Se taaloga lava ina a mataina lea na mae‘a atu nei, a o silamiō le 94,700 le au tapuai a Aferika i Saute i se tasi o latou malae taalo tele i le aai o Soweto, faapea foi le lalolagi atoa i le televise.
O le faatolu ai lea ona malolo le Springboks ia McCaw ma le vaega i lenei tausaga i le taamilosaga o le Tafatolu; e faalua ona faiaina i Aotearoa nei ma le tasi lea na toatele e manatu o le a malolo ai le Olopeleki i le faaiuga o le vaiaso.
O se tasi lenei o taaloga tāua tele i ‘au nei e lua, mo le Olopeleki na manaomia le manumalo poo se ponesi foi, ina ia maua ai le Ipu, a o Aferika e tatau ona ea a‘e i le toilalo mai lenei tausaga atoa mai ia Niu Sila ma Ausetalia. A o le uluai taaloga lea o le Tafatolu i o latou malae, faatasi ai ma le taaloga lea e atoa i ai le 100 taaloga faitaulia a le alii Kapeteni o John Smit.
E lei lelei le amataga o le taaloga i le ‘au a Niu Sila ona e foliga mai ua faitau uma mai e Aferika le tele o a latou gaioiga e amata mai lava i sikalamu, lineouts, faapea foi i le puipuiga ma le tele o vaega uma o le taaloga, faapea foi le misi o nisi o kiki a le alii o Carter i le pou.
O le faaletonu lea na vave laasia ai e le numera 6 a Aferika le laina ma faaopoopo i ai le sa‘o o le vae o le alii o Steyn ma sili ai Aferika i ‘ai e 13 i le 9. Sa lē mafai e Niu Sila ona faataunuu le manaoga o le alii Kapeteni e tatau ona sikoa muamua ina ia faanofo filemu ai le tapuaiga pisapisao a Aferika, lea na matuā lē lagona ai ma se upu se tasi o le Haka masani a le Olopeleki i le leo tetele o le au tapuai.
O le sikoa muamua a Niu Sila o le alii o Tony Woodcock, peitai na faaopoopo pea ‘ai a Aferika ma oo ai i le 22 i le 17 ae toe lima minute o loo totoe o le taaloga.
Peitai pe ā ma se toe tolu minute ae toe faō loa Richie McCaw i le tulimanu ma tutusa ai loa ‘ai i le ta‘i 22. Na maua e Aferika le polo i le minute milimuli lava peitai na fao mai ai lava e Niu Sila le polo ma sau ai loa le osofaiga mulimuli.
Na pei e fai se maliu i Soweto ina ua vaelua lelei e le tama Samoa, Maa Nonu le puipuiga a Aferika ma sao mai ai, pasi atu loa i le alii o Israel Dagg ma faasasa‘o atu ai loa i le laina sikoa ae ua mae‘a ai foi ma le taimi, ma manumalo ai loa le Olopeleki i le 29 – 22.
O ni lipoti mai Aferika o loo ta‘ua ai le faanoanoa tele o le alii Kapeteni o le Springboks ona o le faiaina o lana ‘au i le atoaga o le 100 o ana taaloga, ae o le misi lava foi o lana pue mulimuli ia Nonu lea ua faiaina ai.
Ua see mai nei la le Ipu o le Tafatolu i Niu Sila lea sa ia Aferika i le tausaga talu ai, a o totoe ai taaloga e lua a Ausetalia ma Aferika, ma le taaloga e tasi a Niu Sila ma Ausetalia, faapea foi le Ipu i le Bledisloe Cup lea foi ua nofo i laufanua o le Kiwi mo lenei foi tausaga.