E eseese lava aso o le olaga, o taimi ua fiafia ma ‘ata, o taimi foi o le faanoanoa ma le tagi pe a manatu i nai aiga ua fa‘ilagi folauga ma toesea e ala i le maliu ma le oti, aemaise la i se faalavelave faafuasei e lei fuafuaina ma gasegase oso faafuasei e leai se faatofa.
O nisi ia o lagona e tutupu pea ma lē maua ai se toafilemu o le mafaufau. O ni fesili foi e lē mafai ona taliina ua na o le talanoa lava ma loifofoga maligi.
O le aso 26 o Mati i le tausaga e 2010 na maliu faafuasei ai le alii o Junior Toetu Alesana, o ia se tasi o grandson a le afioga ia Tofilau Eti Alesana, o lē sa avea foi ma Palemia o Samoa i le tele o tausaga ua mavae. O mātua o Toetu Junior, o Tofilau Vaaelua Toetu Alesana mai le alalafaga o Iva ma si ona tina o Nima Ropati Frost Alesana mai Iva ma Fasitoo.
E faapea se faamatalaga o le tausaga ua mavae na mānava mai o ia sa faigaluega, i le mae‘a ai o faigalotu afiafi, sauni atu loa i tofaga ma malologa, ma maliu ai lava o ia ona o se gasegase oso faafuasei. Na faanatinati atu i le falemai peitai ua tuai, na maliu ai lava o ia.
O se alii e misia tele e ona aiga uma ona o ona uiga tausaafia ma le lotoalofa aemaise le agamalu ma le faaaloalo i soo se tagata, e lē gata o ona aiga ae faapea lana aufaigaluega a le Casino.
O le susuga i le failautusi o le Ekalesia AOG Samoa i Kuiniselani, Ps Tae‘auga Ropati Frost sa ia taitaia le sauniga i luga o le fanua maliu i Goodna.
Na saunoa le auauna a le Atua, o le lotu e faamanatu ai le tausaga talu ona motusia le mafutaga, ma o se feau foi e faamalosia ai ē o loo soifua pea, e tapenapena ai le tagata lava ia ina ia oo mai le valaau ae o loo mautinoa lona taunuuga. O le tui lenei ma le fili e faaumatia e lē mailoa e se isi le taimi e oo mai ai. E lē gata i lea, ae ia tausisia lava e le tagata ia lona ia soifua maloloina.
E aogā foi nei faafitauli e fai pea ma fafagu ina ia taumafai e siaki fomai; aua le naunau tele i le ‘oa auā e oo mai le valaau e te alu filemu lava ae tuu le tamaoaiga o ia te oe. O se faamanatu lea na faamamafaina e le taitai, le susuga ia Ps Tae‘auga Ropati Frost i le aso na faatumulia ai lea aoauli i le fanuatanu i Goodna i le faamanatuina o le tausaga talu ona maliu sia alo tautaua i Kuiniselani, ona o le tele o uo ma aiga faapea le aufaigaluega a le Casino sa auai.
O lea faatasiga na malaga mai ai se tasi alo o Tofilau Eti Alesana mai Niu Sila, le faletua ia Lupe Alesana ma nisi lava aiga ma uo i isi setete o Ausetalia.
