Ua faaumiumi le tetee a tagata faigaluega a le kamupani a le Pacific Catering i le malae vaalele i Aukilani, talu ai le olegia pea ma le faagutugutulua o le Faatonusili ma le pulega i folafolaga sa faia.
O le manaoga sa momoli i ai e le aufaigaluega, o le manaomia lea o le suia o maliliega poo konekarate faigaluega.
O le taimi nei o loo faaauau pea ona faafou konekarate, peitai e lē o maua le mea tonu sa talosagaina muamua.
O maliliega o loo iai nei o ni konekarate tuufaatasi, peitai o loo finau le aufaigaluega ua tatau ona faataunuu folafolaga sa talanoaina i le tele o tausaga ua mavae, e ala i le sainia o ni maliliega taitoatasi mo tagata uma taitoatasi.
Ua savalia nei le lua vaiaso o loo faatino pea le tetee a tagata faigaluega e faasaga i le kamupani, ma e lē o solomuli foi i le faaauauina pea o le latou mau tauave, o le suia o konekarate faigaluega.
O le faaumiumi o le solotetee, talu ai e lei maua ane lava se tali ma‘oti mai le pulega a le kamupani.
O le solotetee o loo matuā lagolagoina malosi e le iuni a tagata faigaluega, ma o sui mai le iuni, faapea ai ma sui mai isi kamupani eseese o loo faatinoina le tetee.
O lumafale tonu lava o le kamupani faapea isi tulimanu o le malae vaalele i Aukilani sa savalia ma faatino ai le solotetee.
O konekarate o loo faaaogāina nei e tagata faigaluega o lea kamupani, e lē o mafai ai ona aiaia ni totogi e maua i taimi o malologa, e lē mafai foi ona maua ni tupe ma totogi mo tagata pe afai ae tapunia faafuasei le kamupani, pe vāea le aufaigaluega.
I le ma le isi, o le leai lea o ni totogi faaopoopo pe a faigaluega sili atu ma itula faatulagaina.
Peitai o konekarate taitoatasi o le a mafai ai ona agavaa soo se tagata faigaluega i faamanuiaga ma totogi e pei ona ta‘ua i luga, lea e lē o mafai ona mauaina i konekarate o loo umia i le taimi nei.
Sa faamaonia mai e le sui sooupu o le iuni, faapea foi se tasi o tamalii Samoa o loo faauluulu i ai le solotetee i se feiloaiga ma le Samoa Times, ua fai si umi tele o faatali tagata faigaluega i folafolaga sa fai ane e le kamupani e faapea o le a suia maliliega e pei ona sa faatalosagaina.
O le umi tele ona faatali, ua tauau ina solomuli ai ma le onosai, ma lē toe talitonuina ai le pule ma le pulega, ma o le ala lea ua tāpā ai loa le iuni mo se fesoasoani.
O le mafuaaga foi lea o le faia o le solotetee, se‘i tau tulei ai le mau ma faatiga taliga ai pea i le kamupani, ma le faamoemoe o le a vave ona tali ane ai le manaoga.
Na faamaonia mai foi e le sui o le iuni e faapea, ua mae‘a nei ona faaulufale i le faamasinoga le tagi a tagata faigaluega faasaga i le Pacific Catering, ma o loo tālia nei se taimi o le a fofogaina ai le mataupu.
O le kamupani lenei o loo feagai ma le gaseseina o taumafataga mo pasese i luga o vaalele. O vaalele tetele e mafuli i ai la latou auaunaga, o kamupani vaalele a le atu Asia. O le Singapore Airline, Malaysia Airline, China Airline ma isi o loo kukaina e le Pacific Catering taumafa mo taimi o faigamalaga.
E fai lava foi si toatele o tagata Samoa o loo faigaluega ai i lea kamupani i le malaevaalele faavaomalo i Aukilani.
O se lipoti mulimuli mai le susuga ia Vaa Ng Kau, na ia faailoa mai ai e iai nisi o le aufaigaluega ua lē maua o latou totogi talu ai le solotetee, peitai ua mae‘a ona faatonuina e le iuni le kamupani ina ia toe faafoi ane totogi o tagata.
