Silia i le 2 miliona tala le fesoasoani a le EFKS

O le tea o le lua i le aoauli le Aso Faraile (taimi Niu Sila) na maea ai le fono faatopetope na valaauina a le Ekalesia Faapotopotoga Kerisiano Samoa e pei ona faatautaia i le Maota o lana Tupulaga i Mulinuu.
O se fonotaga e faatoa valaau lava pe a silasila atu le Ekalesia ua iai se manaoga ogaoga e tatau ona tali atu iai le Ekalesia.
O le tuutuuga lea o lona Faavae, ma le mafuaaga na le vave faatautaia ma faalauiloa ai se fesoasoani a le Ekalesia Kerisiano aupito tele i totonu o Samoa.
Ua tele faamatalaga ua faia faasaga i le Ekalesia ona o le tuai o lana tali atu i le tulai mai ai o le faalavelave faalenatura i le vaiaso ua tuanai.
E maea le fonotaga a le Komiti faapitoa a le Ekalesia ua mautu lana maliega i le tinoitupe e $2 miliona tala ma le faaopoopoga aua le tali atu ai i galuega laveai ma fesoasoani ua faatautaia nei e le atunuu mo i latou ua aafia i lenei faalavelave matautia.
Faaalia e le Failautusi Aoao o le Ekalesia, Rev. Dr Iutisone Salevao, o le fesoasoani lenei o le a ave ai le $1 miliona (tala) i le Malo o Samoa aua le feagai ai ma ana galuega toe faaleleia i aiga ma afioaga ua aafia i le galulolo.
O le isi $1 miliona (tala) e ave sao lava i aiga e tapuai i le EFKS ua afaina. Ua faaagaga foi le isi $200,000 mo nisi manaoga o sui lotu a le Ekalesia ma o le a faaauala atu i aulotu e tapa se isi fesoasoani.
Ua faapea foi ona pasia e le Ekalesia se meaalofa o le a ave sao mo aoaoga a fanau a le Ekalesia ua aafia o latou aiga i le galulolo ma ua faigata ai le tulaga i pili o aoga.
I faitioga ua maea faaleo ma tusitusi mai ai le atunuu e faatatau i le Ekalesia na taua ai e Rev. Dr Iutisone, e le tali mai fua le ekalesia i se faagaulemalie a ni nai tagata toaitiiti ona e le mafai lava e le Ekalesia ona soona oso i ni faaiuga tetele faapenei sei vagana ua maea lana fono faatopetope e pei ona faatino i le faaiuga o le vaiaso.
O se tasi o potu o le fogafale i lalo a le Ioane Viliamu i Tamaligi, na faaputu ai taga araisa, pusa apa, o isi taumafa tuuapa atoa ai ma ato lavalava mo aiga ua mafatia ma e tasi le aso na faaputu ai ae oo mai i fafo nei meaalofa ua matua tumu le potu atoa. 
O aulotu uma, na tapa lo latou aao mafola i ia fesoasoani. O le tele lava o aulotu ma pulega a le Ekalesia na ave lava a latou fesoasoani i le leitiofoni ma le telefoni tele lea na faatautaia e le TVOne ma le Radio 2AP i le vaiaso na sosoo ai ma le tsunami ma na tatala lava le avanoa e foai ai tagata taitoatasi o le ekalesia i ia auala peitai o le fesoasoani lea na faalauiloa i le faaiuga o le vaiaso na tea nei, o le foai aloaia lea a le Ekalesia.
O le Ekalesia a le Metotisi na taua e lipoti na foai le latou fesoasoani i le vaiaso lona lua o le faalavelave ma o le tupe na tauaao atu atoa ai taumafa ma lavalava mo lenei faamoemoe.
O le Ekalesia a Iesu Keriso o le Au Paia o Aso e Gata Ai lea na taunuu mai i le vaiaso na tea nei se vaalele tele o le DC 10 a le Fuavaatau a Amerika ma se fesoasoani tele mai i le Ekalesia i Amerika ae o le tasi lea o aulotu na muamua lava faagasolo ana fesoasoani mai i ona sui aulotu i totonu lava o Samoa aua le vave tali atu ai i mafatiaga o afioaga ua aafia i lea faalavelave faalenatura.
O le Aso Faraile na tea nei na faagasolo ai le tufatufa atu o le foai a sui o le EFKS atoa ai ma le fesoasoani lea na taunuu mai a le Ekalesia a Iesu Keriso o le Au Paia o Aso e Gata Ai. 
E le o iai se ekalesia e lei faatinoa sana fesoasoani e oo mai i le taimi nei aua lenei faalavelave faalenatura.