Silasila Komesina leoleo faaleleia le mataituina o solitulafono faavaomalo

E toaono Komesina o leoleo i le Pasefika e aofia ai ma Samoa o loo avea nei ma sui o le Board poo le komiti faatonu a le auaunaga faaleoleo a le pasefika o loo mataituina gaioiga o faiga solitulafono i le va o atunuu o le Pasefika. E ta‘ua lea auaunaga o le Pacific Transnational Crime Network le PTCN.

O le vaiaso na tea nei na fono ai le komiti faatonu i Apia ma talanoa ai mataupu e faaleleia ai le galuega a le auaunaga o le PTCN ma faapea foi ona sainia ai se maliega e galulue faatasi uma ai Komesina o matagaluega o leoleo a atunuu o le Pasefika e fetufaa‘i auala ma metotia e vaavaai lelei ai faiga solitulafono mo le lelei au i luma o nei auaunaga a atunuu taitasi.

O se faatasiga na faaleo ai foi lagona ma finagalo o sui o le komiti faatonu i vaega eseese e tatau ona ave i ai le faamuamua mo le siitia o le auaunaga faaleoleo, auā a lelei aoaoina alii ma tamaitai o loo faatinoina tiute, o le a faapea foi ona lelei fesootaiga i le mataituina o solitulafono ma tagata e sailia ma pueina ona o le aafia i ni faiga solitulafono.

Mo le silafia e le aufaitau o le auaunaga ua galulue faatasi ai nei matagaluega o leoleo i le Pasefika, ua mafai ona taofia ai nisi o faiga solitulafono ma ua maua ai foi tagata o isi atunuu e tuua‘ia i ni faiga solitulafono i o latou atunuu, ae ua malaga ese ma agai mai ua faamautu i atunuu eseese o le Pasefika.

O le Malo Ausetalia o loo faatupeina le ofisa autū o le PTC sa muai faatuina i Fiti, ae talu ai le fouvale a le fitafita a lea atunuu na aveesea faamalosi ai le faigamalo a Fiti i le lima tausaga ua mavae, na faapea loa ona siitia mai le ofisa i Samoa ma faatuina ai lona nofoaga autū i le fogafale pito i luga o le maota o le Malo i le eleele fou, e pei ona faaaogā i ai le maota Samoa o loo i le vaega i luga o lea maota o le Malo. O solitulafono tau i le feaveaiina o fualaau ma pauta faasāina, le feaveaiina o aupega malolosi, ma le feaveaiina faasolitulafono o tagata, o nisi ia o itu o loo sili ona mataitu e leoleo sinia o le Pasefika e aofia ai ma Samoa o loo galulue i le PTCN.

O nai tausaga ua mavae na mafai ona pueina ai nisi o tagata mai Amerika sa malaga mai i Samoa ma faamautu ai, ae o loo molia i ni solitulafono i o latou atunuu. O le galuega a lea auaunaga na toe mafai ona maua ai ma faafoi ia tagata e tali ia latou solitulafono i o latou atunuu.