Soofaatasi Faifeau Ekalesia Samoa Eseese

‘Se mea ina lelei ma le matagofie o uso ae nonofo fealofani’

O momooga ia o le faisalamo na faataunuuina ina ua amata le mafutaga soofaatasi a faifeau Samoa mai Ekalesia eseese i lenei tausaga.
O le masina o Setema i tausaga taitasi e faataunuuina ai lenei mafutaga ua faaigoaina o le Samoan Pastors Network International, lea ua atoa nei le 9 tausaga talu ona amataina.

Na talimalo le susuga i le faafeagaiga o Uilisone Taito ma le faletua ia Tepa, o le Voice of Christ i Mangere i faifeau mai, Samoa, Amerika, Hawaii, Amerika Samoa, Ausetalia faapea ma Niu Sila. E silia i le 200 le aofai o i latou na auai, ae tusa ma le valusefulu ma ona tupu le aofai o ekalesia eseese.
I le saunoaga amata a le taitaifono, le faafeagaiga ia Iliafi Esera na ia ta‘ua ai e faapea, “O le tāua o le sootaga a faifeau, ina ia foi le faifeau i lana ekalesia ua toe faamalosia”.

O le tofa mamao o lenei mafutaga, e pei ona otooto mai e le susuga ia Iliafi e faapea, “O se siosiomaga e amata ai faigapaaga mo ta‘ita‘i poo faifeau”, “Ia aveese le agaga tauva ma le faamaualuga”, “Ia tausisi i le alofa i isi uso”, “Ia amataina ai avanoa mo le faaaogāina o meaalofa a le Atua, mo le lelei o isi”, “Ia fetufaai ai meaalofa ma faamanuiaga o le tasi i le tasi”, “O se siosiomaga e saunia ai augatupulaga fai a‘e”, ma isi.

Na laualuga i le tele o lauga, le tāua o le faalogo i le siufofoga o le Atua aemaise le faatali i se upu mai le Atua, atoa ai ma le faatāuaina o le iloa lava o le faifeau ia o lona valaauina ma le finagalo o le Atua mo lona faasinomaga i lana galuega. Auā e lē tutusa meaalofa, e lē tutusa valaauina, ma le finagalo o le Atua i tagata taitoatasi.

O nisi o saunoaga ma faamalosiau mai ia i latou na folafolaina le Upu: “E tasi le mea e moomia e oe … o le nofo i vae o Iesu, ma faalogo i lana upu”, “E tasi lava le upu e te moomia mai ia Iesu”…Pastor Mabel Magalei, White Centre Community Church Seattle USA.

“E avatu e le Atua ia te oe se ata, se miti, se visiona, ia faatuatua ma manatua le ata ua avatu e le Atua”…Pastor Chris Sola, Dream Centre Auckland NZ.
“E toe faaminoi e le Atua mea mamago, ona o le upu … tautala faavaloaga i ai”…Pastor Uilisone Taito, Voice of Christ NZ.

“Afai o e agai i totonu o le ana, pe nofo i totonu o le ana, pe ua sau i fafo ma le ana…poo le ā le tulaga o iai oe, o loo manao le Atua e talanoa atu ia te oe”…Pastor Solomona Mageo, New Life Long Beach California USA.
“E gaioi le Agaga Paia i luga o le Upu…a lē a‘oa‘oina lelei faifeau i le Upu, e faaseseina i tatou”…Pastor Livisitone Toelupe, Samatau Community Church Samoa.

“Ou te nofo i le fale e miliona lona tau, o la‘u taavale o le ituaiga pito sili ona fou, o ia mea o le ‘ai o le matagi, e pau le mea ou te saili ma sili ona naunau i ai, o lo‘u lagona o le fetalai mai o le Atua, ma le saunoa mai o le Atua i sana upu ia te au”…Pastor Kuki Aloalii, Livingstone Ministries, Auckland NZ.

“E lē o le taulaga, a o lou iloa o a‘u o le Atua”…“Faaaloalo ma amanaia lē o loo saunoa mai”…Pastor Alesi Unoi, Peace Chapel Apia, Samoa.
O upu faamalosi a le taitaifono i le faaiuga o le sauniga mulimuli i le po o le Aso Faraile na ia lapataia ai, o aso e gata ai o loo tatou ola ai nei, o le fale, o le mauga o loo galulue faatasi uma ai mo le atinaeina o le malo o le Atua, e tatau ona iai lona faavae, lona tino, ma lona ufiufi, a lelei ona fau le fale, e saogalemu i latou o i totonu.

Na faalauiloa foi e le susuga Iliafi Esera, o le po o le Aso Gafua pe a mae‘a le Aso Sa o Tama ia Setema 2011, o le a amataina ai le mafutaga a faifeau o le 2011 i Samoa, lea o le a talimalo ai le Peace Chapel i Vaimea.
O lenei sootaga a faifeau Samoa o loo faauluulu i ai le susuga ia Iliafi Esera, Chris Sola, Samoa Unoi, Andy Forsgren, Dan Magalei ma David Katina.