O se vaega oloo matauina pea i faaiuga o suesuega i aoga tulagalua, i le tele o tausaga, o le maualalo lea o le taumafai o tamaiti Maori ma tamaiti Pasefika, i tomai tāua o le faitau tusi, e iai le iloa, poo le lautele o utuvagana, malamalama i fuaiupu ma parakalafa, ma faasolo atu ai loa i le malamalama i tusi, ma tala e faitauina. E tāua le faitau ma malamalama.
O ni tomai sili ia e sili ona manaomia e tamaiti ona e faaaogaina i mataupu uma oloo aoaoina ai i le aoga i soo se laasaga o le taumafai.
A iai ni auala e faaaogāina e le tamaitiiti e malamalama ai i lana faitautusi, o le faigofie foi lea ona maua ni ona manatu e faataunuu ai se galuega faatonuina, ma maua ai mafaufauga e mafai ai ona faafesootai tomai mai le isi mataupu e malamalama lelei ai i le isi mataupu.
O nei vaega e tatau lava ona tatou mataituina, ma fesiligia ai faiaoga, poo a mai le faitautusi a si au tama. Afai o faaletonu, fesiligia auala e faaleleia ai, ae afai o solosolo lelei, fesiligia se fesoasoani ina ia faaleleia atili.
O nei lava vaega oloo avea ma faavaatu‘ia i taumafai o nai fanau, auā afai e le lelei le faitau, e le mafai ona malamalama pe a manaomia le faitau o se tusi e faataunuu ai se galuega faatonu o le faasaienisi, ma oo ai ina le faataunuuina, ma afaina ai i le aoga.
O le mafuaaga lea o le tia‘i aoga o nai isi tamaiti, ma faasolosolo atu ai lava ina le toe fia foi i le aoga.
E iai taimi e faafiafiaina ai tatou i le saoasaoa ma le sosolo lelei o le faitau a le fanau, peitai o le tāua, o le faitau ma malamalama i le uiga.
E taua tele lava le manatu o le alii tusitala lauiloa oloo lagomau nei i Samoa; “O le utiuti o lau utuvagana, o le pu moomoo foi lea o le lalolagi e te ola ai.” [Robert, L. Stevenson].
O la tatou gagana e matua ‘oa i alaga‘upu, muagagana, gagana faatusatusa, ma gagana valiata.
O vaega ia oloo faigata ai ona malamalama nai fanau, ona e manatu, ai lava na o le gagana faaperetania e maua ai. Ao nei vaega eseese o gagana, tou te soifua, ma tatou ola ai i aso fai pea.
Faataitaiga; a faalogogata le tamaitiiti ona faapea lea, “Ia alualu lava si ou napia sei omai le toeaina ma le loomatua.” “Ua e toe agi foi la o le a, ae le sei fai lava lou fia ulavale.” “Ou te alu atu loa ai lau manini.” “O le tele o lima e mama ai se avega.”
A malamalama lelei nei faaaogaga eseese o le gagana i la tatou lava gagana, e faigofie ona malamalama ai le tamaitiiti i le gagana faaperetania.
E le gata i lea, o upu o pese e fiafia i ai ma oloo aoina i taimi o faafiafiaga. Fatuga a le susuga i le faafeagaiga o Lale Peteru, e tumu i gagana faatusatusa ma gagana vali ata. Gagana faatusatusa; “Pei o auma e le fiu i fafati o‘u nei mata e le fiu i vaai”. Gagana vali ata; “Aue le alofa ua tauaso i le maasiasi”.
Ae a tuu mai foi i le Tusi Paia, toeitiiti uma le Faataoto ma le Salamo ona tauloto ma tulafono. “Ia e ava i lou tama ma lou tina ina ia faalevaleva ai ou aso.”
Afai la tatou te faaaogaina nei vaega uma ina ia malamalama lelei ai le fanau i uiga o upu, o upu e tutusa uiga, o uiga faafeagai ma faaaogā a latou lava upu, ua matuā tele lo tatou sao, mo le agai i luma o le taumafai o le fanau. Ma ua faigofie ai foi ona latou faaaogaina ia tomai ma iloa, e fesoasoani ai ia i latou i totonu o aoga.
Oloo tele lava ni galuega oloo faatinoina nei e le Ofisa o Aoga ina ia galulue faatasi ai ma matua, tagata lautele, ma ekalesia, ina ia siitia le tulaga o aoaoga a le fanau i totonu o aoga, ona e manaomia le fesoasoani, e fuafua ni auala e galulue faatasi ai mo le faaleleia o le faitau tusi a le fanau. Ua faigata lava le tulaga o aoaoga i lenei foi vaitau, ua manaomia ai le galulue felagolagomai, ma le fefaasoaai, ina ia manuia nai fanau.
O le vaega sili lea ona manaomia ai le fesoasoani e galulue faatasi ai, o le faaleleia lea o le faitautusi ma le matematika a le fanau, ona ua matauina, afai ae lelei nai fanau i ia vaega, ua faapea foi ona faigofie mata’upu uma e aoaoina i aoga.
O lenei lava seneturi ua tatou iai, ua talafeagai ai upu a nai o tatou tuaa i le gataifale, “A afatia i le vasa, lafoai utavale, ae soo-maea-le-fua”. Manuia tele fuafuaga o lenei vaiaso.
