O le valaauina o le tagata e le o se mea e faatoa tupu ane ona o ni mafuaaga. Peitai e iai le talitonuga maumaututu o le tagata ma lona faasinomaga o le tagata ma lona valaauina. O lenei valaauina poo le autu o le tagata taitotasi o se mea patino mai anamua ae lei faavaeina le lalolagi i le finagalo tutasi o lo tatou Matai.
E soifua le tagata ae ua maea ona faatulagaina e le Atua le gagana ma le galuega o le savaliga ma le faatautaiga, o tagata e aafia ma le taimi o le faatinoga.
Na iloa e tagata e masani ia Smith Wigglesworth le ese o le soifua o lenei alii talavou.
Na vaaia i totonu o le falesa i taimi o sauniga, na vaaia i taimi o mafutaga tatalo, peitai ua tupu ae le soifua o Smith Wigglesworth ua iloa e lenei tama talavou o loo tumau lava lenei vaega e pei e uigaese ai o ia. Sa faigata i nisi ona faamatalaina lenei mea. O le mau foi lea a se tasi o alii faipisinisi palama ina ua feiloai ma Smith ina ua ia alu atu i lona fale e sue galuega. O le 1877 na manatu ai Smith e fia talai le finagalo o le Atua ae e moomia se galuega ma se seleni e fesoasoani ia te ia.
E iu na teena o ia e le alii faipisinisi palama peitai a o savali ese o ia mai le ofisa o lenei faipisinisi, na faateia Smith ina ua ia faalogo i le leo o faapea mai “Faatali mai”. Na faliu Smith ma iloa atu le alii faipisinisi o faapea mai, ‘e leai ni avanoa faigaluega ae faatali mai e iai se mea e ese ia te oe, ma ou te le manao e tuu atu oe e alu’.
Na amata faigaluega Smith i lea aso. Na matua uigaese le galue a Smith. E le gata i le galue maeaea ma lelei ana galuega toe vave. Na uma galuega ae lei oo i taimi e tatau ona uma ai. Ua leai se galuega ma na manatu loa o ia e magala ese atu e saili galuega.
Na taunuu o ia i Liverpool, o se tasi o aai tele i Peretania. Ua iai le agavaa ma le poto masani i galuega palama. Ae o le mea e sili ma uigaese o le faauuga a le Atua o loo i luga o lenei talavou.
O lenei faauuga ma le valaauina na vaaia foi e tagata i totonu o Liverpool ina ua amata ona talatalanoa Smith i tamaiti i totonu o lea aai. E foliga mai o taimi uma e tautala ai Smith e pei o se sila le lalata mai o tamaiti e fia faalogologo i tala o le Tusi Paia. Na lauga Smith i nei tamaiti ma ua latou o atu ma tau atu i isi tamaiti ma ua amata ona tupu tele e pei o se aoga le lolofi mai o tamaiti. O le tele o nei tamaiti e omai i aiga matitiva. E leai ni meaai ma toe le lelei o latou ofu. Na oso le lagona alofa o Smith i nei tamaiti. O tupe uma na ia maua i ana galuega sa ia faaaluina e fafaga ai ma faaofu nei tamaiti matitiva.
Ua amata nei ona lauiloa Smith ona o ana galuega i le fafagaina o tamaiti ma le folafolaina o le Afioga a le Atua. Ua amata foi ona valaauina o ia e lauga i sauniga ma mafutaga faale-Tusi Paia. O le ekalesia a le Salvation Army na o latou tuuina le avanoa ia Smith e faaaogaina ai le meaalofa o le folafolaina o le tala lelei i se auala na faigofie ai ona lauiloa ma moomia o ia aua le folafolaina o le Afioga a le Atua.
Ua faatuputeleina le naunau o Smith i le Atua ma lona galala i mataupu faaleagaga. O le tele o aso e anapogi ai ma tatalo. O Aso Sa uma e le ai o ia ae tuuina atu lea aso i le tatalo ma le anapogi ina ia liliu tagata i le Atua e ala i lana lauga.
Talu ai o ia o se tagata e lei lelei ona aoaoina, sa iai vaega sa ia moomoo i ai ina ia maua. Na ia manatu e fia maua le lauga lelei ma le malamalama i le Tusi Paia e pei o le tele o faifeau. Sa ia naunau ina ia toatele tagata e liliu i le Atua ma faaolaina i taimi e lauga ai. Sa ia naunau ia mafai ona faaaogaina o ia e le Atua i se tulaga faapitoa ona o le lava o lona aoaoina.
O le taimi e amata ai le lauga a Smith e tagi ai o ia i luma o le Atua atoa ai ma le aulotu. O lona loto nutimomoia ma le faamaualalo ma le agamalu na vaaia e tagata e avea lea ma se tasi o vaega na faaosofia ai le lagona salamo i le tele o tagata i taimi e laugaina ai le afioga a le Atua.
Na faauo atu Smith i se tamaitai talavou e suafa ia Polly Featherston. O Polly e tupuga mai se aiga e lelei lo latou tamaoaiga. O se aiga lolotu i le ekalesia Metotisi. Sa iai le talitonuga o Polly i le Atua, peitai e lei aafia lona olaga i le ituaiga o pulunaunau lea e faananau i ai Smith.
Sa iai se aso sa asiasi atu Polly i le aai o Bradford ma na ia faalogoina le leo o po o se faaili o loo taina ma faasavali i totonu o le taulaga.
O le vaitau lea na iloga ai le tulai mai o le ekalesia o le Salvation Army. Na latou faaaogaina tele faaili pu i ia onapo e oo mai lava i nei aso.
Sa aamu Polly i nei tagata e foliga mai o ni tagata e leaga o latou ulu le savavali i lenei faaili ma pepese i pese tau i le Atua.
E ui i lea ae sa mulimuli atu o ia i le solo ma taunuu i le nofoaga na faia ai le mafutaga poo le polokalame faaevagelia.
I lea mafutaga sa laugaina ai le mataupu o le faaolataga e ala i le toto o Keriso. O le faievagelia e suafa ia Tillie Smith na lauga folafolaina le feau i lea aso.
Na matua oo i ooga o le loto o Polly le feau ma na ia tuu lona nofoa sa nofo ai i le pito i tua ma agai atu i luma i le taimi o le sauniga ua tootuli ma salamo. Na agai atu Tillie Smith ma tatalo mo le tamatai o Polly. O le aso lava lea na fanaufouina ai o ia ma tuuina atu atoa lona ola mo Keriso.
A o faia lenei sauniga atoa ai ma le taimi na talia ai e Polly le Alii o Iesu Keriso, ae o loo mataia uma lava e Smith Wigglesworth lea na mulimuli ane faaipoipo ia Polly.
Na tuua e Polly lea nofoaga ma agai atu i Sikotilani ma galuega faaevagelia i lalo o le ekalesia Salvation Army.
O le tausaga e 1882, o le taimi lea ua 22 tausaga o Polly na faaipoipo atu ai ia Smith ua 23 tausaga. E lei manatu Smith e taofia le valaauina a le Atua i lona toalua talavou. Na ia unaina Polly ina ia lauga le afioga a le Atua ae o le a galue pea ia faapalama e tausi ai lo latou aiga.
I totonu o le aiga o Wigglesworth sa tele le taimi o le tina o Polly e faaaluina i le laugaina o le Afioga a le Atua ona e manatu i laua e sili atu le lelei o le lauga a Polly. E iai le talitonuga ona sa aoaoina lelei o ia.
O le tele o taimi e amata ai e Polly le lauga ae o Smith e faaiuina le sauniga. I se tusitusiga a Smith na ia taua ai e faapea, “O lou toalua na te lafoina le upega ae o ia na te aoina mai”.
O le vaitausaga o le 1884 na faateteleina ai le taumalulu ma na matua moomia tele le galuega faapalama i totonu o Bradford. Ua avea lea ma ala na tele ai se taimi o Smith e galue ai i le taiina ma le lipeaina o paipa. Pe tusa ma le lua tausaga ua tau le alu Smith i le lotu. Ua lelei le tamaoaiga ma le seleni maua ona o galuega peitai ua amata ona leai sona fiafia i le galuega faaevagelia.
E ui i lea e lei vaivai ai Polly. Sa faapea ona atili saoasaoa ai le alu o le lauga a Polly ma ua faateteleina lona lauiloa. Na faasaga atu o ia i le tatalo, ma anapogi ma le folafolaina o le Tusi Paia. Peitai o Smith ua mamao lava ma le Atua.
Na avea le lauiloa o Polly ma auala na oso ai le loto leaga ma loto tiga ia Smith.
O se tasi po na tuai mai ai Polly mai se tasi o sauniga lotu. Na ulu atu o ia i totonu o le fale ae o loo pulatoa mai Smith ua matua tumu i le ita. Na lagona atu e Polly le leo pau o Smith o faapea mai. “O au o le Pule o le aiga lenei”. Ona ia tatalaina lea o le faitotoa i tua o le fale ma tuli ese Polly mai le lo latou aiga.
Faaauauina i le vaiaso fou
