I le suafa o Iesu Keriso le Alii ma le Faaola ou te toe faatalofa atu ai i le mamalu o le aufaitau aemaise ai o paaga masani a le tatou Taiala o le vaiaso.
E iai la le talitonuga o loo maualuga pea le agalelei ma le alofa o le Atua i lo outou soifua. Faamalo le folau, malo foi le onosai i luitau o loo feagai ai i lea vaiaso ma lea vaiaso.
O le mea moni a aunoa i tatou ma le Atua, e le mafai ona tatou faia o se mea e tasi. A aunoa Ieova i o tatou aiga, ekalesia ma faapotopotoga, e galulue fua lava i tatou.
O le mea lea e ao ai ona fausia o tatou aiga ia malolosi, aua a oo mai fita ma faafitauli, a ua mafai ona tatou tulai ma tetee atu i le fili ma ana ‘au.
O le tatalo a le Taiala, poo fea lava le vaipanoa o e maua mai ai lenei tusitusiga, ia aoga ma avea nei tusitusiga ma faamalosiau ia te oe. Ia avea o se fatu lelei e luluina i lou loto ma fua mai ai ni fua lelei mo le viiga o le Atua.
Tusi Faitau: 1 Ioane 4:21 “O lenei foi le poloaiga na tatou maua mai ia te ia, o le alofa i le Atua ia alofa foi o ia i lona uso.”
Sa ou taua i le vaiaso ua tuanai atu, o le alofa moni o lou faamuamua lea o manaoga ma lagona o nisi tagata nai lo ou lava manao. O le alofa o le foai atu i nisi tagata e aunoa lava ma sou manao e toe taui mai pe toe foai mai se mea. O le alofa o lou faitaulaga lea mo ni isi.
E moomia lava le matua aoaoina lelei i tatou uma ina ia tatou matua malamalama lelei i le loloto ma le lautele o le alofa o le Atua. Aua foi o le alofa moni e faafeagai lea ma o tatou lagona faapito ma manatu ua sili i tatou i lo isi.
O le vaiaso na tuanai nei sa ou taua ai o le amataga o le toe atiinaeina o le alofa moni; e tatau ona malamalama lelei i le loloto ma le lautele o le alofa o le Atua ia i tatou.
O le tala a le Tusi Paia e le faataga alofa le Atua ia i tatou. E le fuatasi le alofa o le Atua ia te i tatou, peitai e alofa foi le Atua i tagata uma lava. Ua finagalo foi le Atua ina ia faapea ona fealofani lana fanau.
Ua fetalai mai le Atua ia tatou filifili e alolofa atu. Ua faapea foi ona poloaina i tatou e le Atua ina ia tatou alolofa atu i le au uso uma, e tusa lava poo le a le faigata o o tatou lagona poo le faigata foi o amio ma uiga o isi tagata e faaali mai. A tatou filifili e faatino le alofa, o lo tatou talia foi lea o poloaiga a le Atua.
Peitai ua fetalai manino le Atua ina ia tatou filifili e alofa atu i o tatou uso. O lona uiga afai tatou te tausi i poloaiga a le Atua, e faaali atu ai i le lalolagi o i tatou lava o tagata o le Atua, o le fanau a le Atua, poo le aiga o le Atua. I lenei vaega o le tatou Taiala o le vaiaso ou te fia faasoa atu ai i ni vaega se fitu e faaali atu ai i le lalolagi o oe moni o le tagata e te alofa i le Atua faatasi ai ma ou uso.
O lo tatou alolofa i le au uso ua faaalia ai o i tatou:
Ua fanau mai i le Atua ma ua e iloa foi le Atua (f7& 8). O le Atua o le alofa lava Ia. Afai e alofa faamaoni se tagata i le Atua, o lona uiga ua filifili lea tagata e talia le natura o le Atua. E alofa le Atua i tagata uma. Tagata mauoloa ma le tagata mativa, tagata malosi ma le tagata vaivai, tagata taualoa ma le tagata e le taualoa, tagata lelei atoa ai ma le tagata leaga.
O loo faapea foi ona lapataia i tatou uma i uiga o le tagata e le alofa i isi tagata, na te le iloa le Atua. O nisi uiga o lea tagata; e manatu faapito, e nofo ma vivii ia, e ita i lona uso, faatasi ai ma nisi uiga ua masani ai le toatele.
Ua tatou vaai tino i le alofa o le Atua (f9-11). O le mea lava lea ua faaalia mai ai le alofa o le Atua ia tei tatou, ina ua auina mai e le Atua lona Alo e toatasi i le lalolagi ina ia tatou ola ia te ia.
Le au pele e, afai ua faapea ona alofa mai o le Atua ia te i tatou, e tatau ai ona tatou alolofa atu. Ioe, le au uso e, e moomia lo tatou alolofa atu i isi tagata.
Ua ia te i tatou le Agaga Paia (f12-13).O le mea lava lenei ua tatou iloa ai ua tumau i tatou i totonu ia te ia, o ia foi i totonu ia i tatou, aua o lona Agaga ua ia foaiina mai ia te i tatou. O le Agaga Paia ua auina mai e le Atua, o le maufaailoga o le alofa o le Atua i le tagata agasala.
E moni le ta molimau ma le tautinoga (f14-16). ‘O le Atua o le alofa lava Ia.’ Ua matou vaaia, ua matou molimau ai foi, na auina mai e le Tama o le Alo, o le Faaola o le lalolagi.
O i tatou foi, ua tatou iloa ma ua faatuatua i le alofa ua i le Atua ia te i tatou.
Ua tatou maua le loto tele i le aso faamasino (f17). O le mea lava lenei ua atoatoa ai le alofa ia te i tatou, ina ia tatou maua le faamalosi i le aso o le faamasinoga; aua e pei o ia, e faapea foi i tatou i lenei lalolagi.
Ua faasaoloto i tatou e le Atua mai le fefe (f18). E leai se fefe i le alofa, a o le alofa atoatoa e faateaeseina ai le fefe; aua o le mea e tiga le fefe; o le ua fefe, e le faaatoatoaina o ia i le alofa. O i tatou ua tatou alolofa ia te ia, aua na ia muai alofa mai ia te i tatou.
Ua tatou alolofa i le Atua (f19-21). E faapefea ona tatou iloa ua ia te i tatou le alofa o le Atua? Na ia muai alofa mai ia te i tatou (f19). E le ita i lona lava uso (f20). Tausi i ana poloaiga (f21).
Ou te manatu Samoa e, o se avanoa lelei tele lenei e toe timata ai le upega ma toe fetuunai ane poo faapefea mai oe i lenei mataupu o le alofa.
O le tatalo a le Taiala, ia avea i tatou ma e faataunuuina lenei vaega o ana poloaiga, ua faapea mai, ‘O lē alofa i le Atua, ia alofa foi o ia i lona uso.’
Alofa le Atua ma faamalamalama mai lona alofa ia i tatou, ina ia mafai ona tatou alolofa atu ai i o tatou uso ua avea pea ma o tatou fili.
Ia manuia tele le vaiaso Samoa!