O se vaitaimi o le tausaga e 2007, 2008, 2009 e oo mai i le 2010 ma se vaitaimi o le 2011 na tulai mai ai se gaioiga solitulafono i le vaega o loo tapenaina totogi o le aufaigaluega e silia i le tasi le afe lima selau, o le Kamupani pito toatele tagata o loo faafaigaluega ai, le Yasaki Samoa i Vaitele. O lea gaioiga e pei ona faaalia i faamaumauga a leoleo ua tuuina atu i le faamasinoga, na toe tuu ai suafa o nisi tagata sa faigaluega ae ua faamalolo i le lisi o tagata faigaluega o loo galulue pea pe a oo ina faagaioi totogi i faaiuga o vaiaso taitasi.
O se suesuega faalotoifale i tupe a le kamupani na maua ai le faaletonu e pei ona faaalia i se lipoti a se suetusi sa silasila i le faaaogaina o tupe a le kamupani. O tagata sa faigaluega ae ua tetea ma faamalolo e pei ona faaalia i se tolaulauga i le faamasinoga ua toe ave suafa i le lisi o le totogi, ona tuu lea i ai o ni totogi e maualuga atu e pei o le $2 tala ma sene i le itula ae ua sii e tusa ma faamaumauga i le $3.50 sene ma le $4 tala i le itula.
O nisi o totogi sa maua ai e silia i le tai afe tala. O seleni uma ia ua maua ai le aofaiga e $298,150 tala ua gaoia ma toesea a le kamupani mai lea gaioiga ua tuuaia ai ni tagata faigaluega se toalua sa feagai ma le faia o totogi. O le isi toatasi na tetee i moliaga e 42 o le gaoi a o avea ma tagata faigaluega ma le faasese o faamaumauga tau tupe, peitai na suia lana tetee i le ioe i moliaga uma, ma ua mae‘a ona faasala e le faamasinoga lea ua tuli lona 4 tausaga i le falepuipui.
O le tasi o loo molia o Sila Faiva Leilua, o loo tumau pea lana tetee i moliaga uma e 42 e pei ona tulai le alii loia le susuga Terry Brunt mo ia. O le valaauina o molimau a 16 a leoleo na muamua ai ni molimau a nisi o le au faigaluega a le Yasaki lea sa faamaonia ai e ia molimau, le toesea o ni vaegatupe o totogi e ala i le toe tuu o suafa o nisi o tagata faigaluega ua faamalolo i le lisi o tagata totogi o le kamupani.
E le gata ina faia lea gaioiga ae sa faaalia foi o le aso lava e tuu ai ni suafa o ia tagata, o le aso foi lea e toe titina ma aveesea ai pe a uma ona saini ma ave seleni. Peitai e lei maua e ia tagata ia tupe ae o i laua o loo molia ua tuuaia na la faotaga ia seleni o meatotino a le kamupani o le Yasaki. O le aso 26 o Aperila ua toe tolopo i ai le valaauina o molimau a leoleo i lenei mataupu.
E le o se mataupu muamua lea ua aafia ai seleni a le Yasaki Samoa ua oo i le faamasinoga. O nisi o tagata faigaluega sa molia ai ua faamaonia o latou moliaga ma sa faasala i le falepuipui. O se isi mataupu sa oo i le faamasinoga o ni alii faigaluega na latou ave faagaoi ni uaea kopa ma toe faatau i kamupani o loo lauina ia vaega i fafo mo le faaliliuina i nisi oloa.
