Ua saunoa le Palemia, Afioga Tuilaepa Sailele Malielegaoi i faigata o loo feagai ai le Malo ma le Faatupeina o le Pacific Games i Samoa i le tausaga nei. O le popolega a le Malo ina ua lē ausia e le Faalapotopotoga ona maua le seleni o loo manaomia e faatupe ai le faamoemoe. O le aofaiga lea e $11 miliona Samoa.
Mo le taimi nei, e na’o le $5.4 miliona le tupe ua i taga mo le Pacific Games. O lea aofaiga ua maua mai i kamupani lagolago e iai le Digicel, FEXCO, Samoa Commercial Bank ma isi.
O le ripoti mai le Kapeneta ua faailoai ai o le kamupani telefoni ma initaneti o le Digicel lea ua avea ma kamupani autu lagolago o le Pacific Games. O lana fesoasoani e $3 miliona – e aofia ai auaunaga lagolago ma le vaega tupe. E lē o mauiloa pe fia tonu le aofaiga o le seleni o le a tauave e le Digicel i le Pacific Games, ae o le ā foi le vaevaega o le tino-i-tupe ma auaunaga lagolago o le a faitauina mo le Digicel.
O le isi kamupani o le Samoa Commercial Bank ma le $2 miliona le vaega tupe. O le tautua a le SCB ua ma’oti ai e lē o auai le faletupe tele i totonu o le atunuu, le ANZ Bank i le faamoemoe mo le Pacific Games.
Ua ioe foi ma le kamupani eletise a le Malo e soosoo tau’au ma le Malo i le Pacific Games. E $480,000.00 le seleni ua ofoina e le E.P.C. Faaopoopo iai ma le fesoasoani a le FEXCO Samoa Ltd, le kamupani Inisiua ma Nonoga Tupe i Apia – e $200,000.00 le seleni ua ofoina e le FEXCO.
O le saunoaga la a le Palemia na ia faapea ai e lē o lava le tupe ua sailia e le Komiti o le Taaloga. Auā o le aofaiga e faatino ai le faamoemoe e $11 miliona Samoa.
Na ta’ua ai e le PM o loo iai pea lona naunautaiga e maua le seleni atoa mo le faatupeina o le Pacific Games.
Nofoaga i Faleula mo Tagata Taaalo
E lē na’o le seleni ua gafa ma le Komiti i faaletonu o le taaloga, ae o le faamoemoe na iai e faaaogā Faletalimalo e nonofo ai tagata taaalo ua lē ausia lea ina ua lē sainia e le tele o faletalimalo le Feagaiga na tusia e le Samoa Tourism Authority ma le Samoa Hotel Association ma le Pacific Games mo le talimalo lelei mo atunuu i fafo.
O le feagaiga na ofoina ai e le Pacific Games i faletalimalo e totogi i le masina o Tesema 2018 le ‘afa o le tau o potu mo Iulai, ae o le isi ‘afa e totogi i le masina o Iuni. Ua opogi loa e faletalimalo laiti lea ofa lelei, auā o le tupe na maua i le masina ua tea – ae o fale talimalo tetele e iai le Taumeasina Island Resort, Sheraton Hotel ma Resort, ma le Tanoa Tusitala Hotel e lei sainia e latou le faiga Feagaiga a le STA, SHA ma le Pacific Games.
Ua ala ai ona toe sailia e le Komiti se isi nofoaga mo tagata taaalo e nonofo ai mo le taaloga.
Ua talia ai e Ekalesia Metotisi le tagisa a le Komiti, ma o le a a avea nofoaga a le Ekalesia i Faleula ma nofoaga mo tagata taaalo uma. O lenei suiga ua faamaonia e le Minisita o Taaloga, A’oga ma Aganuu Loau Keneti Sio.
O ia foi o le Ta’ita’ifono o le Komiti Faafoe o le Pacific Games.
