O le Luitau
Ua avea le salalau o le tala i le faaaogaina e le Atua o Smith i le faamaloloina o gasegase ma auala ua sulufai mai ai le toatele ia te ia mo talosaga faapitoa.
O se tasi aso na taunuu mai ai le avefeaau i se gasegase o le toalua a se tasi o uo mamae a Smith. O le tina a tali oti ma ua le toe iai se togafiti.
Na lagona lona loto alofa i lana uo ma si ona toalua. O lea na ia afea ai le fale o se alii faifeau la te o e fai le tatalo mo le gasegase. Peitai na musu le faifeau. Na toe afea e Smith le fale o se tasi o ana uo e poto tele e tatalo ma la malaga loa.
E taunuu atu i le fale, ua matua leai lava ma se faamoemoe o totoe. Ua na o
le laue o le aiga. Talu ai o le toa tele o Smith na ia tuuina ai loa i lana uo e poto e tatalo ma lelei ana faaupuga e amata tatalo mo le tina ua tauau ina maliu.
A o faia le tatalo sa lagona le fiafia o Smith i upu o le tatalo a lana uo. O upu o lana tatalo o loo faamafanafana ai i le aiga ona o le a tuua le tina e ala i le valaau paia a le Atua.
Na taofi e Smith le tatalo a lana uo ma fai atu i le tama o le aiga e tatalo mo lona toalua. Peitai na o le tagi ma faufau ee ae leai se tala.
Ua atili ai ona ita Smith ma ia valaau atu i le leotele i le tama o le aiga. “I le suafa o le Alii taofi lau tagi”.
Na pei e mavae faafuasei atu ni timuga i le maligi o loimata o le toalua o le gasegase ina ua tei.
O le taimi lea na tago ae loa Smith i lana taga ma to ane le tamai fagu o loo iai le suauu, ma sasaa atoa le suauu i luga o le tina. O le taimi lea na vaaia ai e Smith se mea uigaese i luga o lenei tina.
Na ia vaaia se faaaliga o Keriso i luga o le tina, o loo pupula sao mai lava ia te ia ma ona foliga o loo ta‘u mai ai o loo fiafia. Na vave mou atu lenei faaaliga peitai e lei mafai ona toe tea ese mai le mafaufau o Smith le mea na ia vaaia.
Na feauga lava le mou atu o lenei faaaliga ae nofo ae i luga le fafine na faatalitali i lona oti ua matua faatumulia i le malosi ma le fiafia.
Na matua maofa le aiga ma i latou na vaaia lenei vavega e oo lava ia Smith na faigata ona ia talitonu i le mea ua tupu.
Na soifua lenei tina mo ni tausaga se tele ma toe maua nisi tamaiti. O le malosi faafouina o lenei tina na iloa i le muamua maliu lona toalua.
O se tasi o vavega na tupu ua atili ai ona faamausaliina le faatuatua o Smith i le galuega o le faamalologa i le faatuatua, o le taimi na aafia ai o ia i se gasegase faigata.
Na faafuasei i se tasi aso ona oso le manava o Smith. O le tofotofoina lea o
lona faatuatua i le Atua aua ina ua talitonu o ia i le mana faamalolo o le Atua na ia faasaina ona toe iai se fomai i totonu o lona fale. E le’i tasi o laua loto ma lona toalua i lea faaiuga peitai na faia lava le loto o Smith. Ae ina ua oso lona gasegase na iloa le le mautonu o le tina ia Polly.
Na vaaia le suiga o foliga o Smith ma ua faasolo lava ina mou atu lona malosi. O lea na ia faatonuina ai lona toalua e valaau le fomai ina ia asiasi mai ae lei oo ina maliu ina ia mafai ona ia suesue ia te ia e le ina ia saili se fofo ae ina ia puipuia Polly mai le aafia i se moliaga e ala i le maliu o lona toalua.
O le Tiapolo
Na taunuu mai le fomai i toe taimi o Smith. Na maea ana suesuega ma iloa ai
ua pa le pitogaau ma ua afaina uma ai ona totoga ma e leai se togafiti e mafai ona toe faia.
Na toe taliu le fomai, ae ua le gagana Polly ma le fanau ona o le tulaga ua oo i ai le gasegase o le tama ia Smith.
Na faateia i latou ina ua ulufale mai se tina matua ma se tasi alii talavou i totonu o le fale. O lenei tina o se tagata faatuatua i le faamalologa a le Atua e ala i le faatuatua i le suafa o Iesu Keriso.
Na ulufale mai i laua ma agai atu loa i le potu o loo taoto ai Smith. E lei tele lava ni faaupuga na faia. Na tu le tina lenei ma tatalo. Ona oso loa lea o le alii talavou i luga o le moega ma tuu ona lima i luga o le manava o Smith ma ia valaau leotele, “I le suafa o Iesu Keriso ou te faatonuina ai oe le tiapolo ina ia sau i fafo”.
Na faateia Smith i lea taimi ina ua ia faalogoina le oso ese o se mea mai lona
manava. O le taimi lava lea na faamaloloina ai o ia ma fofoe faavi ese atu le tiga o lona manava.
Na tulai Smith mai lona moega, tu i luga ma alu ae i lona toalua ma fai atu i ai, o au o le a ou alu ou te faigaluega, “ua ou malolo”. Na matua le talitonu Polly lona toalua ona o lea faatoa alu ese ma le potu i le taimi na iai le fomai. O si ona toalua sa iai i ona toe taimi peitai o lea o le a alu e faigaluega. Ua toe malosi.
E afua mai i lea aso e lei toe lagona le manava o Smith.
O le Agaga Paia
O se tasi o luitau na faatupuina ai le ola faaleagaga o Smith, o le taimi na ia faalogo ai o talanoa tagata e uiga i le aoaoga e taua o le ‘Papatisoga i le Agaga Paia’ ma le tautala i gagana eseese. Na ia naunau e fia vaai i lenei mea ae faapefea foi ona maua e le tagata lenei gagana fou ma le papatisoga fou talu ai o lona manatu o ia ua uma ona papatisoina i le agaga i le taimi na ia avea ai Keriso e fai ma ona faaola atoa ai ma le ola faapaiaina i aso uma e maua ai le papatisoga a le Agaga Paia.
Na malaga o ia i le aai o Sunderland ma lona naunautaiga na te fia maua le mana o le Agaga Paia. O i lea e faapea o loo iai lenei mea matautia o loo faia e le Agaga Paia. Peitai ina ua taunuu atu o ia sa leai se mea e faamaonia ai lenei mea.
Sa auai atu o ia i se tasi o sauniga lotu sa taitaia e le faifeau o le ekalesia Egelani o Vicar Alexander Boddy lea faapea o i lea o loo galue ai le Agaga Paia.
Na le faamalieina Smith i le leai o se mea e tupu i lenei lotu. Na ia faalavelave i le taimi o faia le sauniga ma fesili i le faifeau o le ekalesia, “Poo fea o iai le Agaga Paia ma le tautala i gagana lea ua aave atu tala peitai o lea e pe le lotu e leai se afi o mumu ai”
Sa lei faamalieina Smith i le tali na aumai ma sa faapea ona tele ana fesili ma oo ai ina ua tuli i fafo ma le falesa.
Na le avea lea ma ala e tutaia ai le naunau o Smith. Na foi o ia i le falesa o le ekalesia Salvation Army e fai ma nofoaga e tatalo ai.
Na iai se mea na tumu ia Smith a o tatalo i totonu o le falesa. E faatolu ona pau Smith i lalo ona o le mana o le Atua. Na maitauina e tagata o le Salvation Army lenei mea ona ua latou iloa le naunau o Smith ina ia tautala i gagana eseese. Na faatonuina e le Salvation Army ia Smith ina ia aua nei faia lea mea i totonu o le latou falesa. E lei malamalama foi le Salvation Army i lenei mea.
Ina ua maea le fa o aso o saili Smith i le Atua pe faapefea ona tautala i gagana, peitai e leai ma se mea na tupu.
I lona faanoanoa na ia toe foi ai i Bradford
A o agai atu o ia i lona aiga na ia manatu sei toe uia le fale o le faifeau Egelani lea na tulia o ia i fafo e faatofa i ai. Sa faamavae atu le faletua o le faifeau ia Smith ma ana upu e faapea, “Smith e le o le tautala i gagana ese e te moomia ae o le papatisoga a le Agaga Paia”
Na talosaga Smith i le faletua o le faifeau pe mafai ona tatalo mo ia ae lei alu lana malaga. Na faaee atu le lima o le faletua i le ulu o Smith ma
tatalo loa. O le taimi lea na faalogoina ai e Smith e pei o se afi ua pau mai le lagi. Ua ia faalogoina se mana ese i lona tino. Na ia vaaia foi i lea taimi se tasi o faaaliga o le satauro ma ia iloa atu Keriso i le aao
taumatau o le Tama i le lagi.
Na lagona e Smith le faatumuina o lona loto i le fiafia i lenei faaaliga ua ia vaaia o lea na ia amata ai ona ia pese ma vivii i le Alii. O le taimi
lava na matala ai le gutu o Smith na gagana mai ai o ia i se gagana fou ma uigaese.
Ua le alu sao nei Smith i lona aiga peitai ua toe foi o ia i le falesa o loo faia ai le sauniga lotu o loo taitaia e le faifeau Aledander Boddy. Na faateia le faifeau ina ua talosaga atu Smith pe mafai ona tuuina atu se avanoa se faia ai sana faamatalaga.
Na tuuina atu i ai le avanoa ma amata loa le lauga a Smith. Ua ia faamatala le mea ua tupu ia te ia ma le papatisoga a le Agaga Paia.
Na suia uma le faataitaia o le sauniga ma lona taunuuga ina ua tulai Smith.
Na vaaia e i latou na auai i le faauuga a le Atua ma lona mana i luga o Smith i lea po. Na tuuina atu le luitai e Smith mo tagata ina ia tuuina atu o latou ola i le Atua ma papatisoina. E sili atu i le 50 tagata na papatisoina ma maua le mana o le Agaga Paia i lea po ma tautala i gagana eseese. I faamaumauga o lea po e pei ona lipotia e le nusipepa o le Sunderland Daily Echo na faamauina ai e tagata le mea na tupu atoa ai ma le talaaga o le soifuaga o Smith ma vavega ua tutupu ia te ia ma lona faatuatua.
O le manatu o le toatele o i na mafua ai ona sili atu ona salalau le tala ma lauiloa ai lenei faifeau o le tala lelei ona o lona faatuatua ma lona naunau i le Atua.
Na maea le sauniga i lea po ona alu ai lea o Smith ma ta le feau faauaealesi i lona toalua e tau i ai le mea ua faia e le Agaga Paia.
Faaauauina i le vaiaso fou
