Na pa‘epa‘e atoa luma maota o le Faletaalo tele i le Apia Park i le faaiuga o le vaiaso i Malu o le Malo, ina ua faatautaia ai siitaga o tofiga, o se faiga ua faatautaia faaletausaga ina ia saga unai ai le auaunaga ua ofo atu e alii ma tamaitai Samoa ua tofia i le Matagaluega o Leoleo ma Falepuipui.
O se sauniga na faatautaia e tatala ai lenei sauniga tele e pei ona auai atu i ai sui o le Matagaluega aemaise o le Malo e faamaonia.
“O le fua e te lulu e te toe selesele”, o upu faamalosiau ia ma le faamalo a le Afioga i le Alii Palemia, Tuilaepa Lupesoliai Sailele Malielegaoi, i le sauniga faapitoa o le faauuga a malu o le malo ua mafai ona laasia le isi laasaga fou i le siitia ai o tofi i totonu o le Matagaluega o Leoleo.
Sa molimauina lea faamoemoe tāua e le mamalu o le atunuu, aemaise aiga ma uo o i latou ua faamanuiaina ma na taitaia lea sauniga e le susuga i le faafeagaiga, Rev Esekia Peneueta.
O le siitia ai o tofi faigaluega o i latou ua filifilia e le Matagaluega, o le faamautu ai pea lea o le pitolaau a le Ofisa o Leoleo i le puipuia o le saogalemu o Samoa.
Ua lē o toe po se lilo i le siisii i luga o le tulaga ua iai le auaunaga i lenei vaitaimi, i le siisii ai foi o soligatulafono ua molimauina i totonu o Samoa.
O le faatino ai pea lea i tausaga taitasi o nei suiga o tofiga, ua ofo atu ai foi ma ni auala e saga faaleleia atili ai le tautua a Leoleo i totonu o le atunuu.
Na saunoa le Afioga i le Alii Palemia le Susuga Tuilaepa Lupesoliai Sailele Malielegaoi i le faamamafa ua ave i lenei vaitaimi i le atoatoa o le auaunaga a leoleo, “… O le siitia ai o o outou tulaga tofi, o le maualuga foi lea o tiute ma matafaioi e feagai ma outou, ma ua atagia mai ai lou mitamita o oe o se taitai leoleo e malu ai Samoa, ma e ao ona e lototele ma faaaloalo i taimi uma e faatino ai tiutefai.”
O le faanaunautaiga lava o le Alii Palemia, ina ia lelei le faatinoga o le auaunaga mo le saogalemu o le atunuu, ma na ia fautuaina Malu o le Malo i lea tulaga ona o le filifilia o i latou e avea ma taitai e lei faataga faia e le Matagaluega. “Aua ne‘i avea oe ma lago mate e tasi e faaleaogāina ai le suauu.
O le avea foi ma taitai leoleo e tatau ona atagia mai ai amioga silisili ona lelei ae lē o amio matagā ma le lē taupulea e tauvalea ai le Matagaluega atoa,” o le saunoaga lea a le Taitai o le Malo.
O loo faaopoopoina pea le fuainumera o tamaitai i tofiga maualuluga o le Matagaluega o Leoleo ma ua tofia ai se tasi o tamaitai muamua i le tofiga o leoleo taitai sinia, lea ua faamanuiaina ai le tamaitai ia Sina Enoka Tafua.
O le tamaitai leoleo maualuga i tofiga nei na muai tofia ai foi le tamaitai leoleo o Annie Laumea.
O se tasi foi lea o mataupu e lē mapu le lagalaga pea ina ia unai le tulaga o tamaitai i totonu o le Matagaluega ma lana auaunaga.
O le vaitau lenei ua toatele leoleo tamaitai, ma o le tele o suega a leoleo ua vaaia ai le malosi ai lava le tulai mai o Tamaitai.
Na faaalia foi le agaga faafetai ma le fiafia o Sina, ona o lea foi tulaga ua mafai ona ia maua ma avea ai o ia o se tamaitai muamua e fai ma faataitaiga i nisi o leoleo tamaitai ina ia pale mai i tofiga Maualuluga o le Malo.
O le faafetai silisili a Sina e mo le fesoasoani a le agaga a le Atua ona sa faateia foi o ia i le filifilia e avea ma taitai leoleo sinia ae o ia o se tamaitai. Ua 26 nei tausaga o tautua Sina i totonu o le Matagaluega ma e fai lona aiga ma ona alo e toalua.
