Smith Wigglesworth – O le Aposetolo o le Faatuatua Vaega 3

O le fuata ma lona lou. O le vaitau ma le mea e tupu ai. O le fesuiaiga o le tau i tausaga taitasi e pei o le taumalulu ma lau o laau ua toulu ae o le tau totogo ma le lauusiusi o laau.
E iai le vaitau o le ola faaleagaga o le tagata e iloga ona ola lauusiusi. E atagia lea i le tatalo, o le faitauina o le Tusi Paia ae o le mafuta foi i lotu ma sauniga.
Peitai e iai foi le vaitau e maalili ai le alofa i le Atua ma amata ai ona tau le vaaia uiga e pei ona faaalia i le taimi o le lauusiusi o le ola faaleagaga.
Na faapea se tulaga na oo ia Smith Wigglesworth. O le luluti tele o le taumalulu o le tausaga 1884 na maalili ai le alofa o Smith i le Atua.
E le ona o le kiona ae ua pisi tele i lana galuega na mafua ai ona leai se taimi mo le Atua.
O le vaitau malulu e masani ona papa ai paipa pe poloka ai foi paipa ona ua liu aisa le suavai ma le mafai ai ona susua paipa.
O le mafuaaga foi lea o le pisi tele o Smith ma ua tau leai se taimi e alu ai i le lotu ma mafuta ai i le Atua.
Ua avea nei o ia, o Smith le Palama, ae ua le Smith le Failauga.
Pe tusa ma le lua tausaga ua tau le alu Smith i le lotu.
Ua lelei le tamaoaiga ma le seleni maua ona o galuega peitai ua amata na leai sona fiafia ma ua amata foi ona faavesivesi lona aiga.
E ui i lea e lei faavaivai le faletua o Polly. Sa faapea ona atili saoasaoa ai le alu o lana lauga ma ua faateteleina lona lauiloa. Na faasaga atu o ia i le tatalo, ma anapogi ma le folafolaina o le Tusi Paia. Peitai o Smith ua mamao lava ma le Atua.
Na avea le lauiloa o Polly ma auala na oso ai le loto leaga ma loto tiga ia Smith.
O se tasi po na tuai mai ai Polly mai se tasi o sauniga lotu. Na ulu atu o ia i totonu o le fale ae o loo pulatoa mai Smith ua matua tumu i le ita. Na lagona atu e Polly le leo pau o Smith o faapea mai.
“O au o le Pule o le aiga lenei”. E faia lea tala ma savali atu Smith agai i le faitotoa i tua o le fale ma tatala ma fai atu ia Polly, “O le faitotoa lea e te alu ese ai ma le aiga lenei, ua sa ona e toe tu mai i le faitotoa lea”.

Peitai na galo ia Smith ona loka le faitotoa o loo i luma o le fale. Na ui atu Polly i le faitotoa i tua ma toe oso mai i le faitotoa i luma, i lona fia malie.
Na tei Smith ua toe tu mai Polly i totonu o le fale. Ua ia ata faamaela ma fai atu. ‘E lei faasaina au i le faitotoa o i luma’. Na avea lea ma ala na la toe talie faatasi ai ma uma ai le misa ma toe faalelei le la aiga.
Na avea lea ma ala na toe faaosofia ai le ola naunau o Smith i le Atua. Ua ia faatoese i le Atua ma toe ofoina atu o ia mo le galuega o le tala lelei e ala i le tatalo ma le anapogi mo le 10 aso.

O le Atua o Faamalologa
Ua toe faamalosia le ola faatuatua o Smith. Ua faaauau pea lana galuega faapalama aua le tausia o lo latou aiga. Na malaga o ia i le aai o Leeds i se tasi aso e faatau mai ana mea faigaluega. A o iai o ia i totonu o lea aai na faalogo ai i se sauniga lotu mo le faamaloloina o e mamai.
Na auai atu o ia i lenei sauniga o le faamalologa ma na faateia i vavega na tutupu.
Ua avaga atu le loto o Smith i lenei vaega o le galuega faatala lelei. Na ia toe foi mai i Bradford i lo latou aiga ma ia taumafai e saili uma tagata ua mamai ina ia ave i nei sauniga i Leeds.
O lea foi vaitaimi na aafia ai Polly si ona toalua i se gasegase. Sa ia faailoa le sauniga o le faamalologa na ia auai i ai ma sa faapea loa ona la o e sii mai i ai i le gasegase o Polly.
A o iai i le sauniga sa faapea ona faia se tatalo faapitoa mo Polly.
E lei pine ae tali ane le Atua ma malolo atoatoa ai lava o ia i lea taimi.
Sa faaauau pea le galuega a Smith o le lau o tagata i Leeds i ana malaga faapisinisi ma ia auai atu i sauniga o faamalologa.
O nei malaga e totogi uma e Smith pasese o tagata ma o se auala lava na lauiloa ai foi o ia o se alii faipisinisi faievagelia alofa.
O se tasi aso na luitauina ai Smith e le faifeau o le ekalesia i Leeds e taua o le Leeds Healing Home is Smith e mafai ona ia faia le galuega o le faamalologa i Bradford.
E leai se mafuaaga e tau lau mai ai tagata i Leeds aua o le Atua lava e tasi e ona le faamalologa poo fea le nuu ma le atunuu.
E ui i lea e lei manatu mamafa tele i ai Smith aemaise e lei iai sona faatuatua atoatoa na te mafai ona faia le galuega o le faamalologa.
Na fafau e le faifeau o le ekalesia i Leeds se avanoa ina ia unaina ai Smith
i le galuega o le faamaloloina o mai e ala i le faatuatua.
Na malaga ese lenei faifeau mo ni fonotaga ona ia tofia lea o Smith e na te vaaia le ekalesia i le vaiaso lea ma faaauauina galuega faaevagelia ma faamalologa e pei ona masani ai.
Na ioe Smith. Peitai na te le iloaina o ia o le a feagai ma le laugaina o le afioga a le Atua faapea le tatalo mo e mamai.
Ina ua amata le sauniga na oo ane i le loto o Smith e faapea o ia e tatau ona tulai mo le Upu aua e leai se tasi o sauni.
Ua maea le folafolaina o le afioga a le Atua ae ua afu malulu Smith i lona popole ma le le toa i le vaega lona lua o le sauniga.
E ui i lea na ia tuuina atu loa le avanoa poo ai se tasi o mai ina ia sau i luma mo le faamalologa.
Na muamua mai se tamaloa i ona tootoo.
O le taimi na papai atu ai lima o Smith ma tatalo mo lenei gasegase na faafuasei ai ona oso i luga lenei tamaloa ma alaga ua malolo ma ua mafai ona savali e aunoa ma ni tootoo.
Na matua faateia Smith i lenei mea o tupu. Na te lei manatu e tupu ia te ia ona o lona fefe ma lona popole na iai.
O lea lava po na vaaia ai le toatele ua faamaloloina atoatoa i le mana o talosaga i le Atua. Na maua e Smith le lototele i lea po e faalauiloa ai o le a faia i Bradford i lona nuu sauniga o faamalologa.
O le uluai po na faatumulia le sauniga. Ina ua maea le folafolaina o le Upu na faapea foi ona tuuina atu le avanoa mo le faamalologa a le Atua. E toasefululua i latou na agai mai i luma. E toasefulua foi gasegase uma nei na foi i le fale ua malolo atoatoa.
O se tasi o tamaitai sa iai se gasegase fula e tafe mai ai le vai mai lona tino i taimi uma. Na foi i le fale ina ua maea le sauniga. E siaki atu e pei na tipi e se fomai tipitipi le fula ma toe su‘i faalelei ma ua matua pe lava. Ua na o le maila o totoe.
Na amata mai i lea aso ona suia le laasaga o le faatuatua o Smith atoa ma Polly i lo laua valaauina. Ua amata nei ona faaopoopo faamalologa i taimi o a la sauniga faaevagelia.
O taimi uma e faia polokalame faaevagelia e faapipii le laupapa tele o loo tusi ai upu faapenei “I AU o le Atua o le faamalolo ia te oe”.
O se suiga matautia ua tulai mai nei i le galuega a Smith ma Polly. Ua amata ona le toe ofi le falesa i le toatele o tagata ua lolofi atu i le lotu atoa ai ma sauniga faapitoa mo faamalologa.
O le mafuaaga lea na saili ai loa se tasi o fale tele aua le galuega ua tupu.
Ina ua logo le tala o le tasi o faamalologa o se gasegase sa feagai ma Smith talu mai lona tamaitiiti, sa faapea ona faaosofia ai le toatele o gasegase
ina ia auai mai i sauniga.

O le Luitau
Ua avea le salalau o le tala i le faaaogaina e le Atua o Smith i le faamaloloina o gasegase ma auala ua sulufai mai ai le toatele ia te ia mo talosaga faapitoa.

O se tasi aso na taunuu mai ai le avefeau i se gasegase o le toalua a se tasi o uo mamae a Smith. O le tina a tali oti ma ua le toe iai se togafiti.
Na lagona lona loto alofa i lana uo ma si ona toalua. O lea na ia afea ai le fale o se alii faifeau la te o e fai le tatalo mo le gasegase.
Peitai na musu le faifeau. Na toe afea e Smith le fale o se tasi o ana uo e poto tele
e tatalo ma la malaga loa.
E taunuu atu i le fale, ua matua leai lava ma se faamoemoe o totoe. Ua na o le laue o le aiga. Talu ai o le toa tele o Smith na ia tuuina ai loa i lana uo e poto e tatalo ma lelei ana faaupuga e amata tatalo mo le tina ua tauau
ina maliu.
A o faia le tatalo sa lagona le fiafia o Smith i upu o le tatalo a lana uo. O upu o lana tatalo o loo faamafanafana ai i le aiga ona o le a tuua le tina e ala i le valaau paia a le Atua.
Na taofi e Smith le tatalo a lana uo ma fai atu i le tama o le aiga e tatalo mo lona toalua. Peitai na o le tagi ma faufau ee ae leai se tala.
Ua atili ai ona ita Smith ma ia valaau atu i se leo tele i le tama o le aiga. “I le suafa o le Alii taofi lau tagi”.
Na pei e uma faafuasei atu ni timuga o le maligi o loimata o le toalua o le gasegase ina ua tei.
O le taimi lea na tago ae loa Smith i lana taga ma to ae le tamai fagu o loo iai le suauu, ma sasaa atoa le suauu i luga o le tina. O le taimi lea na vaaia ai e Smith se mea uigaese i luga o lenei tina.

Faaauauina i le vaiaso fou