“Sipi ma Fifilemu”…fautua Tuilaepa ia Palusalue

Ua avea fefaaaliga o finagalo o le taitai o le Malo ma le taitai o le Itu agai i le vāvāō o tusitala ma le aufaasalalau i le fautuaga ua ave i le Loia sili e fausia ai se auivi poo se ata faataitai e faavae ma faatū ai se fono faatonutonu mo lea tomai faapitoa i lo tatou atunuu, poo se media council, ma pogai o le nunumi o le mataupu e pei ona faaalia e nisi e iai lo latou silafia i le mataupu lenei.
O le feiloaiga a le taitai o le Itu agai ma tusitala na faaalia ai atugaluga o Palusalue i le filifilia e le susuga Uale e le autusitala, o ia foi o loo faauluulu i ai le ofisa o fesootaiga ma faamatalaga a le Malo le Press Secretariat ma pelesetene o le asosi a tusitala, ona e iai aafiaga o lea tamalii i lona avea ai ma se tagata faigaluega sinia a le Malo.
Faaalia e le taitai o le Itu agai, e tatau ona tutoatasi le asosi i ana galuega ae o loo atugalu tele i le unai mai a le malo e faatū se media council poo se fono faatonutonu mo le aufaasalalau ma tusitala, ae e lē o se fuafuaga e tatau ona aiāina ma aafia ai fua le malo.
Ua tuua‘ia ai e le taitai o le Itu agai aafiaga o le pelesetene o le asosi a tusitala le JAWS i le gaioiga a le malo, aemaise ua tuua‘ia ai foi e Palusalue le filifilia e le asosi o lea tamalii o loo faufautua i le Palemia.
Ina ua fesiligia le susuga Uale Papalii i sona finagalo e tusa ai ma atugaluga o le Itu agai, na ia faaalia ai e sa‘o e lua ona pulou o se tagata faigaluega a le malo, ma le pelesetene o le JAWS, ae i le faatinoga o lana galuega ma ona tiute e fai mea faalogo i le Palemia o le taitai o le Malo i se mea e finagalo ai, ae faapena foi ona tu malosi e unaia le galuega a le aufaasalalau ma tusitala i le tulaga tutoatasi e aunoa ma se aafia ai fua o ni faiga faaupufai poo polokiki.
O atugaluga foi o le afioga i le taitai o le Itu agai na aumai ai se finagalo tusitusia o le afioga i le Palemia, ma ia fautuaina ai Palusalue e aua le soona saunoa i le mataupu ona e leai sona silafia tele i le amataga o le fuafuaga e faatū se media council.
O le asosi o tusitala na amatamea i le tausaga e 2004, a o avea le susuga Tipi Autagavaia ma pelesetene a o faigaluega foi lea sui o le asosi i le nusipepa o le Samoa Observer, e pei ona faaalia e le Palemia.
Peitai o le umi ona taatia o lea galuega sa aumai ai e le asosi i lea vaitaimi nisi mai Peletania e fesoasoani e faatū se media council, o lea ua sefulu tausaga e lē o toe faalogoina pe faagaioi loa ona faatū.
O le fautuaga a le Palemia i le taitai o le Itu agai, ia tau a o le sipi ma fifilemu (just zip it and be quiet). E talitonu le Palemia e lē o maua e Palusalue ni faamatalaga atoatoa i le mataupu fua i lona soona talanoa i ai, ae leai sona silafia atoa i ai.
O le mae‘a o le lua tausaga talu mai le tausaga e 2004 na mae‘a ona fausia ai se taiala poo se media code of practice i le poloketi a le JAWS ma sui o le Thompson Foundationa mai Peletania, na taatia atu ai lea taiala i le asosi o tusitala mo le sainia ma talia.
O le vaega lona lua o le poloketi o le faatūina o le media council poo le fono faatonu. O le susuga Uale Papalii le pelesetene o loo iai nei a le asosi ma lana komiti faafoe na tuu i ai le vaega lona lua o le poloketi mo le faaauauina peitai, e lei toe fono lava le asoasi talu mai ia tausaga ua mavae e talanoa ai poo fea ua oo i ai le media council.
O le tausaga ua mavae na ave ai le fautuaga a le Palemia i le Komisi o le toe fuataina o tulafono e silasila i le fausia o se media council.     O le taimi tonu lea na amata toe lalaga ai le mataupu ma toe pisi ai le Komiti faafoe a le JAWS e faia feutanaiga ma le Malo, lea ua oo mai i le masina nei, ae toe ave se fautuaga a le Palemia i le Loia sili ina ia silasila loa e fausia se auivi poo se ata faataitai e fausia ai se fono faatonu ma ua malilie ai le komiti faafoe a le JAWS e galulue faatasi ma le Loia sili a le Malo e fausia se auivi.