O le a avea nei ma se tasi o galuega mo le Komisi o le toe fuataina o tulafono a Samoa, le faia o se sailiiliga pe talafeagai ona faia se lesitala e maua ai faamatalaga uma atoa ai ma foliga poo ata o tagata e faamaonia i le faamasinoga i solitulafono o le faia o feusuaiga solitulafono poo sex offenders.
O le finagalo lea o le Loia Sili ua toe mapuna mai i fafo i ni lipoti ua salalau, ma ua faaalia ai e le Loia Sili a le Malo, le afioga Aumua Ming Leung Wai, o le a silasila foi le Komisi o le toe fuataina o tulafono, pe talafeagai ma tulafono o iai a le atunuu le faia o se lesitala.
O loo tele le lagolago mo le faia o sea lesitala mo tagata solitulafono e faamaonia le faia o gaioiga tau feusuaiga solitulafono peitai o loo atugalu nisi i le lē fetaui o se lesitala ma le aafia ai o aiā o tagata o aiga o i latou e faamaonia ia ituaiga o solitulafono, aemaise foi o aiā tatau a le au solitulafono ua mae‘a tuli ni faasalaga.
