O loo matauina lava le lē o faaitiitia o le agaga foai ma le agaga fia tautua nuu, tautua atunuu, aemaise foi le tautua ekalesia, o le mamalu o Samoa o alaala ma papaaao i Niu Sila nei.
E le o asa lava se masina ma ni malaga mai lo tatou atunuu i Samoa, i faamoemoe e pei o sailiga seleni, ona o le fia faatinoina lava o nisi o galuega i totonu o afioaaga, e pei o malumalu tapuai, maota o faafeagaiga, o faleaoga, poo nisi foi o galuega fai faatasi a afioaga taitasi.
E pei foi la ona iai le faamoemoe sa alo atu i ai le afioaga o Fasitoo-uta, i le latou Posiva sa faia i le Aso Toonai na tea nei i le Hall o le Mataaga o Mea Lelei i Grey Lynn.
O lenei Posiva sa auai faatasi ai le aumalaga mai Samoa ua avea ai i latou ma sui o le afioaga, lea na taitaia mai e le afioga i le Minisita o Leoleo ma Falepuipui ma le Tineimu, Afioga Toleafoa Faafisi, faapea le sui faipule le Afioga Aiono Tile Gafa ma le mamalu o sui o le afioaga.
O le faamoemoe o le faiga malaga, e mo le sailia lea o se seleni aua le fausiaina o le faleaoga mo le aoaoina o fanau a le afioaga.
Na faatalia ma le talisapaia lenei faiga malaga e le mafutaga foi a le afioaga i Niu Sila nei, lea o loo taitaifono ai le afioga ia Aiono Pulumelo Faaea, faapea le fofoga o le mafutaga ia Ape Moemausu, le teutupe ia Tafa Auola aemaise o le mamalu ma le paia lasilasi o le afioaga sa latou faafoeina lenei sailiga tupe, ae tainane le mamalu i le paia lasilasi o uo ma e masani sa faatasi ai.
Na faaiuina manuia lenei aso tuupoina o le afioaga, ma o le seleni na maua mai lea sailiga tupe e tusa ma le $82,632. O se aso o le vaiaso nei o le a toe taliu ai le faiga malaga i Samoa.
O faamatalaga na tuuina mai
