“Ua mae‘a ona saini le maliega a lenei aiga ma sui o le kamupani”, Pauli Taulapapa Sefo
E toasefulu sui o suli o Pauli Taetafe e alaala i Niu Sila na malaga mai i Samoa i le vaiaso ua mavae i le fia faasa‘oina o le maliega na sainia e le tofa Pauli Apelu ma isi matai e toasefulu o Salelologa mo le faatauina atu o le maketi tuai, ma le lisiina o le eleele o iai le maketi e lē o toe faaaogā, mo galuega o le aoina mai o le fua o le laau o le nonu mo le kamupani o le Reef Group i Niu Sila ma le Pure Pasifika i Vaitele-tai.
“Na lagona e lo matou aiga le faanoanoa tele i le sainia e ni matai e leai se latou aiā i le eleele o le maliega, ma ua uma ona faasa‘o o matou e iai le pule o le fanua”. O le finagalo lea o Pauli Taulapapa Sefo o se matai o se suli o Pauli Taetafe o loo lesitala faaletulafono ai le eleele lea e tusa lona telē ma le sefulu eka. E na o le lua eka le fanua o loo manao le kamupani nonu latou te lisiina faatasi ai ma le faaaogāina o le fale sa iai le maketi.
Ua faaalia e Pauli Taulalapapa Sefo, o le Aso Lulu, 7 o Setema 2011 na sainia ai le maliega o lo latou aiga ma sui o kamupani ma ua aaveesea ma togi ai i fafo le maliega sa sainia muamua.
“O le taunuuga lena o le mataupu ina ua mae‘a ona tuuina atu i kamupani faamaoniga o pepa o le fanua, ma ua latou ioe o matou lava e faasino i ai le eleele, ae lē o matai na sainia muamua le isi maliega”.
O le maliega foi ua sainia e suli o Pauli Taetafe ma kamupani e pei ona ta‘ua, ua faamautu ai ma le faatauina e le Pure Pasifika ma le Reef Group o le fale sa iai le maketi, ona o se talosaga ua tele mea ua leaga o le fale, ma e fia faafou ma fausia ia fetaui ma le faamoemoe o ia kamupani e teu ai le nonu, ma la‘u i Vaitele i le nofoaga o loo gaosia ai le sua o le nonu ma ave i maketi i Saina.
“Ua matou talia le faaaogāina e kamupani o le fale ma le eleele ona o se taumafaiga aogā ma tāua mo le manuia o le atunuu ma o tatou tagata”, o le saunoaga manino lea a Pauli Taulapapa Sefo i se talanoga ma le tusitala.
Faatoesega
O le vesia o le lotoifale o suli ma le aiga o Pauli Taetafe ona o le sainia e isi matai o Salelologa o le maliega ma kamupani ae leai se aiā a i latou i le fanua.
Faaalia e Pauli Taetafe na ia feiloai atu ia Pauli Apelu i se feiloaiga i se tasi o maota o lo latou aiga i Vaitele-fou, ma momoli ane ai le faatoesega a le matai matua o le nuu. “O lana tala mai, ia matou malilie ua faaseseina lava ia i fautuaga a isi, ma ua matou faamagalo i ai”.
O le faaletonu foi na aliali mai na faatoese ane ai le Fofoga Fetalai, le afioga Laauli Leuatea Polataivao, o se tasi o loo i totonu o le maketiina atu o le nonu a Samoa i Saina lea o loo patino i kamupani o le Reef Group ma le Pure Pacifika ona ua televave le latou faaiuga.
O le saunoaga mai foi a Pauli Taulapapa Sefo, o le tala atu a le Fofoga Fetalai, o le a liliu loa e ave le maliega na sainia muamua ma Pauli Apelu i le tulafono, peitai ua ave le tuualalo a Pauli Taulapapa ma lona aiga i le Fofoga Fetalai e alofa e taatia lea fuafuaga ona ua faamagalo i matai na faia le gaioiga.
Toe totogi le $50,000
E $50,000 na tuuina atu e kamupani i matai na sainia muamua le maliega, peitai o le toe suia o le maliega ma le aiga e ana tonu le fanua ma le fale sa iai le maketi, ua manino mai ai e tatau i matai na taulimaina le seleni ona toe faafoi i le kamupani.
Peitai ua faaalia e Pauli Taulapapa Sefo, o le mataupu lea ua taatia atu lava i matai na latou umia le seleni ma kamupani e lua o loo aafia i le feagaiga ma le maliega. “E leai se matou aiā i le tulaga lena”.
O le itu mautinoa ua mae‘a ona tufa ma vaevae le 50 afe e matai na sainia le maliega ua faalēaogāina e pei ona faaalia e se molimau faatuatuaina.
