O lagona o le faafetai ma le viiga e faafoi i le Atua, na lagonaina e alo ma tamafanau a le Falelua o Matautu ma Gagaifo i Lefaga, o ana Tama Faasau ma ana Tama Faapelepele, aemaise o ana Lupe Faalele, ina ua tini taunuu le faamoemoe sa lupe e pei ona faatinoina i le Hall a le Tiafau – EFKS South West.
O le faamoemoe na loloma i le Mafutaga a Tina ma Tamaitai o le EFKS a le Falelua o Matautu ma Gagaifo i Lefaga e pei ona malaga mamao mai ai le faletua poo le Tina o le galuega, le Faletua o le susuga i le Faafeagaiga ia Rev Lauama, na taitaia maia malaga a le Mafutaga, e faatagisia se fesoasoani tau seleni mo le fia faaleleia o le galuega a le Atua i lona siosiomaga ma maota auā le galuega, ma nisi o vaega ina ia faaleleia le soifua tautua o le Afioaga.
O nisi o le faigamalaga e aofia ai le Afioga ia Lemalu Tiumalu Taimata ma le Tofa Auala Leiite Setefano na fai ma fofoga o le Faigamalama i le taimi atoa o lenei faamoemoe na malotia ai i laufanua o Brisbane nei.
O le Komiti a le Falelua na faamaopoopoina lenei faigamalama ma nafa ma le tele o feuiaiga uma o lenei faamoemoe, e Faatamā i ai le susuga ia Rev Perelini Tauilo, Taitaifono o le Mafutaga a le Falelua o Rev Neti Seluka faatasi ma le lagolagosua a le susuga i le Faafeagaiga ia Rev Faafetai Setefano, ma o latou faletua.
E aofia ai foi i luga lava o le laulau nisi o Tapaau o le Falelua e pei o le Afioga ia Lemalu T Galala II, le Tamaitai o Talalelei Setefano ma nisi o Tamalii ma Faleupolu o le Falelua sa nutimea faatasi i le opogiina o lenei faamoemoe, e pei o le Afioga Faumui Suapi Perelini, Lemalu Meloka Lemalu, Auala Setefano, ma le Tofa Leautuli‘ilagi Malaeoalii Sogialofa Vaa Leapai sa fesoasoani tele i le itu i le media ma le aufaasalalau ma nisi o fesoasoani i fesootaiga auā le taumafaiga o lenei faamoemoe.
Na fetalai le Tofa Taua Faamate e fai ma sui o le auvalaaulia ma Ekalesia i lea uluai faamoemoe, ma le vaiaso lona lua, a o le po o le Aso Toonai 25 o Novema na fetalai le Tofa ia Aumua e fai ma sui o le auvalaaulia ma Ekalesia.
O le vaevaega o le seleni $85,613.75 na maua: Posiva 10/11/2012 = AUSD$5321.00; Tusigaigoa 17/11/2012 = $70,000; Posiva Faaiu 24/11/2012 = $10,292.75.
O le Afioga Lemalu T Galala II sa avea ma MC o le faamoemoe atoa i aso e tolu ae o sauniga lotu sa amataina ai nei faamoemoe o le Falelua, na taitaia lava e Lupe Faalele a le Afioaga o loo afulelea i Kuiniselani nei auā le Atua ma lona finagalo.
Tele ma anoanoai taumafa eseese na saunia e le Mafutaga a le Falelua, auā le aofia na auai aemaise le agai mai o le faigamalama.
O le isi faamoemoe o le Falelua a Matautu ma Gagaifo sa faia i le Hall a le susuga i le Toeaina Faatonu o Rev Kerita Reupena ma le faletua i Goodna.
Na faaiuina le faamoemoe i se tatalo o le faamanuia na saunia e le susuga i le Faafeagaiga ia Rev Elder Tauaaga Mata‘afa ma lūlūaao ai ma faamavae i lena afiafi.
