Ua misia e le au lakapi taitoafitu filifilia a le Manu Samoa se tasi o ana tama faamoemoeina, a o sauni mo taaloga a Malo o le Taupulega i Initia i le masina fou, le susuga Uale Ma‘i, lea ua malaga i lana konekarate i Sepania.
O le vaiaso na tea nei na faamaonia mai ai e ofisa sinia o le Iuni Lakapi aoao a Samoa le faamavae o Uale mai le au taitoafitu a le atunuu ua uma ona filifilia i ai, ae malaga mo lana konekarate.
“E lē faigofie le faaiuga a Uale ona e lē gata o lana mafutaga ma isi tama o le ‘au, ae o lona lotonuu i le tapuaiga a Samoa, peitai ua faamuamua ia te ia se mea lelei mo lona lumanai”. O le finagalo lea o se tasi o le pulega o le au lakapi taitoafitu a le Manu Samoa.
“O se tasi o tagata e tausaafia i lana taalo ma fautuaga na te faalaeiauina ai isi tama o le ‘au a o faagasolo le taamilosaga talu ai nei a le IRB”.
O loo manatu nisi atonu ana lelei ni faamanuiaga tau tupe e ofo e le iuni lakapi a le atunuu mo tamafanau o loo tauaveina le igoa o Samoa i le au taitoafitu, semanu e faamuamua lava i filifiliga a tama le faamoemoe mo taaloga a Malo o le Tapulega mo se pine auro a le atunuu.
Peitai e lē o le lagona lea o le sui o le pulega o le iuni lakapi a Samoa sa fesiligia i sona finagalo.
“O le mea moni lava ia e lē taitai lava seleni a le iuni lakapi e tauia ai le tautiga o tamafanau a le atunuu, ae e lē mafai ona faatusaina le malolosi o Iuni Lakapi a isi atunuu mauoloa ma lelei le tulaga tau tupe, i le atinaeina o le taaloga i Samoa”.
O le faamoemoe o Uale Ma‘i ma lana konekarate i Sepania, o le 6 masina muamua lava o le a silasila ai i le tulaga o le a faatino ai lana konekarate, ona toe iloa ai lea o se isi fuafuaga mulimuli ane.
Faaalia e Uale i se talanoaga ma se tasi o alaleo leitio i Samoa, e tele le seleni ua ofo atu e le Iuni lakapi a Sepania mo le 6 masina muamua o lana konekarate, ae e lei mafai ona faailoa pe fia le aofaiga atoa o le tupe o le a ia maua i le konekarate. Fai mai se tasi o tusitala o taaloga sa ia faatalanoaina le alii o Uale, e sili atu le seleni o le a maua e lea tama lakapi lelei a le Manu Samoa i Sepania, nai lo seleni ma faamanuiaga ua faataoto mo le au mo taamilosaga faavaomalo aemaise taaloga a Malo o le Taupulega o le a faia i le masina fou o Oketopa i Initia.
O se tasi o finagalo faaalia o le Pule Sili o le Iuni Lakapi aoao a Samoa le susuga Su‘a Peter Schuster, talu ai nei ina ua taliu manuia mai le taumafaiga a le au lakapi taitoafitu a le Manu Samoa ma le siamupini o le taamilosaga a le IRB, na ia faailoa ai le ave o le faamuamua a le iuni i le manuia o tamafanau a le atunuu e maua konekarate i fafo auā o le sini lea o galuega i le atinaeina o le lakapi i le atunuu.
I nisi o lipoti o loo ta‘ua ai le igoa o le kalapu i Sepania lea ua saini konekarate ai nei le alii o Uale, o le EL Salvador Rugby Club. Ma i se faatalanoaga a nisi o failipoti ma le susuga ia Uale i Niu Sila lea ua toe talu atu i ai e sauni ai mo Sepania, na faamaonia ane ai e Uale, ua mautinoa uma ma mautū vaega taitasi o lana konekarate, ma ua faamalieina foi i laua ma lana avā.
E lei faama‘oti maia e le alii taalo le aofaiga o le seleni, ae na ia ta‘ua e lima fuainumera i tala Samoa lea ua saini ai nei lana konekarate.
O le a malaga faatasi Uale ma lona faletua ma si o la alo e toatasi, auā ua faamautu foi le fale ma le taavale mo latou, faapea ma isi uma pili ua mae‘a ona totogi, o aiaiga uma na o lana konekarate.
Foliga mai sa faatalosaga Uale i lana kalapu fou mo se avanoa e toe fia foi mai ai e taalo mo lona atunuu i taaloga a le Taupulega, peitai sa teena lana talosaga, ona e pa‘ū tonu lava foi i le taimi ua amata ai taamilosaga i lea atunuu.
