“E ua maliliu toa ua maumau auupega o le taua”. O le gagana lea pe a oo ina faamanavaina e le Atua galuega a se tasi o ana toa o le tala lelei ae foi atu i le malologa tumau. O se tasi foi o muagagana tatou te masani ai e faapea “Pau se toa ae tu se
toa”.
O le auga o lenei tusitusiga ina ia faaosofiaina toa o le asō ma le lumanai e ala i le malamalama i auala na faaaogaina ai e le Atua Toa ua fai i lagi le folauga ina ia faatupuina ai le faatuatua ma le naunau mo lona finagalo.
Atonu e le toe faaaogaina auupega na tau ai Toa ua mavae, aua o le fuata ma lona lou, o le toa ma lana taua. Peitai e iai le lagona o le tusitala e le o se ai a le matagi pe o le tui o le ea le galuega a Toa o le Tala Lelei ua talaia ofutau. E le sisina fua le afu. E le aluvale le malosi. E le maumau le toto maligi.
Ua amataina i lenei vaiaso se tasi o tusitusiga fou e faaulutalaina o ‘Toa o le Tala lelei’.
E afua mai i le amataga e oo mai i le taimi o Keriso e faatulai pea e le Atua tagata ua taua o taitai poo toa i totonu o le Tusi Paia e avea ma fofoga o lona finagalo ma taitai o lona nuu. O nisi na inosia ma fasiotia.
Ina ua afio Keriso i le lagi ae tuuina mai le galuega i lona ausoo e oo mai i nei onapo, o loo faapea lava ona faatulai e le Atua alii ma tamaitai e faia lona fingalo ma ave le tala lelei i tuluiga uma o le lalolagi. O nisi ua maliliu ai lava.
E faitau afe ma afe i latou e mafai ona aofia i totonu poo lalo o lenei ulutala o ‘Toa o le Tala Lelei’ ma o le a le mafai ona faamaumauina uma i latou i lenei tusitusiga. Peitai o le a avea nisi ua filifilia e mafai ai ona tatou maua se malamalamaga i totonu o le loto o le tagata na ofoina atu le ola mo le Atua.
O nisi na matua iloga le faaaogaina e le Atua o latou soifua e ala i vavega ma faailoga ma mea matautia. O nisi na faaseseina o latou loto a o iai i le tala lelei e ala i nisi o aoaoga ua see ese ma le Tusi Paia. O nisi na pau i le agasala ona o le tuinanau o le tino i le faitaaga, o le mulilua aemaise le manao tele i tupe. O nisi ua manatu i le pule ma le paoa ae ua galo lona valaauina.
O lenei tusitusiga o le a le faasinosino lima pe faitau leaga pe sapai le tasi ae taitai le isi. O le manatu ma le autu o lenei tusitusiga ina ia faalototeleina i tatou e ala i aoaoga ma faataitaiga e maua mai i nei toa o le tala lelei. Aemaise ai, ia lapataia i tatou ma aoaoina foi i tatou i auala ina ia aua nei o tatou pau ai i lo tatou ola faaleagaga aemaise o le
valaauina a le Atua.
Ia manuia lau faitau.
Smith Wigglesworth – O le Aposetolo o le Faatuatua
8 Iuni 1859 – 12 Mati 1947
Vaega 1
O le faatutuina o tagata ua feoti o se mea ofoofogia lea i le mafaufau. Peitai o se tasi lenei o vaega na lauiloa ai lenei auauna a le Atua ona o lona taofi maumaututu ‘Tau lava ina ia e faatuatua’. O le matua tauave lea ma o le ki foi lea o le tele o vavega na faia e Smith Wigglesworth.
Na soifua mai Smith i se tamai nuu o Menston i le aai o Yorkshire i Egelani i le aso 8 o Iuni 1859 i ona matua o Ioane ma Mareta Wigglesworth. O se aiga e matitiva. Sa suesue solo galuega o lona tama ma le lelei le totogi. Talu ai ona o le le tagolima o le aiga o lea na amata sue galuega Smith i le 6 o ona tausaga e fesoasoani i lona tama atoa ai ma ona uso e toalua ma lona tuafafine e toatasi.
Na maua lana galuega i le faatoaga e toto ai le lakisi poo tunipe. O se galuega faigata ona o le laiti o ona alofilima ae sa ia galue mai i le taeao seia oo i le afiafi i le taseiina i luga ma fafai le faatoaga ma ave i le maketi.
Sa aoaoina i lea taimi e Smith le taua o le galue malosi ma ia le faaloglogo tiga. I le fitu o ona tausaga na suia ai le la galuega ma lona tama. Sa galulue nei i laua i le miliina o le vulu i le sefululua itula i le aso. E le o se taimi lea mo se tamaititi laititi e galue ai. Peitai sa le faatafa Smith ona o lona alofa i lona tama ma le latou aiga. Na iu ina faamanuiaina ma ua feololo sina totogi ua maua. Ua amata ona ea le pologa i le mativa o si o latou aiga.
O se mea fiafia i le tama o Smith le faia lea o lana pa manu felelei e fafaga ai ituaiga o manu eseese. Sa faapea foi ona avea ma se mea fiafia a Smith le talanoa i nei manu ma faataitai a latou tagi. Sa faapea foi ona alu Smith e ave nei manu e faatau i le maketi i nisi o taimi e maua ai se seleni aua lo latou aiga.
O matua o Smith ma le latou aiga, e le o ni tagata lolotu ma latou te le iloa le Atua. Peitai a o laitiiti Smith sa iai lona naunautaiga na te fia malamalama ma iloa le Atua. O lea e masani ai ona faia ana tatalo a o iai i le faatoaga pe taalo foi i le togavao.
E ui e lei tupu ae o ia i se aiga lotu ae o le tina o lona tina sa lotu i le ekalesia Metotisi Uesiliana, o ia lea na aafia ai le loto o Smith i mea faaleagaga atoa ai ma le naunau i le Atua.
O le loomatua lenei o se Kerisiano sa malosi lona faatuatua i le Atua ma lona talitonu i le mana o le Atua. Sa ia alu ma ave Smith i le lotu. A o nofo Smith i totonu o le lotu ma faalogo pea i le laugaina o le afioga a le Atua ma tautinoga a tagata sa oo ia te ia le lagona e fia auai i le lotu. I le valu o ona tausaga na amata ai ona fiafia o ia e pese ma patipati ona lima i pese o le lotu.
O se tasi o aso na usuina ai se pese e faatatau ia Iesu Keriso o ia o le Tamai Mamoe a le Atua na fasi mo agasala. Na oo ane ai i le loto o Smith lona talitonu ia Iesu Keriso o ia o le Faaola ma ia filifili ai e talia o ia i lona loto ma ola mulimuli ai e ia Iesu Keriso.
O lea malamalaaga e uiga ia Keriso na ia tusi ai i se tasi o ana tusitusiga mulimuli ane e faapea: “Ua ou iloa le matua naunau o le Atua mo i tatou na mafua ai ona ia faia se auala sili ona faigofie e mafaia mo i tatou – ‘Ua na o le faatuatua’.”
E afua mai lava i le taimi lea i le valu o ona tausaga na le toe maluelue le faatuatua o Smith i le Atua. Na faatumuina lona loto a o laititi i le naunautaiga e fia alu e talai le alofa o le Atua i tagata. O lona tina le tagata na muamua liliu i le talaiga a lenei misionare
laititi.
Ua amata nei ona fiafia le aiga o Smith i le lotu ma na manatu ai loa lona tama ina ia latou o i le lotu Egelani. Atonu sa iai se isi auala na filifili ai e Ioane lea lotu, ona e lata ane i le falepia lea e masani ona inu ai, ma sa faapea lava ona fai le toaga i le lotu ma le falepia.
Ua faatupulaia le fiafia o Smith i le lotu ma ua auai nei o ia i le aufaipese faatasi ma lona uso. Peitai na toe vave faamuta lona auai i le aufaipese talu ai sa le mafai ona auai i le tele o taimi ona sa faigaluega o ia.
O le sefulu o tausaga o Smith na iai se isi laasaga ese na tupu i lona ola faaleagaga. O se tasi Aso Sa sa faia ai se sauniga faapitoa mo le tupulaga talavou. Sa faaee aao o le faifeau i luga o le fanau ma tatalo mo i latou, peitai ina ua oo atu le tatalo ma faaee lima o le faifeau i luga o Smith na ia lagona le mana o le Atua ua pai atu ia te ia ma ua ia faalogoina le mamalu o le Atua i lea taimi. O lea mamalu ma le lagona o le mana o le Atua na faalogoina pea e Smith i le tele o aso na sosoo ai ina ua maea le sauniga
i lea Aso Sa.
I se tasi o ana tusi na ia tautino ai e faapea: “Ina ua maea le sauniga i lea aso sa faapea ona ou vaaia tamaiti o loo taaalo ma laulauvavale, ae sa ou tau manatu poo le a le mea ua ese ai i latou ma au i lea aso”.
O le sailiili manuia na siitia le aiga o Smith ma ua malaga atu nei ma nonofo i se tasi o aai e igoa ia Bradford. O ina na iloa ai le tele o le taimi o Smith e faaaluina i galuega a le Ekalesia Metotisi sa lotu ai. O le taimi lea ua sefulutolu ona tausaga. Na faananau le loto o Smith i le Agaga Paia o le Atua mai lea taimi. O aso uma e alu ai Smith i le lotu ma ave lana Tusi Paia, peitai e le iloa e Smith faitau le tusi ona e lei alu i se aoga.
O se tasi o aso sa faia ai se sauniga faapitoa mo le laugaina o le Afioga a le Atua. Na filifilia ni alii talavou se toafitu e aofia ai ma Smith. Na tuuina atu ia i latou le 3 vaiaso e tapenaina ai a latou lauga. Sa faapea ona faasaga i latou uma i le suesue, tatalo ma le anapogi. Ua oo i le aso atofaina ma na tuuina atu loa le avanoa i talavou nei mo le folafolaina o le Afioga a le Atua.
Na solo lelei mea uma ae peitai ina ua tulai Smith, na faateia uma le ekalesia i lea aso. O le alii talavou e lei alu i se aoga, e le iloa foi faitau le Tusi Paia ua tulai ma le mana. E lei toe nofonofo lelei le aulotu i lea taimi. Ua amata ona feei ma alalaga tagata i totonu o le
falesa. Sa lei malamalama Smith i le mea ua tupu, ae o le itu na sili ai ona ia le malamalama, aua ina ua maea lana lauga, na pei o se laupapa a se faiaoga ua uma ona toe solo mama, le leai o se upu e tasi na ia laugaina na mafai ona ia toe manatuaina. E ui o ia na gagana i upu, ae na te lei manatuaina se tala e tasi.
Ua amata ona tau ataata mai se tulaga ese i le soifua o lenei talavou. Na faaauau pea le galuega molimau a lenei talavou i tagata e pei ona uluai faia i lona tina. Ae sa faanoanoa o ia ona o le tele o tagata e leai ma se fia faalogo pe iai se naunau i le Atua.
O le sefuluono o ona tausaga na amata ai le galuega a le Salvation Army i totonu o Bradford ma na tosina i ai le loto o Smith ona e ui i le manaia o le Ekalesia Metotisi sa lotu ai, ae peitai e leai se naunau tele o tagata e o e talai ma manumaloina agaga mo le Atua. Na vaaia e Smith i le Salvation Army le ola naunau o tagata e molimau.
Na avea lea ma auala na faamumuina ai le loto naunau o Smith i le Atua. Ua aoaoina nei o ia i le ola tatalo ma le anapogi. O nisi o taimi e auai Smith i fonotatalo e alu le po atoa o faia talosaga. Sa tootutuli i luma o le Atua ma faatoga mo agaga ia manumaloina mo le Atua. Sa vaaia i lea taimi le liliu o tagata i le Alii, e oo atu i le taiselau tagata i le vaiaso.
I le sefulu fitu o ona tausaga na feiloai ai Smith ma se alii i lona fale faigaluega, lea e vili ai le vulu. O se alii Kerisiano ma sa ia aoaoina ia Smith le galuega o le palama. I lea masaniga na faalototeleina ai e lenei alii Smith e tatau ona papatisoina i le vai e tusa ma le aoaoga a le Tusi Paia.
Na amataina i lea aso ina ua papatisoina Smith i le vai se tasi o laasaga tele i le avea o ia o se meafaigaluega tautaua ma le faauuina e le Atua i lana galuega.
Faaauauina i le vaiaso fou
Lui Ponifasio
Pastors
