Vaega 9
‘Sei o tatou faalogo i sina upu mai le tusi’. O se tasi lea o saunoaga masani
a Smith Wigglesworth (Simifi) e manatua e le tele o tagata ma ana uo. O le tele o taimi e asiasi ai Simifi i fale o ana uo ma i latou e valaauliaina o ia, e masani lava a oo loa i le taimi e uma ai se taumafataga poo le a faamavae foi ona to ane lea e Simifi o lana tamai Tusi Paia mai i lana taga ma faapea atu, “Sei o tatou faalogo i sina upu mai le Tusi”.
O le auauna a le Atua o le tagata o le Upu. O le tele o se taimi o lana tapenaga mo sauniga e faaalu i le Upu. A alafai mai o ia i le taeao e tapena le itu i la le tino toe tapena foi le itu i la le agaga.
E faapea le lagona o Simifi, ‘E le atoa ona laei pe le faitauina le Tusi Paia i le taeao. E tali tutusa lava le tele o le taimi e faaluina e faamalu ai ma faia ona laei ma taimi e tapena ai lona agaga e ala i le faamamaina i le Upu.
E oo mai i le tausaga e 1930, ua sili atu ma le lima sefulu tausaga talu ona galue Simifi i le talaiina o le finagalo o le Atua. Ua faitau afe ma afe tagata ua taliaina le faaolataga a Keriso ina ua talitonu ma faatuatua I lona suafa. Ua faapea foi ona faitau afe ma afe tagata ua malolo mai
gasegase i le suafa o Iesu Keriso.
Na le mafai e nei itu uma ona taofia le tulaga o le natura o mea. O Simifi o se tagata ola e pei lava o tagata uma e ui ina ese le matautia o lona faaaogaina e le Atua. Ua aafia Simifi i se gasegase tiga. Na tuuina atu i talosaga. Sa faapea foi ona tatalo Simifi mo lona faamalologa, peitai ua faateteleina pea le tiga o lona gasegase.
Sa ia vaaia loa le fomai ma faia lona faata. Na iloa i le faata le tulaga afaina tele o fatugao o le auauna a le Atua. Na faatonuina e le fomai e tatau loa ona faia sona taotoga e aveesea ai le maa i totonu o lona fatugao. Afai e leai o le a vave ona oo mai le maliu.
Na tetee Simifi i le faatonuga a le fomai ma ia faapea atu i le fomai …”Lau susuga i le alii fomai, o le Atua na ia faia le tino lenei, o ia foi na te toe faamaloloina. E le pai se naifi i lou tino a o ou ola”.
Na faateia le fomai i lenei saunoaga a Simifi ma sa faapea lava ona faia lona finagalo. Na faateteleina le tiga o mafatiaga o Simifi. O le tele o po e le maua ai se moe. E le mafai ona taoto i le moega, o nisi o taimi e taavalevale ai i le fola o le fale i le tiga. E tusa ma le ono tausaga o tauivi pea Simifi ma lenei faafitauli i maa o ona fatugao.
I lenei ono tausaga e lei taofia ai le laugaina o le Tusi Paia ma le faamamaloloina o gasegase e tele. O nisi aso e faalua ona lauga ma faatautauia e Simifi polokalame faaevagelia ma sauniga lotu.
Sa faapea foi ona faaauauina ana malaga i nuu ma ekalesia e valaauliaina o ia. O nisi o taimi e faateteleina ai le tiga, ona tuua lea e ia o le sauniga ae alu i le fale le taua, ona toe foi mai lea faaauau le sauniga.
O le gasegase lenei o maa o le fatugao e pei ona silafia o se tasi nei o gasegase tigaina tele. E mafua lea ona o le fatugao o loo faamamaina ai le toto o le tino o le tagata ma aveesea ai le vai leaga lea o loo taua o le feau lata, sei tulou. E iai la le taimi malo ai le feau lata ma le ui i le ala e tatau ai, ona mafua ai lea ona poloka le alavai i le ona o le tino. A oo ina faia le feau vai sei tulou, e matua tiga tele ona o le poloka i nei maa.
O se mea matautia, matautia na tupu, i totonu o le ono tausaga o taafifili pea Simifi ma lenei gasegase, e sili atu i le selau maa na mafai ona tafi mai i fafo ma faaputuina e Simifi.
E ui i le tiga o le tino atoa ai ma le mamafa o le galuega faaevagelia o feagai ma ia, peitai na tau o ia ma le le faavaivai.
Na tatalo Simifi i le Atua ma faatoga mo se sefulu lima tausaga e ola ai.
Na tali le Atua i lea tatalo. Na tuuina le sefululima tausaga mo Simifi. I totonu o lea sefululima tausaga na ia faaauauina ai ana malaga talai i totonu o le tele o atunuu e aofia ai Aferika, o Amerika ma le atu Europa.
O le naunautaiga o le auauna a le Atua ia fetaiai tagata ma le Alii Faaola o Iesu Keriso. O se mea sili ona faafiafiaina ai o ia o le vaaia lea o faailoga ma vavega o mulimuli mai i taimi o ana polokalame faaevagelia.
O le faamaloloina o gasegase e ui o loo tigaina pea o ia. O le faasaolotoina o tagata ma temoni.
Ua lata ina maea aso o le auauna a le Atua. Peitai e lei faaitiitia ai le tele o valaaulia mai ekalesia eseese ma atunuu eseese. O se tasi aso na tatalaina ai lana meli ma maua ai le tele o nei tusi valaaulia. O se tasi o tusi e mai Ausetalia, o Initia, o Selona ma Amerika.
Na maligi loimata o Simifi ma faapea lana saunoaga “Talofa e, i nei tagata o loo latou fia vaai mai ia te au. O se toilalo ia te au pe a ou faatagaina lea tulaga o le vaai mai o tagata ia te au, ae le o le Atua. E le vaeluaina e le Atua lona mamalu ma se tasi. O le a faapea ona aveesea au e le Atua pe a faapea le tulaga o le a iai”.
O le lagona lea o le tagata o le Atua o loo ola faafiafia i lona Atua. E leai se manatu ina ia viia o ia ae ia foi uma le mamalu i le Atua.
O toe aso i Simifi na auai atu ai o ia i se sauniga o le maliu o se tasi o ana uo faifeau. A o agai atu o ia i le maliu faatasi ma se tasi o ana uo, sa ia faapea ona faamatalaina i lana uo le tele o mea matagofie na faaali e le Atua ia te ia aemaise o mea mamana na tutupu i le taimi na la galulue ai ma lona faletua o Polly, faapea foi taimi na galue ai na o ia ina ua amia e le Atua lona toalua.
Ina ua taunuu atu i le malumalu o loo faia ai le maliu, sa faapea ona agai atu Simifi i le potu o loo i tua o le falesa. Sa feiloai atu o ia i se tasi o tamā sa i totonu o le potu. O le tamā lenei sa iai sona afafine sa tigaina i ni nai aso talu ai ma sa tatalo faapitoa ai Simifi.
Na fesili atu Simifi i le tamā lenei po ua a mai si ona afafine.
Na tali mai le tamā lea e faapea, “E lei atoatoa lava, e lei iloga lava ona manuia ae ua iai le suiga”. E faapea le molimau a i latou sa i totonu o le potu i lea taimi, na vaaia le faanoanoa o Simifi i lea tala ona o le le faamaloloina atoaatoa o lenei teineiititi.
Na mapuea ma manavanava tetele Simifi e foliga mai ua alofa i le lē foi i se lelei o le gasegase o lenei teineititi.
Sa punou lona ao i lalo ma malaga loa e feiloai ma lona Alii.
O le aso 12 o Mati 1947.
E ua maliliu toa, ua maimau ai aupega o le taua!
