“Teena talosaga e soloa i le au fuefue Leota Ituau Ale”
Ua faatumauina pea ona alaala i Solosolo Leota Leuluaialii Ituau Ale o ona alo ma ona aiga uma, ina ua teena e le faamasinoga le talosaga a Alii ma Faipule o Solosolo e tafi ma faatulai ese lea tamalii ma ē uma na tupuga mai ia te ia.
Na faavae le faaiuga ona ua talitonu Alii ma Faipule, ua faasiliaupule ma le faamaualuga o Leota Ituau Ale.
E tele vaega sa tolaulau i le tala tusia a le nuu na faavae ai le latou faaiuga na faia i le masina o Novema.
E aofia uma ai ma nisi o faaletonu sa aafia ai lea tamalii i tausaga ua alu seia oo mai i le tausaga e 2005 lea na faatino ai le faiganuu a Leota ma ona aiga ma i latou e lagolagoina o ia.
O mau uma na tolaulau e le nuu na faavae ai le faaiuga e lei oo iai se upu a le faamasinoga, ae o le silasila a le faamasinoga o se faaiuga ua le tusa ai ma aiaiga o le Tulafono o Fono a Nuu le Village Fono Act o le tausaga e 1990.
O se faaiuga foi ua talitonu le faamasinoga o fanua ma suafa, ua aafia ai aia tatau o Leota ma ē uma e tupuga mai ia te ia e tusa ma aiaiga o le Tulafono Faavae o le Malo Tutoatasi o Samoa.
Na faaalia i le faaiuga o le faateaina o Leota ma ē uma e tupuga ma ia te ia, o se faaiuga ua aafia ai ma tagata e lei ola ma soifua mai, ma e leai se aiaiga faapea o iai i le tulafono faavae poo le Tulafono o Fono a Nuu.
O le suesueina o lenei mataupu na faaalia ai e Leota o tulaga uma ua toe lalaga mai e le nuu i mea na tutupu i futia ua sola, ua uma ona faia i ai ni faaiuga ma sa ia talia foi le togisala na tuuina atu.
O loo mauaa le talitonuga o lea tamalii o Solosolo e leai se sala ulua ma ogaoga ua talafeagai ai le faaiuga ua faia e faatulai ese o ia pe soloa i le au fuefue.
O le Tootoo na tu ma faasilasila ai le faaiuga na faaalia e Leota, e le talafeagai ona sa faatino ae o loo malaga i Niu Sila.
O le faaiuga ua taunuu i ai le faamasinoga, e le gata ina teena le talosaga a Alii ma Faipule, ae soloia ai ma le faiganuu a le Afioga Leota. Ua poloaina ai lea tamalii faapea le itu a Alii ma Faipule ina ia feiloai ma faalelei le nuu.
“E sau ao o nuu”, o le vaega mulimuli lea o faaiuga na tolaulau e le afioga i le Sui Peresitene, Fuimaono Nonu, o ia sa taitaia le laulau o Faamasino ma Faatonu na suesueina le mataupu.
Ua le faamalieina le itu a Alii ma Faipule i le faaiuga a le Faamasinoga ma ua faaulu ai le latou talosaga apili ina ia toe iloilo le faaiuga.
Ua faaalia foi e Leota o le a sei taliu i fanua e faatino le finagalo o le faamasinoga ua tuuina atu, ae o le a sauni e toe apili le vaega o le faaiuga ua soloia ai i le pule a le Faamasinoga lana faiganuu lea sa faamatalaina e Alii ma Faipule i le latou mau tusitusia o se sosaiete. E taofi le itu tagi, o latou o loo iai uma paia ma mamalu o le nuu i ona faalupega.
