O le faaiuga a le afioaga o Sili e soloa i le aufuefue lo latou Pulenuu ma le afioga Faumuina Faaolatane Tiatia Liuga ae toe o ni aso faia le palota tele a le atunuu, o se faaiuga e lei lapelapea ai le filemu o le faiga filifiliga a lea itumalo i Savaii.
“O le iuga a le matou nuu ua tapu ai ona toe ulufale ma tu fua atu i laua ua faia i ai le togisala ma ua tapu foi ona alala i totonu o le nuu,” o le finagalo lea o le afioga Le Tagaloa Pita o se tasi o sui tauva o Paluli le Falefa na toe faalēaogaina lona tulaga agavaa e avea ai ma sui faatu o le palota ina ua faamaonia i luma o le faamasinoga e ala i se talosaga na faaulu e Faumuina Faaolatane Tiatia Liuga, e leai sana monotaga o faia i le nuu o Sili.
O le Aso Lua o le vaiaso na sosoo ma le vaiaso na faia ai le palota na lau ai le iuga a le faamasinoga, ae o le Aso Faraile o le vaiaso lava lea fono le nuu o Sili ma faia ai le faaiuga ua soloa ai nei i le aufuefue Faumuina ma le Pulenuu.
Na faamatala le afioga i le Tagaloa Pita e lei iai i le fono a le nuu ae na logo mai o ia e faapea o le mafuaaga o le faaiuga ona o le tagi na ave e Faumuina i le faamasinoga lea na molimau ai le Pulenuu o Sili ma ia lagolago le autu o le tagi e lē o faia se monotaga a le afioga i le Papa (Le Tagaloa Pita).
“Sa fai i ai le nuu e alu e molimau e faamatala o le Papa e leai sana monotaga e faia e tusa o tu ma aga i fanua a lo matou nuu, ae ua alu atu fai lana molimau e sa‘o e lē o faia sa‘u monotaga”.
“Ua uma ona ou fesootai i lo matou nuu e aua ne‘i iai se mea e tupu i le aso o le palota ma ia toafilemu mea uma,” o le isi lea finagalo o Le Tagaloa Pita i le talanoaga ma le tusitala. O le talanoaga lea na faailoa mai ai e lea tamalii o le atunuu ua leva tausaga o avea ma faipule o Palauli le Falefa lea sa avea ai foi ma Minisita o le Kapeneta i faigamalo ua mavae, o le a ia toe luiina le aiaiga o le tulafono o faigapalota faasino i le monotaga i luma o le faamasinoga.
“E faailoga tagata le aiaiga auā afai o nuu e pei o matou e lē faia ni monotaga a Ao o Papa e lē talafeagai la ma le aiaiga o le tulafono o fono a nuu lea o loo manino mai ia amanaia e le tulafono tu ma aga i fanua a nuu o Samoa”.
“E faapefea la suafa tamaaiga e lē faia foi ni monotaga o lona uiga ua fai mai le aiaiga e lē mafai e matou nei e umia suafa ma tulaga maualuluga o nuu ma itumalo ona tauva i palota a le atunuu”.
O le mae‘a o le faigapalota a le atunuu aoao i le Aso Faraile na tea nei e leai ma ni vevesi na tulai mai e pei o nisi palota ua mavae na taualuga i le sunui o fale o nisi aiga o nuu, lea na taualuga ai foi le palota a Palauli le Falefa i se tasi o faigapalota ua tuanai i le susunu o le faleaoga.
