Na matuā masii mai le Kolisi o Mataaevave i le Faasaleleaga i Savaii mo le taumafaiga ina ia maua se avanoa e tauva ai ma aoga maualuluga i Upolu auā le faailoga faaletausaga o le Kolisi e tulaga muamua i le tausinioga o tomai faasaienisi.
O le Vasega 10 e oo i le Vasega 13 e vaevae i ai tauvaga nei faaletausaga ma le faamoemoe o le Matagaluega o Aoga e unai lea foi tomai ua toatele lava fanau ua agai i ai ae e lē o maualuga so latou taumafai e faatino ai – o suesuega faasaienisi.
O le autu o galuega faatino o le tauvaga o lenei tausaga ua vaavaai ai i taumafaiga a le Malo o Samoa ua iai nei e saili auala e tuuitiitia ai le tau faatau mai i fafo o punaoa mo le fausia o malosiaga e pei o eletise i totonu o le atunuu. O auala e faaleleia ai le siosiomaga o loo faapea ona agai faatasi mai i le autu o lenei tausaga.
O le Matagaluega o Aoga faatasi ai ma kamupani na fesoasoani e tusa ai ma faailoga mo le fanau e pei o le faletusi o le Samoa Stationery.
O poloketi na manumalo sa tuufaatasia e Mataaevave e aofia ai le poloketi mataina na faatino e le Vasega 9, o le toe faamamāina lea o vai mai lologa mo le toe faaaogāina pe taumafa foi pe a faaletonu le suavai maua.
O le faataitaiga a le vaega feololo na manumalo foi, o le faiga o le eletise e maua mai le la, ma le faatinoga a le vaega matutua sa tulaga lua, o le gaosiga o le ea poo le kasa mai otaota o manu e pei o le manupapalagi ma faaaogā mo le faiga o meaai.
Faaalia e le tamaitai faiaoga na taitaia maia le aumalaga a le aoga, Jacinta Nautu, sa omai lava ma le manatu e manumalo a latou galuega uma e tolu. Na ia ta‘ua foi, e tolu vaiaso sa taumafai ai le fanau e tuufaatasia ia faatinoga ma sa tauva foi i Savaii ma nisi o aoga maualuluga ma filifilia ai loa le latou aoga e fai ma sui o Salafai.
Ona o le itu o loo matauina i totonu o lo tatou atunuu i le faaitiitia o le fuainumera o i latou e fiafia i lea mataupu o le faasaienisi, ua manatu ai le Matagaluega o Aoga, ina ia faaauau pea lea polokalame ina ia faatumau ai le fiafia o le fanau e faaauau pea aoaoga i le faasaienisi.
O le matata foi o faiaoga i totonu o le Papaigalagala, o loo matauina ai foi lea tulaga, i le tau leai o nisi latou te tauaveina. Ma o se isi lea faamoemoe o le tauvaga faaletausaga lenei ina ia iai nisi e faaauau le tomai lenei ma ia faiaoga ai.
O le toatele o loo iu mai i fafo i lea tomai o loo agai i Matagaluega e ese mai i le Matagaluega a Aoga ae ua le agai i tiute faafaiaoga.
Mo le tauvaga o le faasaienisi o le tausaga nei, ua sola ai le Aoga a Sagata Maria i Savalalo ma le manumalo mo aoga laiti (Primary Schools), o le Kolisi o Mataaevave mo vaega e lua mo poloketi a aoga Maualuluga ma le Vaega matutua ua manumalo ai le poloketi a le Kolisi o Sagata Maria i Vaimoso.
