“E leai se mea lelei e maua ma le filemu”. O le gagana lea e masani ai tele o tatou matua ma tuaa ua fai i lagi le folauga. O se gagana o le faamalosiau ma le unaia o le fanau ina ia galulue ma ia sogasoga ina ia aua nei ola mativa pe ola falolo.
Ae o le tala a le tusi e faapea: “E le aina e le paie lana manu sa tuli”. Ua aoao mai foi le poto o Solomona ina ia tatou matamata ma aoaoina mai i tatou i le amio a le loi.
O le ola tauivi ma le finafinau o se tamaoaiga lea o le loto o le tagata e fua mai ai mea lelei i ona lima. O le fiafia puupuu e iu ai ina le ausia le autu ma le faamoemoe ua tuuina e le Atua i o tatou loto talu le faavae o le lalolagi, ma o se ola e aunoa ma le faataunuuina o lea autu na fauina e le Atua i totonu o i tatou uma, o se tagata ola le faamalieina lea.
Na le gata le malie o Smith Wigglesworth poo Simifi i le vaega lea ua ave nei i ai e le Atua o ia i le folafolaina o lona finagalo. Ua vaaia le toatele o mai ua malolo.
O soo se ituaiga o mai ma gasegase. E ui ua vaaia le tele o faailoga e pei ona fai mai ai Mareko le faievagelia “…e mulimuli mai foi o faailoga i e talitonu…” (Mareko 16:17) peitai sa tuitui pea Simifi i le faitotoa o le lagi mo faamanuiaga faaleagaga.
Na saunia e Simifi se tasi auala ina ia momoli atu ai le tala lelei i tagata aemaise tagata matitiva ma leai ni mea e nonofo ai. Sa ia faia aiga poo ni faiga taumafa e omai tagata e aai ai e aunoa ma se totogi.
Na faaaogaina e Simifi nei avanoa e faailoa ai le alofa o le Atua i tagata atoa ai ma le folafolaina o le tala lelei o le afio mai o Keriso e faasaoloto tagata mai o latou mafatiaga.
O le tele o tagata na omai ni nei taumafataga na faalogo i le Upu a le Atua, atoa ai ma tautinoga a tagata ua malolo i sauniga a Simifi. E foi tagata ua maoona. O nisi na omai i nofoa faataavalevale ae foi ua savavali i le fale.
O le mea lilo na maua e Simifi poo le ki i le tele o vavega na tutupu, o lona taliaina lea o le Upu a le Atua i le mea o loo fai mai ai ma taumafai e faatino loa i le faatuatua.
Na matua maumaututu le talitonuga o Simifi “A leai se faatuatua e le fiafia mai le Atua” Eperu 11:6. Soo se taimi na te lagonaina ai se mea i lona loto, ona ia faatinoina loa lea ma le talitonuga o le musumusuga lea a le Atua. Na ia faatinoina lenei mea i lona aiga, i taimi e tatalo ai, o le folafolaina o le Tusi Paia, e oo i le faamaloloina o mai.
O le mafuaaga lena e tele ai ina faateia tagata i metotia e faaaogaina e Simifi ona o le taofi o nisi e le o tusia i totonu o le Tusi Paia. I le taimi o Keriso na ia faaaogaina metotia eseese i taimi o ana faamalologa, e oo lava i nisi metotia sa sili ona le talitonuina e ono
faaaogaina e pei o le feanu i le palapala ma nini ai mata o le tauaso.
Peitai o le talitonuga o Simifi e le o le metotia ae o le faatuatua i le Mana o le Agaga Paia. Na fesili se tasi tagata ia Simifi poo le a le ‘secret’ poo le mea lilo. Na tali Simifi e faapea ‘a le unaia au e le Agaga Paia, ou te unaia le Agaga Paia’.
Atonu i le manatu o le toatele e faapea ua fiasili le manatu o Simifi, peitai o le mea moni i le talitonuga a Simifi e iai taimi e amata ai se sauniga lotu ma e foliga mai e leai ma se lagona o iai le Atua i le sauniga, e leai se naunautaiga i tagata mo le Atua, e leai foi se faauuga i luga o le potopotoga.
O le taimi lena e tulai ai Simifi ma tatalo i le Mana o le Agaga Paia e afio mai. E tulai o ia ma tautala atu i tagata ma siitia le faatuatua o o latou loto. Aua o le ki le faatuatua ina ia mafai ona fiafia mai le Atua. O le faatuatua o le mautinoa lea o mea e le o vaaia. O le mautinoa lea e tutupu vavega. E mautinoa e malolo mai. O le faatuatua e tupu ina ua faalogo tagata i le Upu.
O se tasi o mealilo i le soifua o lenei auauna a le Atua, o lona loto alofa lea, poo le loto nutimomoia. E vaaia lea tulaga i taimi e tatalo ai Simifi.
E toatele tagata mai le lalolagi atoa e tusi ia Simifi mo talosaga i o latou faafitauli ma gasegase. O nei tusi e oso ai le loto alofa ma le maligi o loimata o lenei auauna i le leai o se mea e mafai ona fai mo nei tagata. O le mafuaaga lena e tatalo ai faatauanau i le Atua ma tagi ona o le loto ua
tumu i le alofa.
Na faatinoina e Simifi se tasi o aoaoga a le Tusi Paia i le Galuega 19:11-12. I le afe ma afe o tagata e tusi mai, sa faapea ona tatalo Simifi i luga o solosolo ma lafoina i nei tagata ma avea o se auala o le faamalologa a le Atua.
E le gata i taimi o ana talosaga ae o taimi foi o sauniga. E vaaia lava i taimi uma le maligi o ona loimata a o tatalo mo tagata mamai, aemaise lava o pepe ma tagata matutua.
O le tele o taimi e tatalo ai o ia mo le fanau a o faia sauniga.
Na faatupulaia le toatele o le afe ma afe o tagata ua malolo i le tele o gasegase eseese. Na faia e Simifi se tasi o vaega na te lei faia muamua. Na ia talosagaina tagata uma na malolo mai gasegase ina ia latou taufai tatalo faatasi i solosolo ma lafoina i tagata mamai ua le mafai ona oo mai.
O se tasi lea o vavega matautia na tupu ina ua aave mai tala o malologa i gasegase na tuuina i ai i luga solosolo i vaega tiga poo mai o o latou tino.
Sa faapea foi ona faatupulaia le malamalama o Simifi i uiga o le Agaga Paia ma ia usitai ia te ia i lana taitaiga e ui e faateia nisi o tagata i ana metotia ma auala e faatautaia ai sauniga faaevagelia ma sauniga o faamalologa.
Sa faapea foi ona ia faateleina se taimi e faaaluina i le aoaoina o le Afioga a le Atua i tagata Kerisisano ina ia o latou o foi ma faamalolo i e mamai ma talai le finagalo o le Atua.
Sa ia faatonuina i latou ina ia aua aua lava nei tuuavanoa i le Tiapolo. I se tasi o ana aoaoga na ia faamatalaina ai le tala i se tasi aso a o iai o ia i le auala e faatali ai le pasi. Sa ia vaaia se tina ma sana taifau. Na fiu le tina e tuli le taifau e alu i le fale peitai na tutu lava le taifau e foliga mai e fia alu faatasi ma lona matai.
Ina ua taunuu mai le pasi na fiu le tina e tuli le taifau peitai e le alu. Na vaaia e Simifi, ua leo tele le fafine ma sa tu i lalo ma fai i le taifau ma le leotele e alu, na le pine ae tamoe ese le taifau.
O lenei ata na faaaoga e Simifi o se aoaoga e faapea o le auala foi lena e tatau ona tuliina ai le tiapolo. Aua le musumusu i ai ae ae matua faatonu ma leo tele e
alu ese.
O se tasi o vaega na vaaia ua faaopoopo i le talaiga a Simifi o le tutuliina lea o temoni. O se tasi lea o faatonuga a Keriso. E le gata o le talaiina o le tala lelei, faasooina o nuu uma, faamalolo mai, atoa ai ma le tutulia o temoni.
E ui i le tele o mea matautia ua tutupu i le galuega talai a Simifi, peitai e lei maluelue ai finagalo o le au maitau lauulu. ‘E lele le tiotala ae o loo lama lava le se.’
Sa toatele i latou e lei fiafia i le auala e faatinoina ai le galuega faaevagelia a Simifi. O nisi o i latou o taitai foi o Ekalesia Kerisiano.
O nisi foi o taitai o malo le au polokiki. Sa faapea foi ona inosiaina o ia e nisi o fomai ona ua le toe iai ni mai ma leai ni a latou pisinisi ona ua malolo i le suafa o Keriso i taimi o faamalologa.
Peitai e lei avea lava lea ma se tasi o auala e faavaivai ai Simifi. I totonu o le atunuu Suetena i le tausaga 1920 na faasaina ai ona toe faaee lima o Simifi i luga o tagata. Na matau le sosaiete o fomai ma le pulega faaitumalo o lea aai o le a avea lea ma ala e le fesootai ai le mana o Simifi ma tagata mamai.
Latou te le iloa o Keriso le Faamalolo Mai. O ia o le Fomai o Fomai. E lei popole i ai Simifi i taimi o ana sauniga. Sa faapea ona ia suia ai foi se tasi o metotia. Sa ia le toe valaauina tagata e omai i luma mo talosaga i o latou mai ae peitai sa ia faatonuina tagata mamai uma ina ia faaee o latou lima i se vaega tonu o o latou tino o loo iai le gasegase a o faia le tatalo.
E tusa ai ma tala faamaumau e sili atu le toatele o tagata ua faamaloloina nei nai lo le taimi muamua. Na matua le fiafia le malo.
O le tausaga lea na pueina ai faalua e leoleo Simifi i totonu o Suitiselani ona fai mai le malo e tatau ona iai se laisene na te vaaia ai tagata mamai e pei o se fomai.
