O le ‘afa lona lua o le taaloga lea na matuā iloga ona lailai ai le Toa Samoa i faiga a le Kiwi i le la uluai taaloga faavaomalo i le Aso Toonai, ma manumalo ai i ‘ai e 50 – 6.
E mae‘a le ‘afa muamua o le taaloga e na o le 4 sikoa a le Kiwi 16 – 0, ae na matuā mataina le finau a tamafanau a Samoa lea na semanu e muamua latou laasia le laina sikoa ae faato‘ā 2 minute talu ona amata le taaloga.
Peitai o le tele o mea sese ma le faaletonu o le puipuiga le tele o mafuaaga o le faiaina, lea na mafua ai ona 10 lelei sikoa a le Kiwi i le lelei ona latou faatamoeina o le polo aemaise lava o le latou laina i tua.
E tele lava foi ni fesili ma ni manatu su‘ifefiloi i le faaiuga o le taaloga, o nisi lava foi o lagona lē fiafia ona o lagona toilalo ma le faiaina e ui e lei lava se taimi sa tuufaatasi ai le Toa Samoa.
Ae i le Kiwi ua faaalia le aogā o le taaloga mo le faasauni atu i le Taamilosaga o le Four Nations lea e amata i le Aso Toonai a le Kiwi ma Egelani i Ueligitone. O nisi o galuega fia faaleleia i le ‘au a Niu Sila e pei ona faailoa e le Faiaoga, e aofia ai ma le va o le Half Back, le alo Samoa o Thomas Leulusi ma le Kapeteni le alii o Benji Marshall ina ia iloa lelei lo la sootaga, faatasi ai ma le toe a‘oa‘oina o le kiki i le pou lea na fai si faaletonu ina ua misi uma lava kiki e 4 i sikoa o le ‘afa muamua.
O le Toa Samoa lea o le a agai atu nei mo le isi ana taaloga faitaulia ma Tonga e faia i Ausetalia i le vaiaso fou, ae o le tala fiafia, o le leai o se tasi o faamanualia o le ‘au a le atunuu, se‘i vaganā le Kiwi lea ua faapopoleina i le manu‘a o le isi o a latou faataumoa le alii o Manu Vatuvei.
Pei lava ona silafia le faatauanau a le Pulega a le taaloga Liki a Samoa i le atunuu i Aukilani nei ina ia lagolago le uluai taaloga lenei, o le mafuaaga lava ina ia faailoa atu ai i le taaloga Liki a Niu Sila se feau, auā nisi taaloga faapenei i le lumanai ma maua ai nisi faamanuiaga tau seleni e saga faamalosi ai pea le taaloga i Samoa.
Ae o le agaga faamalo ma le faafetai i le atunuu i ona aotelega ina ua vaaia le lanu moana faasolo atoa o le malae faatasi ai ma le tele o fu‘a Samoa sa vaaia i soo se itu o le fale matamata, e faailoa ai le agaga lagolago ma le loto nuu.
Ia ua moni lava upu o fatuga, pe manuia pe malolo, e lē mafai lava ona faagaloina. Faamalo foi le taaalo i alo ma tamafanau a Samoa sa tauaveina le tagavai ma fai ma sui o le Toa Samoa, o nisi lava ua tuua a latou konekarate i atunuu mamao ona o le fia tautua ia Samoa, malo faafetai, o le iuga atoa lenei o le taaloga ma i latou na maua sikoa:
NZ Kiwi 50: (S Kenny-Dowall 2; M Vatuvei 2; J Nightingale B Marshall N Fien T Leuluai L Hohaia F Pritchard tries, Marshall 2 goals; I Luke 3 goals)
Toa Samoa 6: (P Godinet try; J Paulo goal). Ht: 16-0.
