O le naunautaiga ia uumau ma tamau i avanoa ua maua mai e faalauteleina ai le ola aoaoina e pei ona malaga mai ai sikolasipi faiaoga ia poo matua o faiva mai le Iunivesite i Papaigalagala (Faculty of Education, National University of Samoa) mo le tolu vaiaso i laufanua o Kalaiesetete.

O le faletua o Dawn Rasmussen, o loo faiaoga i mataupu tau taaloga (Lecturer in PE) faapea le afioga Onelau Faamoemoe Hakai-Soti (Lecturer in Food & Textiles Technology) na malaga mai Samoa mo le la auai ai totonu o le Iunivesite a Canterbury i le koneferenisi tele a alo ma fanau aoga Pasefika lea na tauaofia i totonu o Kalaiesetete (Pacific Postgraduate Symposium).

O le koneferenisi lea mo i latou uma ua faasauni atu mo le faaiuina o latou faailoga o le “masters” mai ia latou mataupu filifilia, e faapena la ona tauaaoina ai latou tusitusiga mulimuli (thesis) a o faafofoga foi le panel ma le komiti o faiaoga Iunivesite e makaina lea laasaga o taumafaiga. Na faalauiloa mai e Dawn Rasmussen i le faatalanoaga i luga o le leitio “Siufofoga o le Penina o Samoa 96.9Plains FM, e toalima alo Samoa sa tauaaoina a latou thesis i lea faatasiga, e pei ona malaga atu ai foi i le Iunivesite i Otago mo le faaiuga o le vaiaso e tapuaia faiva o nisi o latou uso a aoga.

O le faatomuaga o lana tusitusiga poo ona mafaufauga i lana thesis sa ia faaulutalaina “Peg in the Ground”, pe o se pine ua tutu‘i mau i le eleele e fai ma faavae mautu, auā le faatāuaina o le soifua o le tagata e ala i le toaga e exercise ma faagaioi le tino e ola ai ma le mafaufau, aemaise o le oo mai o ituaiga taumafa eseese ua faananau i ai le loto ma augata ai le tino e gaioi.

Pei ona lausilafia o lenei faletua o le atunuu ua iloga foi lona agavaa e pei ona iai i Samoa ma faiaoga i totonu o aoga, ua tele foi ni ana tamaiti aoga ua faamanuiaina e ala i lana auaunaga.

O se tasi o fanau aoga mai le Iunivesite o Canterbury o le tamaitai o Ashalyna Noa pei ona tauaaoina foi lana thesis matagofie ma le ‘anoa, faatasi ai ma le afioga Onelau mai le Iunivesite o Papaigalagala.

O lenei koneferenisi e tuufaatasia lava e alo ma fanau Pasefika o loo galulue ai i totonu o le Iunivesite a Canterbury, e pei o Liz Keneti, Malia Lameta ma isi o le Pacific Team. O le faatupeina o sikolasipi e fesoasoani malosi ai Canterbury faapea le Iunivesite i Papaigalagala.

Ua iai le faamoemoe o le faaiuga o le tausaga nei e faamae‘a ai mataupu aemaise o latou faailoga “Masters” o loo tulitulimatagau.

E tatou te oloolo pitovaa pea auā so tatou ‘ai mo a taeao, e lē fiu gofie le saili malo ina ia asamo le poto salalau.  E toe taliu le faigamalaga i Samoa i le Aso Gafua, aso 18.10.2010 auā le toe  foi atu i le Iunivesite mo le a‘oa‘oina o fanau o le atunuu.