Vaega 5
Na taunuu fiafia ane Smith i lo latou aiga ina ua mavae le taimi na pai faapitoa ai le Agaga paia ia te ia i lona mana ma faauuina ai o ia pe papatisoina ai o ia i lona Agaga na mafua ai ona ia tautala i gagana ese na te lei aoaoina muamua.
E lei talileleia le taunuu ane o le malaga ona ua avea le feau faauaealesi na lafoina mai i lona toalua ma auala na faapea ona oso ai le fiafia o Polly.
E foliga mai ua loto leaga Polly i lona toalua ina ua faitau atu, “E le sili ae le papatisoina o oe e le Agaga paia nai lo au tusa lava pe ou te le tautala i ni gagana ese”. O le manatu lea o Polly ona o le lauiloa o le faaaogaina o ia i le folafolaina o le tala lelei.
Na le gagana Smith ina ua faapea atu Polly a oo i le Aso Sa alu oe e lauga sei vaai pe moni le mea na tupu ia te oe”.
Ina ua oo i le Aso Sa na tulai Smith mo le Upu a le Atua ae o Polly sa nofo i le nofoa pito i tua o le falesa.
O le Mana o le Agaga Paia Na faateia Polly ina ua tautalagia e Smith le Isaia 61:1-3 ma ua na iloa ai e iai le mea ua sui. Manatua foi o Smith e lei alu i se aoga. E le lelei lana tusitusi ma lana faitautusi.
Peitai na matua uigaese le faalogo a Polly ma tagata uma i lea aso ina ua faalogoina ua ese lava le faauuina o le Upu folafolaina o le Upu a le Atua. Na fai ifo lemu Polly i lona loto “Le Alii e, e le o le Smith lenei na ou iloa muamua”.
O lea po ina ua maea le folafolaina o le Afioga a le Atua, na tupu ai se mea ese i totonu o le sauniga. Na tulai se tasi o failauga sa i totonu o le sauniga ma valaau atu ia Smith na te fia maua lenei faauuga ua ia maua.
E tau nofo atu i lalo lenei alii ae pau ese mai lona nofoa. O le uso matua o Smith sa iai foi i totonu o le sauniga, na ia tulai foi Iuga ae tei ua pau ese ma lona nofoa.
Na faamauina i lea po e tusa ma le sefulutasi tagata na tupu ai lenei mea ma na avea ma auala na faaosofia ai tagata i le ata. Na pei e ene e se tasi lenei sauniga atoa ona ua le mafai ona taofi le talie o tagata uma mo se taimi umi.
O le amataga lea o se isi laasaga o le galue o le Agaga Paia i luga o lenei failauga o le Tala Lelei. Na molimauina le liligi ifo o le Agaga Paia i lea po ma vaaia ma faalogoina le toatele o tagata ua tautatala i gagana eseese.
O le faletua masalosalo o Smith, le tamaitai o Polly, na le toe iai se tala
e toe loto maaa ai ina ua pai i ai le mana o le Agaga Paia.
Ua tele se taimi o Polly ma Smith e malaga taamilo ai mo le folafolaina o le
tala lelei. O nisi o taimi ua malaga faatasi Smith ma Polly peitai o nisi foi o taimi ua lua valaaulia e taunuu faatasi mai ona o eseese lea o i laua.
O soo se nofoaga la te lauga ai e tutupu ai lava mea matautia ma vavega. O se tasi o vaega ua masani nei ona vaaia o le matatau o tagata ma lagona le salamo i le Atua.
O se tasi aso na savali atu ai Smith i totonu o le faleoloa peitai na faateia o ia ina ua faapauu tagata i lalo ma faatoese i le Atua. Na agai atu Smith i se isi aso i luma o se faatoaga o loo galulue ai ni tina se toalua. Sa fesili atu o ia pe ua la talia Keriso e fai ma Faaola.
E lei uma atu le valaau a Smith ae laue nei tina ma valaau i le Atua e faamagalo i laua.
Talu ai ona o le tele o le taimi o Smith us faaaluina nei i le folafolaina o le afioga a le Atua, ua le toe maua ai sona taimi e faaalu i lana pisinisi ma ua avea lea ma auala ua faaletonu ai lana kamupani.
Ua tonu i le manatu o Smith o le tuuina atu atoa o lona ola ma lona taimi atoa i le folafolaina o le Tusi Paia ma lona faatuatua i le Atua na te foai mea e tusa aua le tausia o lona aiga.
O le galuega o le faatuatua e faia lea i le tatalo ma le anapogi. O mea nei e lua na faaalu ai le taimi o Smith. Sa ia loto tele i lana tatalo i le Atua lea na ia folafola ai e faapea “Le Atua e le tatau ona faaletonu ou seevae, pe masaesae foi ou ofuvae. Le Alii e, a fai ae tupu nei mea o le a ou toe foi ou te palama”.
E foliga mai o se tuugatala a se teine ma se tama nei folafolaga na faia e Smith i le Atua. Na faaalia le faamaoni o le Atua aua e lei toe foi lava Smith i lana
pisinisi palama.
Oti & Toetu
O le auauna a le Atua e le faailogaina ni aso malolo pe a oo ina sau le valaau. E vevesi tafaoga ma faiga malologa o le Kerisimasi ma le tausaga fou, sa faapea foi ona pisi Smith ma Polly i le talaiina o le faaolataga. I le tele o valaaulia ua taunuu mo le laugaina o le Afioga a le Atua sa faapea ai ona leai se malologa o le Tausaga Fou.
O le aso muamua o Ianuari 1913, na taunuu atu ai le tala faanoanoa, ua maliu Polly a o iai Smith i le nofoaga e faatali ai nofoaafi e malaga atu ai i Sikotilani. Na oso faafuasei lava le fatu o Polly ma maliu ai lava.
E taunuu atu Smith ua uma lava le ola o si ana manamea. Peitai e lei foi ai le faatuatua. Na tatalo leo tele Smith ma valaau i le suafa o Iesu Keriso e toe faaola ia Polly.
Na faateia i latou uma na iai i lea taimi i le toe nofo mai i luga o Polly. Peitai ua na o sina taimi itiiti lava na talanoa ai Smith ma si ona toalua. Na faalogoina e Smith ua saunoa le Atua i lona loto e faapea. “Ua ou manao ina ia faafoi mai Polly”.
E ui i le faigata ma le tiga o le mafutaga i le tele o tausaga ae o lea ua motusia, ae sa faapea lava ona tuuina atu loa Polly i aao o le Atua. Na maliu Polly ina ua toe taliu mai o ia mai Bowland Street i se galuega faamisiona sa faia ai.
Ua taunuu ai upu e masani ai le gagana i taimi o le valaau paia a le Atua, “Amuia le auauna o maua mai e lona matai o galue pea ma le faamaoni”.
‘E ua maliliu toa, ua maumau ai aupega o le taua’.
E faapea le molimau a nisi na faalogo o tatalo Smith e faapea, “Le Atua ia e faalua mai lou Agaga”. O le tatalo lea a Elisaia ina ua aveesea Elia.
O le tatalo lea e pei ona molimauina e nisi e faapea na avea ai ma mea e see atu ai le mana o le Atua i luga o Smith i se isi laasaga.
O le feau e tuliloaina e Smith i ana sauniga o le ‘faatuatua’. O le faatuatua e tutupu ai vavega, o le faatuatua e malolo ai le mai, o le faatuatua foi e faaolaina ai. O le matua tauave a Smith e faaupuina i upu e 4. “Tau o le Faatuatua”.
Ua faatupulaia le tele o vavega ua tutupu i taimi o sauniga. Ua talanoa ai tagata, ua fia maua ai se iloa e le toatele. O lea na mafua ai ona manatu le nusipepa a Peretania o le Daily Mirror ina ia lomia ata ma tusitusiga faapitoa e faatatau i polokalame a Smith i le itulau i luma.
Na avea lea ma ala na pei ai o se saoasaoa o se nofoaafi le oo atu o tala o
Smith Wigglesworth i pitonuu uma Peretania ma faateleina ai le taulia o le
nusipepa i pitonuu i tua o Peretania.
Ua maitauina pea le toatele o tagata e lolofi atu e fia faalogologo i le lauga a Smith atoa ai ma le fia maimoa i faamalologa ma vavega o loo faia vavega. E lele le se ae o loo lama lava le tiotala.
O nisi e omai i le fia maua o le faamalologa i o latou gasegase ae o nisi o le fia sue o ni auala e faaseseina ai pe faaleagaina ai le galuega a Smith Wigglesworth. E talitutusa lava ma tagata ia sa mulimuli ia Keriso. E iai lava le au Faresaio o loo saili masei.
Na vaaia le toatele o tagata faitio ona o vavega ua tutupu nei. O le mau a nisi o mea faatiapolo o le mau a isi o mea pepelo. E mafua le tele o nei faitioga ona o auala na faaaogaina e Smith e tatalo ai mo tagata ma faamalolo ai gasegase.
Peitai o le mau a Smith e faapea: “E le faagaeetia au i mea ou te vaai i ai.
E le faagaeetia au i mea ou te faalogo i ai, ae faagaeetia au i mea ou te
faatuatua ai”.
O le faatuatua lea na tatalo ai Smith mo se tamaitiiti ua lata o le a oti.
Na aami mai Smith e se tasi o aiga ina ia alofa mai ona ua talioti le tamaititi.
E taunuu atu Smith ae o loo tu mai le tina o le tamaitiiti i le faitotoa ma faapa mai lona le fiafia.
O le tala a le tina e faapea: “Ua maimau le taimi e te sau ai ua tuai e leai se mea e toe mafai”.
“Ua maimau le taimi e te sau ai ua tuai e leai se mea e toe mafai”
Na tali atu le tagata o le faatuatua i lea tina e faapea, “Ou te le tuai i se mea e auina ai au e le Atua”.
Na vaaia e Smith le faaletonu tele o le tulaga ua oo i ai le tamaitiiti ona o lona fatu ua vaivai.
O le tulaga sili ona faaletonu ona ua leai ma se tasi o le aiga e iai se faatuatua. Ua manatu uma le aiga ua le toe aoga se togafiti.
Ae lei faia le tatalo na fai atu le Smith i le aiga. Faatali atu i inei sei ou alu e iai le mea ou te alu i ai ona ou toe foi mai lea fai le tatalo o le faamalologa. Na le logo lelei i le finagalo o le aiga lenei saunoaga a Smith.
Na faatonuina e Smith ina ia tuu ifo i fafo ni ofu o le tamaiititi e faaofu ai ona o le toe faatuina e le Alii.
E foi mai Smith i lea afiafi, e leai lava ma se mea ua faia e le aiga. E mafua mai ua leai ma se faatuatua e tasi o totoe.
Na matua le fiafia Smith, ma ia toe faatonuina nei le aiga ina ia fai le mea na fai atu ai e fai. Na faapea atu Smith ‘Fai ni totini o le tama’.
Na tutuli uma i fafo e Smith le aiga le faatuatua lea o loo tumu ai le potu. Na fai atu nei Smith i le tamaitiiti “o le a iai se mea lelei o le a tupu e lei tupu muamua ia te oe”.
Sa toe faapea atu Smith, “Atalii o le taimi lava e papai atu ai ou lima i luga ia te oe, o le taimi foi lena e faatumuina ai le potu i le mamalu o le Alii ma o le a le mafai ona ou toe tu i luga, o le a ou pau i lalo ona o le malosi o le mamalu o le Atua”.
Ua moeiini nei mata o le tamaitiiti ma‘i ae faaee atu loa ma lima o Smith.
