O le saoasaoa o le atamai faaneionapo ua faigofie ai nisi vaega o le soifuaga e pei o telefoni feaveai ma talanoaga i luga o upega tafailagi. Ae peitai ua faaaoga foi e le aufaomea ma tagata gaoi e aveese mai ai faamaumauga o lou soifuaga e patino ia oe. (identity theft)
O le tulaga ogaoga e oo i ai nei solitulafono o le faaaogaina lea e tagata nei o lou suafa e faia ai ni nonogatupe ma ni credit cards i le isi itu o le lalolagi e aunoa ma lou silafia. Faatoa faateia lava oe ina ua lafo mai se pili tele e totogi atu i lou suafa e aunoa ma lou silafia.
O soo se vaega o le lalolagi e lalafi mai ai i latou nei ia latou komepiuta. Ua saisaia foi e leoleo nisi mai Nigeria, Europa tutotonu, Holani ma Rusia i nei faiga solitulafono.
Faailoa e Brian Hay le alii leoleo sinia o loo faauluulu i ai lenei Vaega o Sailiiliga, ua matua taatele le taufaasese o le augaoi faamatalaga i luga o telefoni feaveai, telefoni fale, imeli ma pusa meli. Pe a latou valaau mai e fesili muamua mo lou igoa atoa, aso fanau ma lou tuatusi ma le telefoni.
E le gata i lea o imeli taufaasese e saini ai lou igoa ma ofo mai ai ni faailoga o tauvaga e pei o lulu ma lotto ua e manumalo ai e aunoa ma se faatumuina ai o sau pepa. O auala uma ia ua utagia mai ai le atunuu ina ia mataala i ai.
E le gata i lea o tagata e asiasi atu i maota e faafoliga o ni tagata faatau telefoni, eletise ma isi oloa ae peitai o loo sailiili mo faamaumauga puipuia a tagata taitoatasi e faaaoga mo ni solitulafono.
I Ausetalia ua toatele foi ua molia ona o le taufaasese i le matagaluega o le Centrelinki i le oo atu i fanuaoti ma auina mai ai suafa ma aso fanau o tagata ua maliliu ma faaaoga e maua ai ni penefiti.
O le tulaga faanoanoa ua tulai mai e iai se isi faiga maoae ua oo i ai le osofaiga a le vaega leaga.
Ua mafai nei ona o latou feoai i taavale ma sa latou masini e tapue uma atu ai nei faamaumauga mai komepiuta a tagata o loo i totonu o maota ma laoa e aunoa ma le tuua e le vaega leaga o le foeuli. O lona uiga e mafai ona o latou gaoia faamaumauga a aiga o loo teu i totonu o a latou masini i le na o le pasi ane lava i luga o le auala i lea pitonuu sosoo ma le isi pitonuu. E faapei o le maneta poo le sila pe a tuuina atu i se faaputuga fao poo ni pine e taufai pipii i ai fao ma pine.
Ua faaigoaina lenei faiga fou e kegi o le (War-Driving) ma o kegi leaga i Amerika ua fai tauvaga a taavale taitasi poo ai e tele a latou faamaumauga e tapue i totonu o le itula ma faatino ai le tele o solitulafono.
Ua le toe gole se vaega i luga o le upega tafailagi i le faasaolo a le au gaoi. Pau le fautuaga a le Matagaluega o Leoleo a Niu Sa Uelese ma Kuiniselani, afai e vaai le toesea o tupe mai tusitupe e le mautinoa poo ai o alu i ai, faafesootai vave loa lau faletupe ma fesuiai ma fai ni numera faigata e PIN o imeli ma teugatupe e puipui ai ma aua le tali i fesili a tagata vilivili soo mai i lou aso fanau, tuatusi, igoa atoa ma numera o lau tusitupe.
