Blues i le tali atu a Steven Luatua i vaega tonu o le taaloga sa nofo lē mautonu i ai le alii faiaoga ma le pulega. E mautinoa o le alii taalo ua pito sili ona agai nei i ai talanoaga i lona tulai mai i le taamilosaga o le Super 15 o lenei tausaga, o le alii lea ia Steven Luatua.
E mataina tele le tomai o lenei alii taalo ma lona tulai mai i le Blues. Mai lava i le amataga o lenei taamilosaga e molimauina pea le agaigai i luma o le agavaa o lenei alii, e fia vaavaai i ai le aumaimoa i ona agavaa ma tomai, ma matagofie ai i le maimoa i le taimi o le taaloga ma soo se taimi lava e taalo ai.
O le a misia foi la i le faaiuga o lenei vaiaso le alii o Steven Luatua i matamataga o le Super 15 ona o le a lē taaalo le Blues i le faaiuga o lenei vaiaso. Tatou talosia lenei alii taalo ina ia tumau pea lona malosi ma le tomai e faatinoina ai le taaloga, ia siitia ai lona tulaga lelei o loo iai nei aemaise ai lava ina ia tauia lona tali mai e faamalieina le matamata a le tapuaiga lautele o le Super 15 o loo faaauauina pea, ae sili ai ona faamausaliina sona avanoa i le ‘au filifilia a lenei atunuu o Niu Sila, le All Blacks.