Atonu foi e muliga le popole ma le fa‘atu o le atalii ua sauni lona tamā e sasa i le fusipau i se mea ua faaletonu, i le popole ma le fa‘atu o le ‘au Taitoafitu a Niu Sila lea ua iai nei pe a faafesagai ma le Manu Samoa.
Ua faalima ai lea ona faia‘ina ma faamo‘amo‘a lelei e Lolo Lui ma le vaega le ‘au a Niu Sila nei i le vae lea i le faaiuga o le vaiaso i Egelani.
O le faaletonu o le taaloga a le Manu Samoa ma Argentina ma tulaga lua ai i lana Pool, lea na mafua ai ona see ane e taaalo ma Niu Sila, ma manumalo mai ai le latou Pool i le isi Quarter Final o le Ipu autu.
Se taaloga a faapopole tagata ina ua muai laasia e le alii o Nicolson o Niu Sila le laina sikoa a le Manu ma uluai tau ‘ai ai i le 5 i le leai. E le‘i ova le kiki, peitai na vave le osofai a le Manu i le puipuiga ma toe tipi ai e Pesamino le pasiga i luma o Baker ma faasasa‘o loa i lalo o le pou ma tulai mai ai ‘ai e 7-5.
E le‘i umi ae sao atu le alii o Baker ma toe sikoa i le tulimanu, e le‘i ova le kiki ma sili ai Niu Sila i le 10-7, ae ta loa ma le ‘afa muamua.
O le toe foi mai o le Manu na lē faimea ai loa le Kiwi ina ua sosoo lava isi sikoa e lua mai le alii o Reupena ma Ofisa ma uma ai ma le taimi, ina ua toe manumalo faalima ai lea o Samoa ia Niu Sila, a o totoe ai le vae e tasi o le IRB Sevens i le vaiaso fou i Sikotilani.
E auina atu lenei lipoti o loo faatali le Final o le taamilosaga lenei i Egelani. Ae tusa la pe o le ā se tulaga o le taamilosaga lenei, a o le mea mautinoa ua faaopoopo isi ‘ai o Samoa i le tuufaatasiga lea e sili ai i ‘ai e 3 ia Niu Sila i le 124-121.
Ma ua mautinoa ai e na o le Manu Samoa lava e mafai ona faafetoaia le Olopeleki i le Taitoafitu. Malo Manu!
