Solitulafono Leota Ituau Ale

I le 68 o tausaga o le soifua o le afioga Leota Leuluaialii Ituau Ale, ua toe faamaonia ai ni ona moliaga faasolitulafono o lona lē usitaia lea o le faaiuga a le Faamasinoga o Fanua ma Suafa i Mulinuu na fofogaina i le aso 15 o Tesema 2009.

O se faaiuga na soloia ai i le pule a le faamasinoga le faiganuu a Solosolo-uta e ta‘ita‘i ai le afioga i le Faasisina. Sa poloaina ai foi Leota Ituau Ale ma i latou o loo lagolagoina lana faiganuu ina ia feiloai ma le itu a alii ma faipule ma faia se leleiga e toe teuteu ai ni faaletonu ua va ai le fogavaa.

Peitai i le mae‘a ona su’esueina o molimau a leoleo ma molimau a le itu tetee, na taunuu ai le Faamasinoga Faaitumalo i lana faaiuga e faamonia moliaga e lua o le lē usitaia o faaiuga a le faamasinoga (contempt of court).

E faasino lea i le Talomua na faia e Leota ma lana faiganuu i le aso 18 o Tesema 2009, le faaeeina o ni suafa matai poo ni saofai, ma le auai i le momoliina atu o le faifeau Metotisi i le masina o Aukuso o le tausaga nei.

O le itu a leoleo na faia moliaga e mafua i se faatonuga a le Faamasinoga o Fanua ma Suafa, e mafua i se tusi a alii ma faipule o Solosolo ona ua lē usitaia e Leota ma se isi vaega o le nuu le faaiuga na faia ia Tesema 2009.

Ae sa finauina e Leota i lana molimau e faapea sa ia tusi atu i le Peresitene o le Faamasinoga o Fanua ma Suafa ina ia faapafala ma faataatia ese le faaiuga lea, ae se‘i faaulu atu lana talosaga apili e toe iloilo ai le faaiuga ua faatonuina ai le soloia o lana faiganuu.

Na faaalia e Leota i lana molimau, sa iai lona manatu sa talia lana talosaga lea e le Peresitene. Sa ia ta‘ua foi na te lei maua se tusi mai le Peresitene e faatatau i lea tulaga, poo se tusi foi na faailoa atu ai ua lē talia lana talosaga.

I faamaumauga na tuuina atu e leoleo i luma o le faamasinoga na faailoa ai se tusi a le Peresitene na ave ia Leota na logoina ai le lē talia o lana talosaga ina ia faapafala le faaiuga (stay of proceedings).

Ma sa teena ai le mau a lē ua molia e faapea na te lei maua se tusi. I le faamaonia ai o moliaga o Leota Ituau Ale, na talosaga ai lana loia ina ia faia e le faamasinoga se faasalaga talafeagai. Sa talosagaina foi e le tamaitai loia o Leilani Tamati le alii faamasino o Te‘o Richard Tapeni Faai‘uaso, ina ia faapafala se faasalaga o lē ua molia e aunoa ma le faamaonia o sana solitulafono lea e ta‘ua o le discharge without conviction.

Peitai ina ua fofogaina le faaiuga na teena ai lea vaega o le talosaga a le tamaitai loia, ona na saunoa manino le alii faamasino, e lē faigofie i le faamasinoga ona soona faaaogā lea aiaiga o le tulafono, pe a fua i moliaga o Leota o lona lē usitaia ma lona lē faaaloalo i le faaiuga a le faamasinoga ua mafua ai ona tuuina atu moliaga.

O le tasi o ona moliaga e $500 tala lona faasalaga ae o le isi e $250 tala, ma a tuu faatasi e $750 tala. Ua poloaina ai Leota ina ia tatau ona totogi uma lea vaega tupe i le aso 22 o Oketopa 2010. A oo atu i le aso lea e lei faia, o le a tuuina atu loa o ia i le falepuipui mo masina e 3.