Sola Savaii ma le siamupini o tuuga fautasi

Ua pepese fiafia le motu o Savaii ua latou umia le siamupini o tuuga fautasi o le sisigafu‘a o lenei tausaga ina ua siamupini le Sa o le afioaga o Salelologa, le Tolotolo o Tama Uli lea na amata le tuuga o faigata ona iloa poo ai o laua ma le siamupini o le tausaga ua mavae le fautasi o le Segavao e ono maua le tulaga muamua.
Peitai o le sefululima minute talu ona amata mai Faleula le tuuga ae sosolo i luma le Tolotolo o Tama Uli, pito atu loa i ai le Segavao ma o le tulaga lava lea na iai seia oo ina tini.
O le fautasi o le La o Samoa na taualoina e nisi o tama o le kolisi a le ekalesia a Iesu Keriso o le Aupaia o Aso e Gata ai i Pesega na tulaga tolu.
O le Fetu Ao mai Tiavea Aleipata o le fautasi na tulaga ono, ae tulaga lima le isi Sa o Salelologa o le La o le Talalelei, ae tulaga fā ai le Manulele Tautala mai Apolima.
O le faatinoga o le tuuga i lenei tausaga e lei faia e pei o le tausaga ua mavae e lua taamilosaga, lea sa amata atu i gatai o le maketi o i‘a ona agai lea i Puipaa liliu mai ai ma tini i Apia.
O le tausaga nei na amata mai i le vaega e masani i gatai o Faleula ma agai mai ai loa i le tini ma e lei aumai lava se faamatalaga mai le komiti o tuuga fautasi lea e taitaifono ai le Komesina o leoleo pe aisea ua toe foi ai i le faiga tuai ae ua lē tatao ai pea i le faiga fou na amata i le tausaga i tuuga fautasi o le sisigafu‘a o le tausaga e 2011.
E toaele kapeteni sa latou le talia le faiga fou lea ina peitai sa faatino ai lava tuuga fautasi. O le tapenaga a le Digicel Segavao i le tausaga nei, sa malolosi le auvaa e pei ona sa molimauina i vaiaso a o lei oo i le tuuga fautasi o le fu‘a o lenei tausaga.
Peitai o le Tolotolo o Tama Uli sa faaaogā lo latou Sa tuai e koleni ai, ae o le fautasi fou na faatoa alo lava i le Aso Faraile na tea nei na faia ai tuuga fautasi.  O le molimau a le toatele o le faatoa silasila lava lea i le saoasaoa tele o le Sa fou ona o lona fausaga e lē tutusa ma isi fautasi. Ua na o le Manulele Tautala le Sa mai Aiga i le Tai sa tausinio, ma e lē o iloa le mafuaaga ua lē auai isi fautasi auā o le isi Sa le Telefoni o le Vainuu na toe faamaamulu ma le tuuga o le tausaga nei.
O loo talosia ia toe vaaia uma fautasi o Aiga i le Tai i tuuga o le vaiaso o le Teuila o lenei tausaga. E 30 afe le faailogatupe o le siamupini o faiga mea i le tai o le sisigafu‘a  o le tausaga nei ma le ipu.
E $25,000 le tulaga lua ae sefululima afe le tulaga tolu.