Ua toe siisii foi i luga le tulaga o le aoga a Colwill i Aukilani i Sisifo i le taaloga neti polo a tamaitai i vasega laiti, talu ai le taumafai malosi a le latou ‘au numera fa o lenei tausaga 2010.
O le galuega faigata sa feagai ma tamaitai faiaoga o le ‘au, sa tauia ina ua toe tulai mai lana au i se tulaga maualuga i le tausinioga o le 2010.
O le tausaga talu ai, sa faapea foi ona tulaga manuia ma sa mauaina le faailoga o le ‘au alualu i luma, ma le taalo tausaafia, peitai o le tausaga nei, ua toe sili atu foi le isi sitepu sa tulai mai ai taumafaiga a alo ma fanau.
O le tufaga faailoga sa faia i le lua vaiaso talu ai i le aoga a West Habour sa tolaulauina ai faailoga mo ‘au uma sa tausinio, faapea foi ma faailoga mo tamaitai taalo taitoatasi.
O le tuufaatasiga o aoga maualalalo i le itumalo o Waitakere ua faamae‘aina nei seia aulia foi le isi taamilosaga i le taussga fou.
O se vaaiga matagofie ona o fanauiti o nisi ia o loo vaavaai agai i ai le manuia o lea foi taaloga mo le lumanai. E pei ona silafia le matautia o le tulai mai o alo tamaitai o le atunuu i lea foi taaloga e pei ona faamaonia i lenei tausaga i le ‘au tele a Niu Sila, le Siver Fern.
O se luitau mo mātua ina ia silasila toto‘a i ai i lea foi faamanuiaga, ma ia aua ai ne‘i augata e fesoasoani ma tuuina le fanau i taaloga, auā o le isi lea lumanai manuia mo i latou i le agai i luma. E lē gata i le tulaga o le malosi o le tino, ae ua faamanuiaina foi i le tulaga tau seleni.
