Ua sosoo foi le faasalalauina o faitioga a le atunuu lautele i le auaunaga a le Matagaluega o Leoleo i le toe tulai mai ai o nisi o lipoti ua fesiligia ai le tonu ma le faamaoni o i latou ua faaigoaina o Malu o le Malo.
E pei ona matauina o le tele lava o le galuega toe faalelei o le tele foi lea o le solitulafono, ua toatele foi le mamalu o le atunuu ma ua le ‘asa lava le vaiaso ma le tulai mai o tagata ua maliliu, o tagata ua maua i solitulafono o le tagofia ma le faatauina o fualaau faasāina, e lē gata i lea o faitioga i le auaunaga i totonu lava ia o le Matagaluega.
O le faitioga ua tele ai tusi lolomi, finagalo folasia i luga o le ea ma isi auala, o le faalavelave lea na tulai mai ma maliu ai se tamaitai i lona lava toalua a o loma ai le Lotu a Tamaiti.
O le tele o faitioga ona o le leai o se gaioiga na mafai e malu o le Malo e toalua sa i totonu o le taavale lea na tu ina ua sulu i ai le tina talavou lenei o Vaitele mo se fesoasoani.
O le faamatalaga a Leoleo i lo latou sui sooupu Leaupepe Fatu Pula, na ona tu lava o le taavale vaai atu o le tamaitai na tamoe atu ua i luma o le taavale ae sasau atu loa le agaese i ona tua ma alu ai le tau‘au se‘i tulou o le tina lea, sosoo ai ma isi osofaiga a lona toalua lea na lavea ai le isi ona lima a o tau pupuni ona foliga, alu ai ma foliga o le tina i manu‘aga ogaoga mai i le agaese se‘i tulou lava le au faitau.
O le mau a le taitai leoleo ina ua tāpā sona finagalo, e mautinoa lava ua oo leoleo ia i se tulaga matuā faateia ma ua faigata ai ona fai se gaioiga e tali atu ai i le alii na faia lenei faalavelave.
O nisi o tuaoi na taufetuli ane na mafai ona sola ese ai lenei alii ae o ese ai loa leoleo mai totonu o le taavale ae oo atu i le tina ua tuai ona o le tele o le palapala alu se‘i tulou, ma ua ogaoga tele ona manu‘a.
O le faitioga talu ai, o i latou nei ua tatau ona iai a‘oa‘oga e mafai ona tali atu ai i faalavelave tutupu faafuasei sa tatau lava ona iai se tali atu i le tina ua sulu atu i se fesoasoani.
O le faamatalaga a tuaoi ma i latou sa i luma o le faleoloa ina ua tulai mai le faalavelave, o le itu lea ai ana sulu le tina lea i le maota o le fesoasoani i autafa ane, ai e faasaoina lona soifua.
O le isi faitioga ua aafia ai tuuaiga o le taumafai o se alii faipule, le Afioga Vaeolenofoafia Tapasu Leung Wai e faalafi se pagota ua tele masina o saili e leoleo. O le faaseā tele lava ua fofogaina e le atunuu ona o le po na oo atu ai Leoleo i le maota o le faipule na faatonu ane ai e le alii faipule e faitalia ia ma toe momoli ane le pagota i le Ofisa o Leoleo.
Peitai e toe tulituliloa atu e Leoleo i aso na sosoo ai poo fea le pagota, ua malaga ese le alii faipule mo taaloga a Malo o Le Taupulega, auā o ia le isi taitai o le SASNOC le Komiti e pulea taaloga a Samoa ma le sui o le Komiti o taaloga a le Olimipeka i Samoa, ae ua leai foi ma se pagota lea na faatalitali le momoli ane.
O le faitioga tele lava, o ai ea e faalogo i ai leoleo, e tatau ona tutoatasi lava le pulega a leoleo i le faaiuga fai i nei ituaiga mataupu ma e tusa lava pe faipule le tagata, o le tulafono e i luga atu lana vaavaaiga na i lo se isi lava tagata i totonu o le malo ma le atunuu o Samoa.
Sa tatau foi la e pei ona iai nei finagalo faaalia, ona aumai lava e leoleo i le po na oo atu ai i le maota o le alii faipule le pagota, ae ua tuu i le finagalo o le faipule. Ua tālia nei la se tali mai a le afioga a Vaeolenofoafia i lenei mataupu.
Ua iai faitioga faapea na vaaia Tagaloasa Filipaina i lona aiga i Nofoalii i le po o le Aso Tofi a o loma ai le Lotu a Tamaiti. O le faamatalaga a Leaupepe Fatu Pula, e lei iai se mea faapea na tupu.
O le mau a tusitala o le Leitio Polenisia na logo atu le leitio e nisi o lea afioaga ma ta‘u atu ua tatala i tua Tagaloasa Filipaina ma na toe piki e leoleo i le aso na sosoo ai i le taavale a Leoleo.
E lē o faamaonia mai e Leaupepe Fatu Pula lea lipoti ae na ia ta‘ua o le toatele o isi pagota e aofia ai le Leoleo Sinia na faato‘ā taofia atu nei i moliaga o sauāga matagā, na ave i ai le faatagaga e fai Lotu a Tamaiti i o latou aiga, o se faiga na ta‘ua e le Komesina Lagolago e tatala ai lava le toatele o pagota i tua e mafuta ma fanau.
E na o tagata o loo taofia i le talepe fale ma le gaoi e faigata ona tatala i tua ina ne‘i toe solitulafono ai foi i taimi ia e tatala ai i tua.
Faaalia e Leaupepe Fatu Pula, o loo taumafai lava le vaega o suesuega a leoleo lava ia aemaise le Pulega ina ia faaaogā faitioga ua oo mai i le atunuu, ae o loo faia foi galuega ina ia faalautele atili ai le tomai ma le malamalama o leoleo i le faatinoga o le latou galuega.
Ua iai aoaoga na faatautaia i le vaiaso na tea nei i tulaga tau i pulega lelei ma le faamaoni.
O loo faaauau aoaoga o loo faatautaia ia i latou ua sauni e avea ma leoleo i le lumanai lea o loo faatautaia i le Iunivesite Aoao o Samoa, ma o loo faia foi suesuega i soo se leoleo lava o loo ta‘ua mai le fai o ni uiga lē talafeagai ma le tulafono.
O le faamoemoe na ta‘ua e Leaupepe o nei taumafaiga ina ia taofia le toe tulai mai o lape ma faaletonu ua vaaia ma lipotia atu i le tautua a leoleo.
Ae na ta‘ua e Leaupepe, e moomia tele le lava papale ma le malamalama o le atunuu, i lenei vaitau o le saputu mai ai o faafitauli o feagai pea ma leoleo i le faatinoga ma le faamaoni o o latou tiutefai.
