O le tausaga muamua lenei ua faataunuuina ai i Salafai le tauvaga o le Miss Samoa. Ae se taligamalo foi na momoli mai ai e Salafai se feau i le Malo, ua gafatia foi e Salafai ona talimalo i le Teuila ma isi faamoemoe tetele o le Malo. O teuga o nuu ma afioaga, o le sagisagi fiafia o tagata sa molimoli mai ai lagona lelei i tamaitai e to’aiva na tausinio i le pale o le Tausala o Samoa, saili ai se isi e sui tulaga ia Alexandra Iakopo lea sa tu maualuga lona tauaveina o le Tausala Samoa mai le tausaga ua mavae seia oo mai i le tausaga lenei 2018.
O tamaitai e to’aiva na tauva e aofia ai Dolores Cassandra Satiu Cufi (Miss Salimu Fagaloa), Lanuola Giselle Tuiletufuga Price (Miss Samoa Melbourne), Norah Lio Setu Aloianai (Miss Samoa Victoria), Levalasi Vivian Su’a (Miss Le Naumati Creations), Georgina Mulipola (Miss CCK), Erin Noelani Taefu (Miss Samoa Australia), Christie Retalila Temareti (Miss Samoa New South Wales) ma Cecilia Tufuga-Fatu (Miss Samoa New Zealand) ma le tamaitai o Sonia Piva (Miss Susana o Samoa). E ui i le agaga tausinio na maitauina i tamaitai uma e to’aiva, peitai o Sonia Piva ma Cecilia Tufuga Fatu na agai iai matematega a le toatele. O faailoga faapitoa, o Dolores Cassandra Satiu Cufi (Miss Salimu Fagaloa) na malo i le Miss Personality, a’o Levalasi Vivian Su’a (Miss Le Naumati Creations) na manumalo i le Miss Photogenic, Best Sarong, Best Traditional Wear. O le Miss Internet na malo ai Georgina Mulipola (Miss CCK), ae o le taleni na malo ai Cecilia Tufuga Fatu (Miss Samoa New Zealand). O le interview na malo ai le tamaitai o Sonia Piva (Miss Susana o Samoa).
I le tuufaatasiga na tulai mai ai Erin Noelani Taefu (Miss Samoa Australia) i le tulaga lima poo le forth runner up, Christie Retalila Temareti (Miss Samoa New South Wales) i le tulaga fā poo le third runner up, Levalasi Vivian Su’a (Miss Le Naumati Creations) i le tulaga tolu poo le second runner up ma Cecilia Tufuga Fatu (Miss Samoa New Zealand) i le tulaga lua poo le first runner up. Ae o le Tausala o Samoa 2018-2019 na tulaga muamua pe manumalo ai le tamaitai o Sonia Piva (Miss Susana o Samoa). O Sonia Piva o se alo e faasino ia Maria ma Terry Piva o Salelesi ma Fagalii, ae o loo aumau ma alaala i Ausetalia. Na faaalia e le tausala faapaleina o Samoa lona agaga fiafia ma le faagaeetia ina ua manuia lona taumafai. Na ia ta’ua foi o le avea o ia ma Tausala o Samoa, o se miti ua taunuu.
O le tamaitai o Sonia Piva, sa talimalo ai le susuga i le faafeagaiga ia Rev Samuelu Areta ma le faletua ia Pativaine ma le Ekalesia Metotisi a Salelologa i le vaiaso atoa sa faagasolo ai tapenaga o le tauvaga i Salafai.
