O loo molimauina pea le laalaa i luma o le soifua saili malo o nai o tatou tagata i atunuu o loo aumau ai, e lē gata i tulaga i aoaoga ae o vaega tau i pisinisi ma alamanuia o Samoa.
O le afiafi o le Aso Lulu ua mavae, 26 o Novema na tatala aloaia ai le auaunaga fou a le Samoa NZ Finance i Manukau. O lea tautua o loo lagolagoina ma galulue faatasi ai nisi o faipisinisi iloga i totonu o Samoa ma o i latou foi o se auuso, le afioga ia Faamausili Andrew Ah Liki, Lemalu Ray Ah Liki, Taimalie Charlie Ah Liki ma Lucky Ah Liki. O i latou uma nei o alo o se tasi o tamā faipisinisi iloga i lona foi vaitaimi, le susuga Mani Westerlund.
O le anavatau a lenei kamupani mai Samoa o se auaunaga e toomaga i ai le atunuu o loo aumau i Niu Sila i faalavelave fai o aiga i ituaso ua lē tagolima ai Niu Sila ma Samoa i ni seleni e manaomia.
O le afioga i le Palemia o Samoa, Hon Tuilaepa Lupesoliai Sailele Malielegaoi na ia ootiina le lipine, ae o Father Vilo Hansel na saunia le tatalo e amata ai lenei faamoemoe. Sa auai foi le Fofoga o le Fono, Hon Laauli Leuatea Polotaivao Fosi Schmidt, o nisi o minisita o le Palemene faatasi ai ma sui faipule o le kapeneta.
Na molimauina foi le auai o le Konesula Aoao o Samoa i Aukilani, le afioga ia Faolotoi Reupena Pogi, faapea le Komesina o faafetauaiga ia Fonoti Dr Lafitai Iupati Fuatai, ma nisi o faauluuluga o kamupani ua mafai ona faipaaga ma le Samoa Finance.
O le saunoaga a le tamā o le atunuu na ia ta‘ua ai se feau momoli mo le au faipisinisi uma o Samoa. O lea feau, ‘ia aua le pupū i fale, e iloa gofie le Samoa e telē le loto toe poto, i lona sosofa o pa puipui e aea gata o loo fai ma fatiātama‘i ma tupu ai le agaga musuā e faatu le pisinisi fou i atunuu i fafo ma tauva piitino ai ma i latou na mua i malae.’ O le afioga ia Faamausili Andrew na fai ma sui o nei auuso faapisinisi e talatalaina ni vaega o le a agai i ai lenei tautua.
O le mae‘a ai o le ootiina o le lipine na tatala aloaia ai loa le mamalu o le auvalaaulia e maimoa i totonu o le fale, ma faaiu ai loa i se taumafataga na saunia lava e le Samoa NZ Finance. Sa faapea foi ona faafiafia le mamalu o Samoa potopoto e le ausiva a le Tatau Dance Crew ma le ausiva a tamaitai o le Embrace.
O le Fofoga o le aso o le susuga ia Luamanuvae Sefo ma o ia foi ua faauluulu i ai lenei auaunaga fou i totonu o Niu Sila. Na faaiu polokalame o le aso i le tufatufaina o meaalofa teutusi mo le afioga i le Palemia faatasi ai ma le auvalaaulia.
Ua amata nei le tautua fou a le Samoa NZ Finance i Manukau i le aufaigaluega e toatolu ma le faamoemoe o le a toe faaopoopo nisi tagata faigaluega i se taimi e lē o toe mamao.
