O loo tau sailia nei e le lalolagi se vaifofo o le faama’i o le Koviti-19 poo le coronavirus ae o lea foi e sailia e le Pulega o le Tineimu le mafuaaga o le sosolo ai o le faama’i lenei o le mu i totonu o Samoa. O le lua vaiaso talu ai na mu ane ai le maota o le Minisita o Tupe Maua ma le Ofisa o Tiute, le Afioga ia Tialavea Tionisio Hunt i Siusega lea lava e oo mai i le taimi lenei e lē o mautinoa lava le mafuaaga o lenei faalavelave.
Ae o le taeao o le Aso Tofi na tea nei na mu ai foi se tasi o ogaumu e tao ai popo a le fale suauu o le Pacific Oil i Nuu, sosoo ai ma le mu tele lea na aafia ai se tasi o ofisa o le Malo i Mulinuu. Pe tusa o le latalata i le 1pm i le aoauli o le Aso Tofi lava na faate’ia uma ai le tele o ofisa ma fale faigaluega i Mulinuu ina ua sasao ane ai le afi tele i le ofisa o le Pule Faatonu a le Malo poo le Regulator. O le ofisa lenei o le Malo e tuaoi ai ma le Ofisa Faasalalau o le Fale Televise o le TV1 Samoa i totonu lava o le lotoā e tasi. E taunuu atu le vaega o le tineimu ua tele ina sosolo atoa le mu i le tele o vaega o lea ofisa ma faafaigata ai ona taofi le sosolo o le mu. O le mu lenei na faato’ā iloa e le aufaigaluega a le Regulator ina ua tamo’e i ai se tasi o le aufaigaluega a le TV1 Samoa ma logo i ai le sasao ane o le mu. E lei mafai e le aufaigaluega a le Regulator ona sopoia le faitotoa i le pito i luma o le latou ofisa ona na amata mai i le pito i luma lenei mu. E lua ni taavale a nisi o le aufaigaluega a le Regulator na faaleagaina uma ai i lea mu faatasi ai ma le taavale e tasi a le ofisa o le Regulator.
E latalata i le sefulu taavale fuimu na taumafai e tineia lenei mu tele peitai na uma lelei suavai mai tanevai o nei loli fuimu ae e lei mafai ona pē ai, lea na faaaogā ai loa le suasami mai le sami e pei ona toso i ai faagaau a taavale fuimu. Saunoa se tasi o le vaega a le tineimu, ua laki le sami ua sefe atu ai ma le ofisa faasalalau o le TV1 semanu e oo mai i ai le ma’ema’eā o le afi. E oo mai foi i le taimi na tuufaatasia ai le tatou lipoti e lei maua mai se mafuaaga o lenei foi faalavelave.
E pei ona silafia e le atunuu e tulai mai ai o lenei faalavelave i le ofisa lenei o le Pule Faatonu poo le Regulator, ae o loo faatali pea se faaiuga a le Komisi e Pulea Tagata Faigaluega a le Malo e faatatau i le mataupu e pei ona faamālōlō lē tumau ai nei le latou Pule Sili, susuga Lefaoalii Unutoa Auelua-Fonoti.
Faamaonia mai foi e le Minisita o Fesootaiga ma Auala Faatekonolosi, Afioga ia Afamasaga Rico Tupai le see atu ai lea o le aufaigaluega a le Regulator i le fale o le Leitio a le Malo, le 2AP e faatautaia ai a latou galuega mo le taimi nei.
O le ofisa lenei o le Regulator, o se tasi lenei o fale tuai o le Malo mai le vaitau o Siamani, o le fale foi lenei sa nofo ai le Kovana o le Malo o Siamani i le taimi na pulea ai e Siamani Samoa, sosoo ai ma nofoaga e faimalologa i ai le Ao Mamalu o le Malo, le susuga Malietoa Tanumafili II, ona avea ai lea ma ofisa o le Fale Televise o le TV1 Samoa a’o pulea ai e le Malo. O le ofisa o le Pule Faatonu poo le Regulator sa o latou faaaogā mulimuli ai lenei fale ua malala uma i le afi.
O le tulai mai ai o nei mu e tolu i le masina e tasi ua fautuaina malosi ai e le Pulega o le Tineimu le atunuu ina ia mataala ma aua le faatamala i le taimi lenei ona o le paa’ā o le susulu o le la ua tele ina mamago uma ai lapisi ma le vao, ia faaeteete foi i le soona lafoai ai o mulisikaleti. Ia mataala foi i le faaaogāina o oloa e alu i le eletise e pei o auli, tipoti, falai ma isi oloa, ia mautinoa e tapē lelei pe a mae’a ona faaaogāina.
O loo iai le faamoemoe o le Tineimu e tatau ona mae’a tuufaatasia se lipoti o a latou suesuega e faatatau i le mu ai o le Ofisa o le Regulator i le vaiaso lenei.
